ក្រុងមីឡាន: ក្រុមសេះបង្កង់ Juventus បានគេចផុតពីការខកចិត្ត នៅផ្ទះរបស់ក្រុម Salernitana ជាមួយនឹងការយកឈ្នះ ២-០ កាលពីថ្ងៃអង្គារ ដែលលទ្ធផលនេះ នាំមកនូវភាពវិជ្ជមានបានវិញខ្លះ បន្ទាប់ពីបានជួបនូវសប្តាហ៍ដ៏លំបាក ខណៈដែលក្រុម Atalanta កំពុងសសៀរខ្លួនម្ដងបន្តិចៗ ទៅក្បែរក្រុម នៅកំពូលតារាងនៃក្របខ័ណ្ឌ Serie A បន្ទាប់ពីខ្សែប្រយុទ្ធ Mario Pasalic ធ្វើបានហ៊ែតទ្រិក (ស៊ុត ៣គ្រាប់) ក្នុងជ័យជម្នះ ៤-០ ក្នុងផ្ទះខ្លួនឯងលើក្រុម Venezia។
ខ្សែប្រយុទ្ធទាំង ២ គឺ Paulo Dybala និង Alvaro Morata ធ្វើបានសម្រេចម្នាក់ ១ គ្រាប់ ទាំងក្នុងវគ្គទី១ និងទី២ ដើម្បីជួយឱ្យក្រុម Juve ដណ្ដើមបាន ៣ពិន្ទុដ៏សំខាន់ ពីការប្រកួតនៅកីឡដ្ឋាន Stadio Arechi នេះ តែយ៉ាងណា ពួកគេឈរនៅលេខ ៧ ដោយតាម ៧ ពិន្ទុពីក្រោមក្រុមលេខ ៤ Atalanta ដែលជាការឈរនៅចំណាត់ថ្នាក់ចុងក្រោយគេ ក្នុងការបានសិទ្ធិទៅលេង នៅក្របខ័ណ្ឌ Champions League រដូវកាលក្រោយ។
ក្រោយការប្រកួតបញ្ចប់ ខ្សែការពារ Giorgio Chiellini បានប្រាប់ទៅប្រព័ន្ធផ្សព្វផ្សាយ DAZN ថា៖ «នៅពេលនេះ យើងត្រូវការការដឹងពីការទទួលខុសត្រូវជាងពេលណាៗទាំងអស់។ យើងមិនចាំបាច់ធ្វើអ្វីផ្សេង ក្រៅតែពីរឿងសាមញ្ញធម្មតានោះឡើយ យើងត្រូវធ្វើរឿងសាមញ្ញធម្មតា តែប្រកបដោយភាពវៃឆ្លាត។ ថ្ងៃនេះ យើងបានធ្វើរឿងហ្នឹង»។
ដោយឡែក ការប្រកួត នៅឯកីឡដ្ឋាន Gewiss វិញ ការធ្វើបានហ៊ែតទ្រិករបស់កីឡាករ Pasalic បានរួមចំណែកយ៉ាងធំ ក្នុងការជួយឱ្យក្រុម Atalanta បន្តនូវទម្រង់យ៉ាងអស្ចារ្យរបស់ខ្លួនទៀត ហើយរំកិលកាន់តែកៀកនឹងក្រុមនៅទីកំពូលតារាង ដោយមាន ៣១ ពិន្ទុ ក្រោយបញ្ចប់ហ្គេមទី១៥ នេះ។
បន្ទាប់ពីបានធ្វើដំណើរទៅយកជ័យជម្នះដល់ផ្ទះរបស់ក្រុម Juve ក្រុម Atalanta ក៏ធ្វើបាននូវលទ្ធផលល្អទៀត ដោយការដណ្ដើមបានជោគជ័យយ៉ាងត្រចះត្រចង់ជាលើកទី៤ បន្តបន្ទាប់គ្នា សម្រាប់ហ្គេមក្នុងលីគ ជាមួយនឹងគ្រាប់បាល់ ដែលស៊ុតដោយកីឡាករ Pasalic នៅនាទីទី៧ ១២ និង ៦៧ ព្រមទាំងគ្រាប់បាល់ពីកីឡាករ Teun Koopmeiners នៅនាទីទី៥៧។
ក្រុម Atalanta របស់លោក Gian Piero Gasperini អត់ទាន់ចាញ់នោះទេសម្រាប់ការប្រកួតនៅក្នុងប្រទេសអ៊ីតាលី ចំនួន ៨ លើកចុងក្រោយ ហើយពេលនេះ មិនត្រូវបានដកចេញនោះឡើយពីក្នុងចំណោមក្រុម ដែលប្រកួតប្រជែងជើងឯក ក្រោយពីទម្លុះសំណាញ់ទីរបស់ក្រុម ដែលទើបឡើងមកថ្មី Venezia បើទោះបីជាបានធ្វើការផ្លាស់ប្ដូរកីឡាករជាច្រើនរូប ពីជម្រើសដំបូង ដែលលេងទល់នឹងក្រុម Juve នៅក្រុងទូរីន កាលពីថ្ងៃសៅរ៍ក៏ដោយ៕ AFP/VN