The Phnom Penh Post Search

Search form




Logo of Phnom Penh Post newspaper Phnom Penh Post - ​សោ​ភ័​ណ្ឌ ជួបនឹង​សំណាង ឯ​អ្នក​ត្រូវ​ឈ្នះ​ប្រា​ក់លាន សុទ្ធតែ​ចូលដេក​ពេទ្យ​

​សោ​ភ័​ណ្ឌ ជួបនឹង​សំណាង ឯ​អ្នក​ត្រូវ​ឈ្នះ​ប្រា​ក់លាន សុទ្ធតែ​ចូលដេក​ពេទ្យ​

Content image - Phnom Penh Post
ផល សោភ័ណ្ឌ បាន​ទាត់ទៅ​លើ ឡុន បេនលឿន បណ្តាលឱ្យ​ខូច​ដៃ​ស្តាំ ដើម្បី​ឈ្នះ​ប្រាក់លាន។ រូបថត ថោន

​សោ​ភ័​ណ្ឌ ជួបនឹង​សំណាង ឯ​អ្នក​ត្រូវ​ឈ្នះ​ប្រា​ក់លាន សុទ្ធតែ​ចូលដេក​ពេទ្យ​

ភ្នំពេញៈ កីឡាករ​ជើង​ខ្លាំង ផល សោ​ភ័​ណ្ឌ បាន​ជួបនឹង​សំណាង​ដ៏​កម្រ ដើម្បី​ក្លាយជា​ម្ចាស់​ជើងឯក ការប្រកួត​ដណ្តើម​ប្រា​ក់លាន នៅលើ​សង្វៀន​ថោ​ន ដ៏​គួរឱ្យភ្ញាក់ផ្អើល ចំណែក​អ្នករៀបចំ​ការប្រកួត​បា​ន​ហៅ​ការ​ឈ្នះ​ប្រាក់​លាន​របស់ សោ​ភ័​ណ្ឌ ថា ជា​លាភក្នុង​គ្រោះ ព្រោះ​អ្នក​ដែល​ត្រូវ​ឈ្នះ​ប្រា​ក់លាន​ពិតប្រាកដ ប្រចាំ​សប្តាហ៍​នេះ អាចជា យ៉េន ឌី​ណា និង លន បញ្ញា ទៅវិញ​ទេ ប៉ុន្តែ​អ្នក​ទាំង​ ២​ នេះ សុទ្ធ​តែមាន​របួសធ្ងន់ និង​ត្រូវ​បញ្ជូនទៅ​ព្យាបាលនៅ​មន្ទីរពេទ្យ​ដូចគ្នា​។​

​តាមរយៈ​ការប្រកួត កាលពី​ថ្ងៃអាទិត្យ​នោះ ផល សោ​ភ័​ណ្ឌ បាន​ចាញ់​ពិន្ទុ យ៉េន ឌី​ណា នៅក្នុង​វគ្គ​ជម្រុះ ចំណែក លន បញ្ញា បាន​យកឈ្នះ ឡុង បេន​លឿន ដោយ​ពិន្ទុ ក្នុងការ​ប្រកួត​ជម្រុះ​៣​ទឹក​ដូចគ្នា ដើម្បី​ឡើងទៅ​ជួបគ្នា នៅ​វគ្គ​ផ្តាច់ព្រ័ត្រ ដណ្តើមយក​ប្រាក់រង្វាន់​ ១ ​ពាន់​ដុល្លារ និង​ ៦០០​ ដុល្លារ​។​

​ប៉ុន្តែ​រឿង​ដ៏​គួរឱ្យភ្ញាក់ផ្អើល បាន​កើតមានឡើង ព្រោះ​ទាំង យ៉េន ឌី​ណា និង លន បញ្ញា ដែលជា​អ្នកឈ្នះ សុទ្ធ​តែមាន​របួសធ្ងន់ មិនអាច​ឡើង​ប្រកួត​បន្ត​ដូចគ្នា ហើយ​ក្នុង​ហេតុការណ៍​ដ៏​កម្រ​នេះ គណៈកម្មការ បានសម្រេច​ភ្លាមៗ​ឱ្យ​អ្នកចាញ់ ផល សោ​ភ័​ណ្ឌ និង ឡុង បេន​លឿន ឡើង​ប្រកួត​ផ្តាច់ព្រ័ត្រ​ជំនួស​វិញ ដោយ​ក្នុងនោះ ផល សោ​ភ័​ណ្ឌ បាន​ទាត់​ឱ្យ ឡុង បេន​លឿន ខូចដៃ​ស្តាំ ត្រឹម​ទឹក​ទី​២​។

