ក្រុងប៉ារីស: ខ្សែប្រយុទ្ធឆ្នើម Lionel Messi បានទទួលស្គាល់ថា ការឈ្នះពាន Copa America ជាមួយក្រុមជម្រើសជាតិអាហ្សង់ទីន អាចជាកត្តាដ៏សំខាន់ក្នុងការកំណត់ឱ្យរូបគេទទួលបានពានរង្វាន់ឯកត្តជន Ballon d''Or ជាលើកទី៧ បន្ទាប់ពីមានឆ្នាំដ៏ច្របូកច្របល់ ខណៈដែលកីឡាការិនីសញ្ជាតិអេស្ប៉ាញ Alexia Putellas ជាអ្នកកាន់ពាននេះផ្នែកស្ត្រី។
កីឡាករ Messi វ័យ ៣៤ ឆ្នាំ បានយកជ័យជម្នះលើគូប្រជែង ដែលទទួលបានការគាំទ្រច្រើនដែរ កីឡាករ Robert Lewandowski និង Karim Benzema ដើម្បីលើកពានរង្វាន់នេះ នៅឯពិធីដ៏គួរឱ្យចាប់អារម្មណ៍ កាលពីថ្ងៃចន្ទ ក្នុងក្រុងប៉ារីស ជាក្រុងដែលឥឡូវនេះ រូបគេចាត់ទុកជាផ្ទះ បន្ទាប់ពីបានចាកចេញពីក្លិបកុមារភាព Barcelona មកកាន់ក្រុម Paris Saint-Germain កាលពីខែសីហា។
ទោះមានការលាគ្នាទាំងទឹកភ្នែកពីក្លិប Barca និងការចាប់ផ្តើមជីវិតដ៏លំបាក ក្នុងប្រទេសបារាំងក៏ដោយ ក៏ការវិនិច្ឆ័យពីអ្នកសារព័ត៌មានជុំវិញពិភពលោក បានផ្តល់ពានរង្វាន់នេះដល់រូបគេជាពិសេស សម្រាប់តួនាទីជាប្រធានក្រុមអាហ្សង់ទីន រហូតបានរួមចំណែកជួយឱ្យឈ្នះពានធំលក្ខណៈអន្តរជាតិលើកដំបូង គិតចាប់តាំងពីឆ្នាំ ១៩៩៣ មក។
«២ ឆ្នាំកន្លងទៅ ខ្ញុំគិតថា ខ្ញុំមកទីនេះ ជាឆ្នាំចុងក្រោយ តែខ្ញុំកំពុងឈរនៅទីនេះ ម្ដងទៀត»។ នេះជាសម្ដីរបស់ Messi ដែលបានឈ្នះចុងក្រោយ សម្រាប់ពាន Ballon d''Or នេះ ក្នុងឆ្នាំ ២០១៩ មុនពេលកម្មវិធីនេះ ត្រូវបានផ្អាក កាលពីឆ្នាំមុន ដោយសារជំងឺឆ្លងរាតត្បាត។
Messi ដែលបានលើកពាននេះផងដែរ ក្នុងឆ្នាំ ២០០៩, ២០១០, ២០១១, ២០១២ និងឆ្នាំ ២០១៥ បន្តទៀតថា៖ «មនុស្សជាច្រើន ចាប់ផ្ដើមសួរខ្ញុំថា តើពេលណា ខ្ញុំនឹងចូលនិវត្តន៍? តែពេលនេះ ខ្ញុំនៅទីនេះ ក្នុងក្រុងប៉ារីស ហើយខ្ញុំមានក្ដីរីករាយណាស់។ ខ្ញុំមិនដឹងថា តើខ្ញុំនៅសល់ប៉ុន្មានឆ្នាំទៀតទេ? តែខ្ញុំសង្ឃឹមថា នឹងនៅសល់ច្រើនឆ្នាំទៀត ព្រោះខ្ញុំពិតជារីករាយ នៅឆ្នាំនេះ»។
«អ្វីដែលខ្ញុំសម្រេចបានជាមួយអាហ្សង់ទីន គឺជាសុបិន ដែលក្លាយជាការពិត។ ខ្ញុំគិតថា ខ្ញុំឈ្នះពាន (Ballon d''Or) នេះ ដោយសារតែអ្វី ដែលយើងសម្រេចបាន នៅឯព្រឹត្តិការណ៍ Copa America ដូច្នេះ ខ្ញុំសូមប្រគល់ពានដ៏មានតម្លៃនេះដល់មិត្តរួមក្រុមទាំងអស់របស់ខ្ញុំ»។ កីឡាករ Messi បានបន្ថែម។
តែយ៉ាងណាក្ដី Messi បានលេងតែ ១១ ដង និងស៊ុតបាន ៤ គ្រាប់ប៉ុណ្ណោះឱ្យក្រុម PSG តាំងពីមកចូលរួមជាមួយក្រុមអ្នកមាននៅបារាំង ដោយធ្វើឱ្យយល់ឃើញថា ឆ្នាំនេះ ម្ចាស់ជយលាភី នឹងជាកីឡាករផ្សេង ក្នុងនោះខ្សែប្រយុទ្ធ Lewandowski របស់ក្រុម Bayern Munich សង្ឃឹមខ្ពស់ជាងគេ។
កីឡាករអន្តរជាតិប៉ូឡូញ ត្រូវបានគេគិតថា នឹងអាចឈ្នះតាំងពីឆ្នាំ ២០២០ ម្ល៉េះ បន្ទាប់ពីស៊ុតបញ្ចូលទីបាន ៤៥ គ្រាប់ ពីការចូលលេង ៣៧ ហ្គេម ឱ្យ Bayern តែគួរឱ្យស្ដាយ កម្មវិធីប្រគល់ពានដ៏មានកិត្យានុភាពនេះ ត្រូវបានលុបចោល។
Lewandowski បានបញ្ចប់រដូវកាលកន្លងទៅ ជាមួយនឹងការរកបានដល់ទៅ ៤១ គ្រាប់ក្នុងហ្គេម នៅក្របខ័ណ្ឌ Bundesliga តែទទួលបានចំណាត់ថ្នាក់លេខ ២ ប៉ុណ្ណោះ ពីការបោះឆ្នោត ដែលត្រូវបានរៀបចំឡើងដោយទស្សនាវដ្ដី France Football និងដែលបោះឆ្នោតដោយក្រុមអ្នកសារព័ត៌មានមកពីជុំវិញពិភពលោក។
Jorginho ដែលឈ្នះពាន Champions League ជាមួយ Chelsea និងពាន Euro 2020 ជាមួយក្រុមអ៊ីតាលីជាប់លេខ ៣ ខណៈកីឡាករ Karim Benzema របស់ Real Madrid នៅលេខ ៤ ហើយអតីតម្ចាស់ពាននេះ ៥ សម័យកាល Cristiano Ronaldo ជាប់លេខ ៦៕ AFP/VN