.jpg)
Lewandowski អបអរ ក្រោយស៊ុតឱ្យ Bayern នាំមុខ Freiburg ២-០ អំឡុងការប្រកួត នៅ Bundesliga កាលពីថ្ងៃទី ៦ ខែវិច្ឆិកា។ AFP
ក្រុងប៉ារីស៖ កីឡាករ Robert Lewandowski កំពុងក្លាយជាឧបសគ្គចំពោះស៊ុបភើស្តារ Lionel Messi ក្នុងការបានឈ្នះពានលក្ខណៈឯកត្តជន Ballon d''Or ជាកំណត់ត្រាលើកទី ៧ ខណៈដែលពិធីប្រគល់ពានរង្វាន់ដ៏មានកិត្យានុភាពនេះ បានត្រឡប់មកវិញ នៅថ្ងៃចន្ទនេះហើយ បន្ទាប់ពីត្រូវបានលុបចោល កាលពីឆ្នាំមុន ដោយសារជំងឺឆ្លងរាតត្បាត។
ខ្សែប្រយុទ្ធសញ្ជាតិប៉ូឡូញ Lewandowski របស់ក្រុម Bayern Munich ធ្វើបានកំណត់ត្រា នៅក្របខ័ណ្ឌ Bundesliga ដោយការរកបាន ៤១ គ្រាប់ ពីការចូលលេងត្រឹមតែ ២៩ ហ្គេម កាលពីរដូវកាលមុន ដើម្បីបំបែកស្ថិតិដ៏យូរអង្វែងរបស់អតីតកីឡាករ លោក Gerd Mueller ដែលបច្ចុប្បន្ន បានបាត់បង់ជីវិតហើយ។
Lewandowski វ័យ ៣៣ ឆ្នាំ បានគ្រងពានរង្វាន់កីឡាករឆ្នើមជាងគេរបស់សហព័ន្ធបាល់ពិភពលោក (FIFA) ក្នុងឆ្នាំ ២០២០ ហើយកំពុងទទួលបានការគាំទ្រទាំងពីសំណាក់គ្រូបង្វឹករបស់ក្រុម Bayern លោក Julian Nagelsmann និងមិត្តរួមក្រុម Thomas Mueller បន្ទាប់ពីមាននូវការចាប់ផ្ដើមពេញដោយផ្លែផ្កា នារដូវកាលថ្មីនេះ។
Messi លើកពាន Ballon d'Or ឆ្នាំ២០១៩ បង្ហាញ មុនការប្រកួតរវាងក្រុម Barcelona និង Mallorca នៅកីឡដ្ឋាន Camp Nou កន្លងមក។ AFP
«Lewy (ឈ្មោះហៅក្រៅរបស់ Lewandowski) ត្រូវតែឈ្នះពានរង្វាន់នេះ (ពាន Ballon d''Or) នៅថ្ងៃចន្ទនេះ នៅពេលអ្នកឃើញនូវវិធី ដែលគេកំពុងលេង នាពេលនេះ»។ នេះជាការលើកឡើងរបស់កីឡាករសញ្ជាតិអាល្លឺម៉ង់ Mueller ពីមិត្តរួមក្រុម Lewandowski ដែលទម្លុះសំណាញ់ទីបាន ២៥ គ្រាប់ហើយ ពីការបង្ហាញខ្លួនចំនួន ២០ ហ្គេម នារដូវកាលនេះ។
ស៊ុបភើស្តារទាំង ២ Messi និង Cristiano Ronaldo បូកបញ្ចូលគ្នាឈ្នះដល់ទៅ ១១ ដង ក្នុងចំណោម ១២ ជំនាន់ចុងក្រោយ នៃពានរង្វាន់ Ballon d''Or នេះ ដោយលើកលែងតែម្ដងគត់ ក្នុងឆ្នាំ ២០១៨ ដែលពេលនោះ ខ្សែបម្រើ Luka Modric ជាម្ចាស់ពាននេះ បន្ទាប់ពីបានរួមចំណែកយ៉ាងសំខាន់ ក្នុងការជួយឱ្យក្រុម Real Madrid ក្លាយជាជើងឯក នៅក្របខ័ណ្ឌ Champions League និងក្រុមជម្រើសជាតិក្រូអាស៊ី ឡើងដល់វគ្គផ្ដាច់ព្រ័ត្រ នៅ World Cup។
ជាមួយគ្នានេះ ក្នុងកិច្ចសម្ភាសមួយជាមួយកាសែត Abendzeitung នៅក្រុងមុយនិច កាលពីខែមុន គ្រូបង្វឹករបស់ក្រុម Bayern លោក Nagelsmann បានថ្លែងថា៖ «Robert (Lewandowski) សមនឹងឈ្នះពានរង្វាន់នេះ ពីព្រោះតាមទស្សនៈរបស់ខ្ញុំ រូបគេ គឺនឹងនរណាស់ជាងកីឡាករដទៃ»៕ VN
