.jpg)
Zapata (ឆ្វេង) របស់ Atalanta លោតប្រជែងតែតបាល់ជាមួយ Leonardo Bonucci របស់ Juve អំឡុងការប្រកួត នៅ Serie A កាលពីថ្ងៃសៅរ៍។ AFP
ក្រុងមីឡាន៖ ខ្សែប្រយុទ្ធ Duvan Zapata បានបន្ថែមភាពសោកសៅ កាន់តែខ្លាំងឡើង ដល់ក្រុមកំពុងយ៉ាប់យ៉ឺន Juventus កាលពីថ្ងៃសៅរ៍ ជាមួយនឹងគ្រាប់បាល់តែ ១ គ្រាប់ប៉ុណ្ណោះ ដែលគ្រប់គ្រាន់ល្មម សម្រាប់ក្រុមភ្ញៀវ Atalanta មានជ័យជម្នះ ១-០ ខណៈដែលបរាជ័យនេះ កើតមកដំណាលក្រុមយក្សនៅក្រុងទូរីន (Turin) កំពុងមមិងមមាំងនឹងការស៊ើបអង្កេតរបស់ប៉ូលិស ចំពោះគណនីរបស់ពួកគេ។
ក្រុម Atalanta បានពង្រឹងការឈរយ៉ាងរឹងមាំនៅលេខ ៤ ដែលជាចំណាត់ថ្នាក់ចុងក្រោយរបស់ក្របខ័ណ្ឌ Serie A ក្នុងការបានសិទ្ធិទៅលេង នៅក្របខ័ណ្ឌ Champions League ដោយសារគ្រាប់បាល់ទី ៧ គិតពីការប្រកួត នៅគ្រប់កម្មវិធីទាំងអស់របស់កីឡាករសញ្ជាតិកូឡុំប៊ី Zapata ក្នុងនាទីទី ២៨ សម្រាប់ហ្គេម ដែលធ្វើឡើង នៅឯកីឡដ្ឋាន Allianz Stadium នេះ។
«យប់នេះ ពួកយើងពិតជាលេងបានល្អណាស់់។ ពួកគេជាក្រុមល្អ ហើយនៅវគ្គទី ១ យើងបានពិតជាបានធ្វើឱ្យពួកគេពិបាក។ យើងរាងថមថយបន្តិច នៅវគ្គទី ២ តែយ៉ាងណា ចុងក្រោយ យើងទទួលបានលទ្ធផលល្អ»។ នេះជាសម្ដីរបស់កីឡាករ Zapata ដែលនិយាយប្រាប់ទៅប្រព័ន្ធផ្សព្វផ្សាយ DAZN បន្ទាប់ពីបានជួយក្រុម Atalanta ឱ្យឈ្នះក្នុងផ្ទះរបស់ក្រុម Juve នៅ Serie A ជាលើកដំបូង គិតតាំងពីឆ្នាំ ១៩៨៩ មក។
បរាជ័យរបស់ក្រុម Juve កើតមានឡើងបន្ទាប់់មាននូវសប្ដាហ៍ដ៏លំបាក ដែលពួកគេត្រូវបានធ្វើឱ្យអាម៉ាស់ដោយក្រុមជើងឯកអឺរ៉ុប Chelsea កាលពីថ្ងៃអង្គារ និងដែលបន្ទាប់មក ត្រូវបានក្រុមប៉ូលិសចូលឆែកឆេរការិយាល័យរបស់ក្លិប កាលពីថ្ងៃសុក្រ ដែលជាចំណែកមួយនៃការស៊ើបអង្កេតពាក់ព័ន្ធនឹងករណីសង្ស័យនៃការដោះដូរកីឡាករ និងការដែលទំនងជាធ្វើបញ្ជីក្លែងក្លាយ ក្នុងរយៈពេល ៣ រដូវកាលកន្លងមក។
Zapata (កណ្ដាល) រត់សម្ដែងការអបអរ ក្រោយស៊ុតបញ្ចូលទីឱ្យ Atalanta នាំមុខ Juve ១-០អំឡុងការប្រកួត នៅ Serie A កាលពីថ្ងៃសៅរ៍។
បើយោងតាមបណ្ដាញសារព័ត៌មាន នៅប្រទេសអ៊ីតាលី ក្រុម Juve និងនាយករបស់ក្លិបចំនួន ៦រូប ក្នុងនោះរួមទាំងប្រធាន លោក Andrea Agnelli ផងដែរ កំពុងស្ថិតក្រោមការស៊ើបអង្កេតពាក់ព័ន្ធនឹងអ្វី ដែលរបាយការណ៍របស់ទូរទស្សន៍ Sky Sport នៅអ៊ីតាលី ផ្សាយថា មានចំនួនទឹកប្រាក់ប្រមាណជា ២៨២ លានអឺរ៉ូ ($៣១៩,២លាន) សង្ស័យថា ក្លិបបានចំណេញពីកិច្ចព្រមព្រៀងដោះដូរកីឡាករ។
កាលពីខែមុន សហព័ន្ធបាល់ទាត់អ៊ីតាលី បានបើកការស៊ើបអង្កេតមួយជុំវិញករណី ដែលត្រូវបានចោទថា បានបំប៉ោងតម្លៃកីឡាករមួយចំនួន ក្នុងគោលបំណងនៃការធ្វើបញ្ជី ឬក៏ប្រើការផ្លាស់ប្ដូរកីឡាករ ដើម្បីជួយធ្វើឱ្យមានតុល្យភាពចំពោះបញ្ជីចំណូល និងចំណាយ។
កាលពីថ្ងៃសៅរ៍ ទីភ្នាក់ងារព័ត៌មាន ANSA បានដកស្រង់សម្ដីរបស់ប្រភពមួយពីគណៈកម្មការត្រួតពិនិត្យបាល់ទាត់ (COVISOC) ដែលបានប្រាប់ថា តាំងពីរដូវស្លឹកឈើជ្រុះ នាឆ្នាំមុនមក វាបានបង្ហាញឱ្យឃើញនូវកិច្ចព្រមព្រៀងជាច្រើន ដែលមិនគ្រាន់តែមានការពាក់ព័ន្ធនឹងក្រុម Juve នោះទេ ពោលគឺក្លិបទាំងអស់ ដែលបានចុះបញ្ជីនៅផ្សារហ៊ុនរបស់អ៊ីតាលី៕ VN
