.jpg)
លោក Ralf Rangnick។ រូបថត AFP
ក្រុងឡុងដ៍: ក្រុមបិសាចក្រហម Manchester United បានប្រកាស កាលពីថ្ងៃចន្ទថា ពួកគេបានតែងតាំងលោក Ralf Rangnick ជាគ្រូបង្វឹកបណ្តោះអាសន្នរហូតដល់បញ្ចប់រដូវកាល បន្ទាប់ពីមានការបញ្ចប់តួនាទីរបស់លោក Ole Gunnar Solskjaer។
បុរសសញ្ជាតិអាល្លឺម៉ង់វ័យ ៦៣ ឆ្នាំ មកចូលរួមជាមួយក្លិបយក្ស នៅក្រុងមេនឆេស្ទ័រ ដោយការចាកចេញពីក្លិប Lokomotiv Moscow នៅរុស្ស៊ី ដែលនៅទីនោះ គាត់មានមុខងារជាប្រធានផ្នែកកីឡា និងផ្នែកអភិវឌ្ឍន៍ ហើយនៅពេលបញ្ចប់រដូវកាល លោក Rangnick នឹងបន្តតួនាទីជាទីប្រឹក្សារបស់ក្លិប នៅទឹកដី Old Trafford ២ ឆ្នាំបន្ថែមទៀត។
គាត់ត្រូវមកធ្វើការងារដឹកនាំក្រុមជំនួសលោក Michael Carrick ដែលធ្វើតួនាទីបណ្ដោះអាសន្នបាន ២ ហ្គេម ចាប់តាំងពីលោក Solskjaer ត្រូវបានបណ្ដេញ កាលពីជាង ១សប្ដាហ៍កន្លងទៅ បន្ទាប់ពីទទួលបានលទ្ធផលអាក្រក់ជាបន្តបន្ទាប់។
នាយកបាល់ទាត់របស់ក្លិប Man United លោក John Murtough ប្រាប់ឱ្យដឹងថា៖ «គាត់ (Rangnick) គឺជាបេក្ខភាពទី១ របស់យើង សម្រាប់តំណែងអ្នកចាត់ការបណ្ដោះអាសន្ន ដោយពិចារណាចំពោះភាពជាអ្នកដឹកនាំ និងជំនាញខាងតិចនិក ដែលគាត់នឹងយកពីបទពិសោធនៃការដឹកនាំ និងធ្វើជាគ្រូបង្ហាត់ ក្នុងរយៈពេលជិត ៤ ទសវត្សរ៍»។
អតីតអ្នកចាត់ការក្រុម RB Leipzig លោក Rangnick បានប្រាប់ថា លោកមានក្ដីរំភើបណាស់ដែលបានចូលរួមជាមួយក្រុម Man United ហើយថា គាត់កំពុងផ្ដោត ក្នុងការបង្កើតឱ្យមានរដូវកាលដ៏ជោគជ័យ សម្រាប់ក្លិប ដែលកំពុងយ៉ាប់យ៉ឺនមួយនេះ។
ក្រុម Man United ពេលនេះ កំពុងឈរនៅក្នុងចំណាត់ថ្នាក់លេខ៨ ក្នុងតារាងពិន្ទុរបស់ក្របខ័ណ្ឌ Premier League បន្ទាប់ពីប្រកួតស្មើជាមួយក្រុមកំពូលតារាង Chelsea ១-១ កាលពីថ្ងៃអាទិត្យចុងសប្ដាហ៍កន្លងទៅ៕ AFP/VN
