The Phnom Penh Post Search

Search form




Logo of Phnom Penh Post newspaper Phnom Penh Post - ធា​រិ​ទ្ធ ចាត់ទុក រដ្ឋា ជា​ឧបសគ្គ​ធំ តែ​មិន​ខ្លាច អៀន​ឡៃ និង ហូ​វ​

ធា​រិ​ទ្ធ ចាត់ទុក រដ្ឋា ជា​ឧបសគ្គ​ធំ តែ​មិន​ខ្លាច អៀន​ឡៃ និង ហូ​វ​

Content image - Phnom Penh Post
បេក្ខភាពទាំង​ ៤ នាក់ ដែល​ត្រូវប្រកួតម៉ារ៉ាតុង​​ដណ្តើម​ប្រាក់ នៅសង្វៀនថោន ថ្ងៃអាទិត្យ​នេះ​។ រូបថត សហ​ការី

ធា​រិ​ទ្ធ ចាត់ទុក រដ្ឋា ជា​ឧបសគ្គ​ធំ តែ​មិន​ខ្លាច អៀន​ឡៃ និង ហូ​វ​

​ភ្នំពេញៈ កីឡាករ​មាន​ជំនាញ​ទាំង​ប្រដាល់សកល និង​គុន​ខ្មែរ អ៊ូច ធា​រិ​ទ្ធ បាន​អះអាងថា នៅក្នុង​ចំណោម​បេក្ខភាព​ ៣ ​នាក់​ផ្សេងទៀត ដែល​ត្រូវបាន​ផ្គូផ្គង និង​ដាក់ឱ្យ​ប្រកួត​ម៉ា​រ៉ា​តុង​ដណ្តើម​ប្រាក់​លាន នៅលើ​សង្វៀន​ថោ​ន នា​ថ្ងៃអាទិត្យ​ខាងមុខនេះ រូបគេ​មានការ​បារម្ភ​តែ​ទៅលើ​អ្នកលេង​​កណ្តាប់ដៃ លាភ រដ្ឋា ម្នាក់​ប៉ុណ្ណោះ ចំណែក​បេក្ខភាព​ជា​គូសត្រូវ​ចាស់ ធន់ អៀន​ឡៃ និង គង់ ហូ​វ គេ​មិន​ខ្លាចញញើត​នោះទេ​។​ ​

​ក្នុងចំណោម​បេក្ខភាព​កីឡាករ​ទាំង​ ៤ ​នាក់​នេះ ធន់ អៀង​ឡៃ ធ្លាប់​ឈ្នះ​បាន​ប្រាក់​ពី​កម្មវិធី​នេះ​ចំនួន​ ២ ​លើក ចំណែក អ៊ូច ធា​រិ​ទ្ធ ធ្លាប់​ឈ្នះ​បាន​ ១ ​លើក ខណៈ គង់ ហូ​វ និង លាភ រដ្ឋា មិន​ធ្លាប់​ឈ្នះ​ម្តងណា​ឡើយ​។ តែ​ទោះបីជា​យ៉ាងណា សម្រាប់​ការប្រកួត​លើក​នេះ អ៊ូច ធា​រិ​ទ្ធ ខ្លាចរអា​តែ លាភ រដ្ឋា ម្នាក់​ទេ ចំណែក ធន់ អៀន​ឡៃ ដែល​ធ្លាប់​ឈ្នះ​រូបគេ​ទាំង​ចម្រូងចម្រាស ក្នុងការ​ប្រកួត​វគ្គ​ ១/៤ ​ផ្តាច់ព្រ័ត្រ ដណ្តើម​ខ្សែ​ក្រវាត់នៅ​សង្វៀន PNN នោះ ធា​រិ​ទ្ធ មិន​ខ្លាច​សោះ គឺ​បន់​ឱ្យតែ​ចាប់ឆ្នោត​ជួបគ្នា នៅ​វគ្គ​ជម្រុះ​ដំបូង ដើម្បី​វ៉ៃ​ឱ្យ​សន្លប់​តែម្តង​។​