​លោក ជួប វុត្ថា អ្នកគ្រប់គ្រង​កម្មវិធី​ប្រចាំ​នៅ​សង្វៀន​ថោ​ន បាន​ប្រាប់ថា​៖ «​បញ្ហា​កីឡាករ​របួស​នេះ កើតឡើង គឺ​ពិតជា​លំបាក ប៉ុន្តែ​ក្រុម​គណៈកម្មការ​ទាំង​៣ មាន​ខាង​ទូរទស្សន៍ សហ​ព័ន្ធ និង​ខាង​ស្ព​ន​ស័​រ បានសម្រេច​ភ្លាមៗ ដោយ​យក​កីឡាករ ផល សោ​ភ័​ណ្ឌ និង ឡុង បេន​លឿន ដែល​សុទ្ធតែ​អ្នកចាញ់​ជុំ​ទី​១ មក​ប្រកួត​ផ្តាច់ព្រ័ត្រ​តែម្តង ដើម្បី​ឈ្នះ​ប្រាក់រង្វាន់ ហើយ​ហេតុការណ៍​នេះ​ដូច​គេ​ហៅថា លាភ​ក្នុង​គ្រោះ​របស់ ផល សោ​ភ័​ណ្ឌ​»​។​

​ចំណែកឯ លោក តែម ម៊ឺន ប្រធាន​សហព័ន្ធ​កីឡាប្រដាល់​គុន​ខ្មែរ បាន​ថ្លែងថា​៖ «​ការ​ដោះ​​ដូរ​គូ ដោយ​កីឡាករ​រងរបួស មិនអាច​ប្រកួត​បាន​នេះ ជាការ​សម្រប​សម្រួល​តាមបែប​វិធី​ល្អ ដើម្បីឱ្យ​ការប្រកួត​នេះ នៅតែ​ដំណើរការ​ប្រកួត​បានល្អ ហើយ​ហេតុការណ៍​បែបនេះ វា​អាស្រ័យ​លើ​យើង​ចេះ​ដោះស្រាយ ព្រោះ​គេ​ផ្សាយ​ផ្ទាល់ ត្រូវតែ​ធ្វើ​អ៊ីចឹង​»​។​

​និយាយ​ពី​កីឡាករ​ឈ្នះ​ទាំង​ ២ ដែល​រងរបួស​វិញ កីឡាករ យ៉េន ឌី​ណា បាន​បាក់​ថ្គាម ត្រូវ​បញ្ជូនទៅ​ព្យាបាល នៅ​មន្ទីរពេទ្យ​លី​តាំង ចំណែក លន បញ្ញា បាន​ភ្លាត់​ស្មា បញ្ជូនទៅ​សម្រាក​ព្យា​បាល នៅ​ពេទ្យ​ក្រុម​ជម្រើសជាតិ​។ លោក ជួប វុត្ថា បាន​បន្ថែមថា​៖ «​យ៉េន ឌី​ណា របួសធ្ងន់ គឺ​បែក​រហូតដល់​ក្រអូមមាត់​ខាងក្នុង ដោយ​ស្នៀត​កែង​របស់ សោ​ភ័​ណ្ឌ ហើយ​តាម​លោក សេន ប៊ុន​ថេ​ន បានឱ្យដឹងថា យ៉េន ឌី​ណា ត្រូវការ​ពេល​ព្យាបាល​យ៉ាងតិច​ក៏​ ៤ ទៅ​ ៦​​ ខែ​ដែរ ទើប​ប្រកួត​បាន​»​។​

​ចំណែក​លោក ធន់ សុភា គ្រូ​​បង្វឹក លន បញ្ញា បាន​ប្រាប់ថា​៖ «​លន បញ្ញា មិនទាន់​អាច​កំណត់​បានទេ ថា​តើ​ពេលណា​ប្រកួត​បាន ព្រោះ​កីឡាករ​រូបនេះ ធ្លាប់​របូត​ស្មា​អ៊ីចឹង​ច្រើនលើក​មកហើយ ហេតុនេះ​នៅពេល​ប្រកួត​ភាគច្រើន តែងតែ​ភ្លាត់​យូរៗ​ម្តង ហើយ​ចំពោះ​បញ្ហា​របួស​នេះ វា​អាច​យូរ ឬ​ជា​ឆាប់​ក៏​ថា​បាន បើ​-​សិន​មានការ​ព្យាបាល​បានល្អ​នោះ​»​។​

​សម្រាប់​ការប្រកួត នៅលើ​សង្វៀន​ថោ​ន កាលពី​ថ្ងៃអាទិត្យ​នោះ ការប្រកួត​សងសឹក​របស់​កីឡាករ​ជើងចាស់ ម៉ន សា​ម៉េ​ត ទៅលើ​ជើង​ថ្មី​ល្បីឈ្មោះ ធន់ ផានិត លក្ខណៈ​ម៉ាស​ហ្វៃ បាន​ក្លាយជា​គូប្រកួត ដែល​ទទួល បានការ​គាំទ្រ​ខ្លាំងជាងគេ ព្រោះ​ការប្រកួត​ចំនួន​៩​នាទី​ពេញ អ្នក​ទាំង​ ២​ នេះ បាន​វ៉ៃ​បក​សង​គ្នា​យ៉ាង​ជក់ចិត្ត​បំផុត ប៉ុន្តែ​បាន​ត្រឹម​ស្មើគ្នា ទៅតាម​ច្បាប់​ម៉ាស​ហ្វៃ ព្រោះ​គ្មាន​អ្នកសន្លប់​៕

អត្ថបទគួរចាប់អារម្មណ៍