The Phnom Penh Post Search

Search form




Logo of Phnom Penh Post newspaper Phnom Penh Post - តើ​ជំនួប​ប្រកួត​រវាង ​លៀប រដ្ឋា ជាមួយ អ៊ួច ធារឹទ្ធ នៅ ONE STRIKE អាច​កែ​ប្រែ​ប្រវត្តិ​ដែរ​ទេ?​

តើ​ជំនួប​ប្រកួត​រវាង ​លៀប រដ្ឋា ជាមួយ អ៊ួច ធារឹទ្ធ នៅ ONE STRIKE អាច​កែ​ប្រែ​ប្រវត្តិ​ដែរ​ទេ?​

Content image - Phnom Penh Post
(រូបខាងក្រោមគេ) លៀប រដ្ឋា (ឆ្វេង) ប្រកួត​ជាមួយ អ៊ូច ធារឹទ្ធ ក្នុង​កម្មវិធី ONE​ STRIKE នា​ថ្ងៃ​អាទិត្យ​នេះ​។

តើ​ជំនួប​ប្រកួត​រវាង ​លៀប រដ្ឋា ជាមួយ អ៊ួច ធារឹទ្ធ នៅ ONE STRIKE អាច​កែ​ប្រែ​ប្រវត្តិ​ដែរ​ទេ?​

ប្រដាល់​គុន​ខ្មែរ​សង្វៀន PNN បាន​ដាក់​គូ​ប្រដាល់​លំដាប់​ឯកគឺ​កីឡាករ​ លៀប រដ្ឋា មក​ពី​បន្ទាយ​មាន​ជ័យ​ប៉ះ​ប្រ​កួត​ជា​មួយ​កីឡាករ អ៊ូច ធារឹទ្ធ មក​ពី​ក្លិប​អាណាចក្រ​គុន​ខ្មែរ​ជា​គូ​ប្រចាំ​សប្តាហ៍ ONE STRIKE ដែល​មាន​ការ​ប្រកួត​ចំនួន ២ ​ទឹកក្នុង​ ១​ ទឹក​មាន ៧​ នាទី ហើយ​បើ​មិន​បាន​ឈ្នះ​ដោយ​ផ្តួល​ដៃ​គូ​ឱ្យ​សន្លប់​ទេនឹង​ចាត់​ទុក​ថា ​ស្មើ​គ្នា​។

យ៉ាង​ណា​ក៏​ដោយ​សប្តាហ៍​នេះ​ការ​ប្រកួត​ជម្រុះដើម្បី​ឆ្ពោះ​ទៅ​ដណ្តើម​ខ្សែ​ក្រវាត់និង​ទឹក​ប្រាក់១​ម៉ឺន​ដុល្លាររវាង​កីឡាករបឺតសង្ឃឹមនិង​កីឡាករអេលីតចំរើនត្រូវ​បាន​អនុញាត​ឱ្យ​សម្រាក​ទុក​ឱកាស​ឱ្យ​កីឡាករ​ទាំង​ ២ ហ្វឹក​ហាត់​រក្សា​សុខភាពនិង​បំប៉ន​កម្លាំងដោយ​ដាក់​ជំនួស​នូវ​គូ​ប្រកួត​កំដរ​សង្វៀន​ចំនួន ៤​ គូ​វិញ នា​ថ្ងៃ​អាទិត្យ​ ទី ២៨ ខែ​ វិច្ឆិកា ឆ្នាំ​ ២០២១​ នេះ​។​

ជំនួប​ប្រកួត​រវាង​អ្នក​លេង​កណ្តាប់​ដៃ​ធ្ងន់ លៀប រដ្ឋា និង អ៊ូច ធារឹទ្ធ នេះគឺ​ជា​លំដាប់​អ្នក​ប្រដាល់មាន​ជំនាញ​ប្រើ​កម្លាំង​ស្នៀត​កណ្តាប់​ដៃ​បាន​ល្អ​បំផុតហើយ​ពួក​គេ​ទាំង​ ២ សុទ្ធ​តែ​ធ្លាប់​ជួប​ប្រកួត​គ្នា​ជា​លក្ខណៈ​ប្រដាល់​សកលនិង​ប្រដាល់​គុន​ខ្មែរ ប៉ុន្តែ​លើក​នេះ​ដាក់​ឱ្យ​ជួប​ប្រកួត​គ្នា​ក្នុង​គូ​ឯក​ប្រចាំ​សប្តាហ៍ ONE​ STRIKE ទម្ងន់ ៥៧​ គីឡូ​ក្រាម​។​

