ក្រុងឡុងដ៍៖ លោក Thomas Tuchel បានប្រាប់ កាលពីថ្ងៃអង្គារថា ខ្សែបម្រើ Jorginho របស់ក្រុម Chelsea មិនចាំបាច់ត្រូវការការទទួលបានកិត្តិយស ឬតម្លៃពីពាន Ballon d''Or ដើម្បីជាការបង្ហាញថា រូបគេស្ថិតក្នុងចំណោមកីឡាករល្អបំផុត របស់ពិភពលោកនោះឡើយ បន្ទាប់ពីកីឡាករអន្តរជាតិអ៊ីតាលីរូបនេះ បានជាប់ចំណាត់ថ្នាក់លេខ ៣ ពីកម្មវិធីប្រគល់ពានរង្វាន់ សម្រាប់កីឡាករឆ្នើមប្រចាំឆ្នាំ។
ខ្សែប្រយុទ្ធអន្តរជាតិអាហ្សង់ទីន Lionel Messi របស់ក្រុម Paris Saint-Germain ជាម្ចាស់ជយលាភីពាន Ballon d''Or ជាលើកទី ៧ កាលពីថ្ងៃចន្ទ ហើយខ្សែប្រយុទ្ធសញ្ជាតិប៉ូឡូញ Robert Lewandowski របស់ក្រុម Bayern Munich ឈ្នះទី ២ ខណៈដែលកីឡាករ Jorginho ទទួលបានសំឡេងឆ្នោតច្រើនទី ៣។
កីឡាករ Jorginho បានរួមចំណែកជួយឱ្យក្រុម Chelsea ឈ្នះពានក្របខ័ណ្ឌ Champions League កាលពីរដូវកាលមុន ហើយបន្ទាប់មក ក៏កា្លយជាកីឡាករដ៏សំខាន់ ក្នុងជោគជ័យ ដែលក្រុមជម្រើសជាតិអ៊ីតាលីលើកពាន Euro 2020 តែក្នុងខណៈដែលកីឡាករវ័យ ២៩ឆ្នាំ រូបនេះ មិនអាចបញ្ចប់ឆ្នាំដ៏គួរឱ្យចងចាំ ជាមួយនឹងការឈ្នះពាន Ballon d''Or នោះ គ្រូបង្វឹកលោក Tuchel មានបំណងជួយកីឡាកររបស់គាត់ឱ្យទទួលបានសមិទ្ធផលល្អ ជាមួយក្រុមទាំងមូល ជាជាងការទទួលបានកិត្តិយស ជាលក្ខណៈផ្ទាល់ខ្លួន។
អ្នកចាត់ការសញ្ជាតិអាល្លឺម៉ង់ លោក Tuchel បានថ្លែងទៅកាន់អ្នកសារព័ត៌មានថា៖ «ខ្ញុំមានការងឿងឆ្ងល់អំពីការប្រគល់ពានរង្វាន់ឯកត្តជននេះ ព្រោះការប្រកួតប្រជែង មានលក្ខណៈស្មុគស្មាញណាស់ ដោយវាមានការពាក់ព័ន្ធនឹងសំណាង ព្រមទាំងការប្រឹងប្រែងរបស់ក្រុមទាំងមូល។ មិនអាចមានកីឡាករតែម្នាក់ ឈ្នះការប្រកួតបាល់ទាត់នោះឡើយ វាជារឿងទៅមិនរួចនោះទេ»។
ដោយត្រូវបានសួរថា តើគាត់បានរំពឹងទេថា កីឡាករ Lewandowski នឹងឈ្នះពានរង្វាន់ Ballon d''Or នេះ បន្ទាប់ពីមាននូវសមិទ្ធផលដ៏អស្ចារ្យចំនួន ២ រដូវកាល ជាប់ៗគ្នានោះ លោក Tuchel បានតបថា៖ «ខ្ញុំសុំប្រើសិទ្ធិ ក្នុងការមិនបញ្ចេញការយល់ឃើញ ចំពោះការប្រគល់ពាននេះ»។
«យើងមានកីឡាករផ្ទាល់ខ្លួនរបស់យើងម្នាក់ (Jorginho) ដែលបានរួមចំណែកទាំងអស់ ក្នុងពានរង្វាន់សំខាន់ ដូច្នេះ វានឹងមិនមានអ្វីគួរភ្ញាក់ផ្អើលនោះឡើយ ប្រសិនបើគេឈ្នះពានរង្វាន់នេះ។ វាជាការជ្រើសរើស ហើយវាជាការបោះឆ្នោត។ នៅពេលអ្នកត្រូវបានជ្រើសរើស អ្នកទទួលយកវាចុះ ហើយប្រសិនបើអ្នកមិនទទួលបានការគាំទ្រទេ អ្នកក៏ត្រូវទទួលស្គាល់ ហើយជីវិតដំណើរការទៅមុខសាមញ្ញធម្មតា»។ លោក Tuchel បានបន្ថែម។
ជាមួយគ្នានេះ ក្នុងកម្មវិធីប្រគល់រង្វាន់ នៅឯក្រុងប៉ារីសនោះ ក្រុម Chelsea ត្រូវបានបោះឆ្នោតជាក្រុមល្អជាងគេ ប្រចាំឆ្នាំ។ បន្ទាប់ពីឈ្នះពាន Champions League នៅរដូវកាលដំបូងរបស់គាត់ លោក Tuchel កំពុងសម្លឹងពីការគ្រងជើងឯកក្របខ័ណ្ឌ Premier League ដែលពេលនេះ ក្រុមរបស់លោក កំពុងឈរទី ១ ក្នុងតារាងពិន្ទុ ដោយនាំមុខ ១ ពិន្ទុ លើក្រុមលេខ ២ Manchester City មុនពេលធ្វើដំណើរទៅផ្ទះរបស់ក្រុម Watford នៅថ្ងៃពុធនេះ៕ AFP/VN