ក្រុងឡុងដ៍: លោក Ray Kennedy ដែលធ្លាប់លេងឱ្យក្រុម Liverpool និង Arsenal បានស្លាប់ កាលពីថ្ងៃអង្គារ ក្នុងវ័យ ៧០ ឆ្នាំ ក្រោយតស៊ូយ៉ាងយូរជាមួយនឹងជំងឺផាកឃីនសុន (ជំងឺពាក់ព័ន្ធនឹងខួរក្បាល)។
លោក Kennedy ដែលជាអតីតតារាបាល់ទាត់ដ៏លេចធ្លោ ទាំងនៅក្នុងក្លិបនាទឹកដី Anfield និងក្លិបនៅភាគខាងជើងក្រុងឡុងដ៍ ចាប់ផ្ដើមមានជំងឺផាកឃីនសុន ក្នុងឆ្នាំ ១៩៨៤។ លោកបានជួយឱ្យក្រុម Liverpool ឈ្នះពាន European Cup (Champion League) ៣លើក និងពានលីគកំពូលរបស់ប្រទេសអង់គ្លេស ៥ ដង ក្រោយពីបានមកចូលរួម ដោយការចាកចេញក្រុម Arsenal ក្នុងឆ្នាំ ១៩៧៤។
លោក Kennedy ល្បីល្បាញគ្រាប់បាល់ដ៏សំខាន់ ដែលជួយឱ្យ Liverpool ស្មើក្រុម Bayern Munich ក្នុងហ្គេម នៅជើងទី២ វគ្គទី៤ ក្រុមចុងក្រោយ ដែលធ្វើឱ្យបានឡើងវគ្គផ្ដាច់ព្រ័ត្រ និងឈ្នះពាន។
លោកក៏ជាកីឡាករសំខាន់ផងដែរសម្រាប់ក្រុម Arsenal ក្នុងឆ្នាំ ១៩៧១ ពេលដែលពួកគេឈ្នះជើងឯកលីគកំពូលអង់គ្លេស និងពាន FA Cup ដោយការមានជោគជ័យលើក្រុម Liverpool។
«គ្រប់គ្នាក្នុងក្លិប Liverpool កំពុងគិត និងបារម្ភ ចំពោះក្រុមគ្រួសារ និងមិត្តភក្ដិរបស់លោក Ray (Kennedy) សម្រាប់ពេលវេលាដ៏លំបាក និងសោកសៅនេះ»។ នេះជាការប្រកាសពីក្លិប Liverpool កាលពីថ្ងៃអង្គារ ដើម្បីចូលរួមរំលែកទុក្ខដល់សាច់ញាតិរបស់លោក Kennedy ដែលស៊ុតបញ្ចូលទីបាន ៧២ គ្រាប់ឱ្យក្រុម ពីការបង្ហាញខ្លួន ៣៩៣លើក ក្នុងរយៈពេល ៨ ឆ្នាំ។
ជាមួយ Arsenal ដែលគាត់បានចាប់ផ្ដើមអាជីព ក្នុងឆ្នាំ ១៩៦៨ នៅអាយុ ១៨ ឆ្នាំ នោះ លោក Kennedy រកគ្រាប់បាល់បាន ៧១ គ្រាប់ ពីការបង្ហាញខ្លួន ២១២ ហ្គេម៕ AFP/VN