កីឡាករអ៊ូចធារឹទ្ធនិយាយ​ថា​៖ «​ខ្ញុំ​ធ្លាប់​ប្រកួត​ជាមួយលៀបរដ្ឋាចំនួន ៥​ លើក​មក​ហើយ ក្នុង​ប្រដាល់​សកល និង​ប្រដាល់​គុន​ខ្មែរដោយ​ខ្ញុំ​ធ្លាប់​ឈ្នះ​គាត់​ទាំង​អស់​។សម្រាប់​ប្រ​កួត​លក្ខណៈ​ ONE STRIKE ប្រកួត​គ្នា​ចំនួន ១៤​ នាទី​ចែក​ជា ​២ ​ទឹកនៅ​សង្វៀន PNN នា​ថ្ងៃ​អាទិត្យ​នេះ ខ្ញុំ​មិន​ហ៊ាន​សន្និដ្ឋាន​បាន​ទេ ពី​ព្រោះ​រយៈ​ពេល​ប្រកួត​ខុស​គ្នាហើយ​ក៏​មិន​ដឹង​ថា តើ​គាត់​មាន​កម្លាំង​ល្អនិង​ក្បាច់​ល្អ​ជាង​មុនឬ​យ៉ាង​ណា​ទេ​?

កីឡាករអ៊ូចធារឹទ្ធបន្ត​ថា​៖ «​ខ្ញុំ​មិន​រំពឹង​ឈ្នះ​ច្រើន​ទេពី​ព្រោះ​យើង​ក៏​ហាត់គេ​ក៏​ហាត់ចំណែក​លទ្ធផល​វិញពិត​ជា​មិន​ហ៊ាន​ព្យាករណ៍​ទេពី​ព្រោះ​កន្លង​មកទោះ​ខ្ញុំ​ធ្លាប់​ឈ្នះ​មែនតែ​តឹង​តែង​ណាស់ដោយ​សារ​កណ្តាប់​របស់​​គាត់​ធ្ងន់​ល្អនិង​ទឹក​ចិត្ត​ចូល​វ៉ៃ​មិន​ចេះ​ដក​ថយ​ឡើយ​។ខ្ញុំ​គិត​ថា សង្ឃឹម​ឈ្នះ​ត្រឹម ​៦០ ​ភាគ​រយ​ប៉ុណ្ណោះ​»​។​​

លៀប រដ្ឋា ជា​អ្នក​ប្រដាល់​ចិត្ត​ធំកណ្តាប់​ដៃ​ល្អ ប៉ុន្តែ​ការ​ប្រកួត​ប្រជែង​ក្នុង​ចំណោម​អ្នក​ប្រដាល់​ឆ្នើមៗក្នុង​ទម្ងន់ ៥៧ ​គីឡូក្រាម ​ភាគ​ច្រើនត្រូវ​បាន​ធ្លាក់​ចេញនៅ​វគ្គ​ពាក់​កណ្តាល​ផ្តាច់​ព្រ័ត្រដែល​ធ្វើ​ឱ្យ​លទ្ធផល​ឈ្នះ​ខ្សែ​ក្រវាត់ និង​ជើង​ឯក​នោះស្ថិត​ក្នុង​លំដាប់​ចំណាត់​ថ្នាក់​ទី២​ ច្រើន​ជាង​។​

លៀប រដ្ឋា នៅ​ក្លិប​ដី​ឡូត៍​មាន​រិទ្ធខេត្ត​បន្ទាយ​មាន​ជ័យនិយាយ​ថា​៖ «​សម្រាប់​ប្រកួត​លើក​នេះ​ជា​មួយ អ៊ូច ធារឹទ្ធ ខ្ញុំ​ត្រៀម​បាន​ល្អនិង​ហ្វឹក​ហាត់​បាន​គ្រប់​គ្រាន់ដោយ​​មាន​បំណង​ចង់​ប្រកួត​យក​ឈ្នះក្នុង​កម្ម​វិធី​ ONE​ STRIKEប្រកួត​គ្នា​ចំនួន ១៤ ​នាទីចែក​ជា ២ ​ទឹកនៅ​សង្វៀន PNN​។ ខ្ញុំ​សង្ឃឹម​ឈ្នះ​ស្តារ​មុខ​មាត់​ឡើង​វិញ​បានគឺ​រំពឹង​ឈ្នះ​ដល់ ៨០ ​ភាគ​រយ​»​។​

តាម​ប្រវត្តិ​ប្រកួត​របស់​អ្នក​ប្រដាល់​ទាំង ២ នេះកីឡាករ​ លៀប រដ្ឋា ឡើង​សង្វៀន​បាន​ចាស់​វស្សា​ជាង​កីឡាករ អ៊ូច ធារឹទ្ធ ចំណែក​បទ​ពិសោធនិង​ចំនួន​ឡើង​ប្រកួត​វិញលៀបរដ្ឋាបាន​ច្រើន​ជាង​។
ប្រភព​ពី​គណៈកម្មការ​ផ្គូរ​ផ្គង​ប្រចាំ​សង្វៀន​ប្រដាល់ PNN មិន​អាច​សុំ​ប្រវត្តិ​កីឡាករ​ប្រកួត​បាន​ទេ ខណៈ​ដែល​សង្វៀន​ប្រដាល់​មួយ​នេះមាន​លក្ខណៈ​តឹង​រឹង​ចំពោះ​អ្នក​សារពត៌​មាន​ជា​ដៃ​គូ​៕​​

អត្ថបទគួរចាប់អារម្មណ៍