ភ្នំពេញៈ អគ្គលេខាធិការក្លិបបាល់ទាត់គិរីវង់សុខសែនជ័យ បានអះអាងថា ថ្នាក់ដឹកនាំរបស់ខ្លួន ពិតជាមានការខកចិត្តខ្លាំង ទៅលើលទ្ធផលនៃការប្រកួតជើងទី២ ក្នុងលីគកំពូលកម្ពុជា ឆ្នាំ២០២១ ដែលទើបបានបញ្ចប់កាលពីពេលថ្មីៗនេះ ដែលក្រុមមានមូលដ្ឋាននៅខេត្តតាកែវមួយនេះ ធ្វើមិនបានល្អសោះ។
«ឆ្នាំ ២០២១ ជារដូវកាលដ៏យូរមួយ ដោយសារតែស្ថានភាពជំងឺរាតត្បាតសកល តែយ៉ាងណាយើងបានបញ្ចប់ពានលីគកំពូល ខណៈបណ្តាប្រទេសមួយចំនួនទៀត មិនទាន់បានបញ្ចប់នៅឡើយ។ នេះជាការលើកឡើងរបស់លោក Florian នៅលើផេចហ្វេសប៊ុកផ្លូវការរបស់ក្លិបគិរីវង់សែនជ័យ កាលពីថ្ងៃពុធ។
អគ្គលេខាធិការក្លិប លោក Florian បន្តថា៖ «ទាក់ទងនឹងលទ្ធផលរដូវកាលមុន (ឆ្នាំនេះ) យើងបានសម្រេចតាមគោលដៅ ដោយស្ថិតនៅក្រុមលំដាប់កំពូលទាំង ៨ ប៉ុន្តែថ្នាក់ដឹកនាំមានការខកចិត្តជាខ្លាំង សម្រាប់លទ្ធផលជើងទី២ ដោយយើងរំពឹងថា នឹងអាចរំខានក្លិបធំៗ ក្នុងការប្រកួតប្រជែង ហើយនាំយកជ័យជម្នះជូនក្លិប ប៉ុន្តែយើងធ្វើមិនបានល្អទាល់តែសោះ»។
សម្រាប់ការប្រកួតលីគកំពូល ឆ្នាំ ២០២១ នេះ ក្រុមគិរីវង់ បានជាប់នៅក្នុងចំណោមក្រុមកំពូល តារាងទាំង ៨ (Top8) ដែលមានសិទ្ធិ ប្រកួតប្រជែងយកពាន នៅជុំទី២ បន្ទាប់ពីពួកគេ បានលេខ ៨ ក្រោយបញ្ចប់ការប្រកួតជុំទី១ ប៉ុន្តែតាមរយៈការប្រកួតវិលជុំទាំង ៧ លើក ក្នុងជុំទី២ គិរីវង់បានចាញ់ទាំងអស់ គឺចាញ់ក្រុមកងយោធពលខេមរភូមិន្ទ ៣-១ ចាញ់ ភ្នំពេញក្រោន ៣-១ ចាញ់ក្រុមបឹងកេត ៣-២ ចាញ់អង្គរថាយហ្គឺរ ៦-១ ចាញ់ព្រះខ័នរាជស្វាយរៀង ៦-០ និងចាញ់ណាហ្គាវើលដ៍ ក្នុងលទ្ធផល ៥-២។
ជាមួយកំណត់ត្រាដ៏អាក្រក់ ក្នុងជើងទី២ ដើម្បីទទួលបានលេខ៨ក្នុងលីគកំពូល ប្រចាំឆ្នាំ ២០២១ ដោយមានត្រឹម ១៣ ពិន្ទុ ជាមួយការឈ្នះ ៤ ស្មើ ១ និងចាញ់រហូតដល់ ១៤ ដង ក្នុងការប្រកួតទាំង ២ ជើងនោះ ក្រុមគិរីវង់ ក៏បានជួបការខកចិត្តផងដែរ នៅក្នុងការប្រកួតថ្នាក់ជាតិ ពានរង្វាន់សម្តេច ហ៊ុន សែន ឆ្នាំ ២០២១ ខណៈពួកគេ បានធ្លាក់ត្រឹមវគ្គជម្រុះ ១៦ ក្រុមដំបូង ក្រោយចាញ់ក្រុមអាស៊ីអឺរ៉ុប ៣-២ នោះ។
យ៉ាងណាក៏ដោយ តាងនាមឱ្យក្លិបគិរីវង់សុខសែនជ័យ លោក Florian បានថ្លែងអំណរគុណទៅដល់គ្រូបង្គោលជនជាតិថៃ លោក Ekapob Potisai សម្រាប់ការប្រឹងប្រែងជួយក្លិប៣រដូវកាលកន្លងមក និងបានជួយអភិវឌ្ឍសមត្ថភាពកីឡាករថ្នាលយុវជនរបស់ក្រុមមួយនេះ កាន់តែមានអនាគតភ្លឺស្វាង។ ជាមួយគ្នានេះ គិរីវង់ ចង់បង្កើតនៅរជ្ជកាលថ្មី ដោយការមិនបន្តកុងត្រាឱ្យកីឡាករភាគច្រើន ដើម្បីបើកផ្លូវក្នុងការនាំយកកីឡាករថ្មីៗ មានបទពិសោធ ចូលមកជួយក្រុមនារដូវកាលថ្មី ឆ្នាំ ២០២២។
លោក Florian បានបញ្ជាក់ថា៖ «ឥឡូវនេះ យើងនឹងមានរជ្ជកាលមួយថ្មី ជាប្រវត្តិសាស្ត្ររបស់ក្លិប ប្រសិនបើយើងចង់បន្តរីកចម្រើន និងឈានឆ្ពោះទៅមុខ។ នៅក្នុងដំណាក់កាលផ្លាស់ប្តូរនេះ យើងបានសម្រេចចិត្ត សម្រាប់ការចាកចេញ និងមិនបន្តកុងត្រាដល់កីឡាករជាច្រើន ដើម្បីនាំយកកីឡាករថ្មីៗ ដែលមានបទពិសោធ ក៏ដូចជាផ្តល់ឱកាសដល់កីឡាករថ្នាលយុវជនរបស់យើង ដូចអ្វីដែលយើង បាននិងកំពុងធ្វើកន្លងមក»។
ជាមួយគ្នានេះ អគ្គលេខាធិការក្លិបលោក Florian បានធ្វើការសន្យា ទៅកាន់អ្នកគាំទ្រដ៏ស្មោះស្ម័គ្ររបស់ក្រុមគិរីវង់សុខសែនជ័យថា៖ «យើងសន្យាថា នឹងយើងខិតខំប្រឹងប្រែងឱ្យកាន់តែខ្លាំងឡើងៗ សម្រាប់រដូវកាលបន្ទាប់ និងធ្វើឱ្យអ្នកគាំទ្រ មានមោទនភាព សម្រាប់ក្លិបនេះ។ យើងទន្ទឹងរង់ចាំអ្នកគាំទ្ររបស់យើងរួចរាល់ហើយ សម្រាប់រដូវកាលខាងមុខនេះ»៕