​កីឡាករ អ៊ូច ធា​រិ​ទ្ធ បាន​និយាយថា​៖ «​សម្រាប់​អ្នក​ទាំង​៣​នាក់ ដែល​ត្រៀម​ប្រកួត​គ្នា គឺ​ខ្ញុំ​គិតថា លាភ រដ្ឋា ជា​ឧបសគ្គ​ធំ​ចំពោះ​ខ្ញុំ ព្រោះ​ឥឡូវ​គាត់​មាន​កណ្តាប់ដៃ​ធ្ងន់ និង​មាន​កម្លាំង​នៅ​ល្អ វាយ​ចេញ​លឿន ហើយ​មិន​ងាយស្រុតចុះ​នោះទេ​»​។​

​សិស្សគណ​ក្លិប​អាណាចក្រគុន​ខ្មែរ អ៊ូច ធា​រិ​ទ្ធ បាន​បន្ថែមថា​៖ «​កន្លងមក លាភ រដ្ឋា ធ្លាប់​ប្រកួត​ចាញ់​ខ្ញុំ​ចំនួន ​៥ ​លើក​ឯណោះ ប៉ុន្តែ​កាលពី​សប្តាហ៍​មុន ខ្ញុំ​ប៉ះ​ប្រកួត​ជាមួយ គឺ​គាត់​យកឈ្នះ​ខ្ញុំ​បាន​ម្តង ក្នុង​លក្ខណៈ​តឹងតែង ហើយ​បើ​ជួបគ្នា​សប្តាហ៍​នេះ ខ្ញុំ​គិតថា លំបាក​រក​វិធី​ឈ្នះ​ណាស់ ព្រោះ​គាត់​វាយ​លក្ខណៈ​អាង​កម្លាំង​ដៃជា​ចម្បង អ៊ីចឹង​បើ​យើង​ទប់​ជាប់ ឬ​មិន​ជាប់ អាច​សន្លប់​ក្រោម​កណ្តាប់ដៃ​បាន​»​។​

​យ៉ាងណាក៏ដោយ អ៊ូច ធា​រិ​ទ្ធ បាន​បញ្ជាក់ថា​៖ «​ខ្ញុំ​នឹង​ព្យាយាម​គេច និង​វាយបក​យកឈ្នះ​ត្រឹម​ពិន្ទុ ហើយ​ខ្ញុំ​គិតថា អាចធ្វើ​បាន ចំណែក ធន់ អៀន​ឡៃ ដែល​ធ្លាប់​ឈ្នះ​ពិន្ទុ​ខ្ញុំ ដោយ​អយុត្តិធម៌​នោះ ខ្ញុំ​គ្មាន​ញញើត ឬ​ខ្លាច​អ្វី​បន្តិច​ទេ គឺ​ចង់​ប៉ះគ្នា​តាំងពី​វគ្គ​ដំបូង ដើម្បី​ផ្តួល​ឱ្យ​សន្លប់​តែម្តង​»​។​

​ចំណែក លាភ រដ្ឋា ក៏​បារម្ភ​ទៅលើ​សមត្ថភាព​របស់ អ៊ូច ធា​រិ​ទ្ធ ផងដែរ ទោះ​រូបគេ​សង្ឃឹមថា អាច​ឈ្នះ​បាន​ប្រា​ក់លាន​ជា​លើកដំបូង នៅ​សង្វៀន​នេះ​ក៏ដោយ​។ «​ខ្ញុំ​មានសង្ឃឹម​ឈ្នះ​បាន​ប្រា​ក់លាន ក្នុង​សប្តាហ៍​នេះ ប៉ុន្តែ​នៅក្នុង​ចំណោម​អ្នក​ប្រដាល់​ទាំង​ ៣ ​នេះ ខ្ញុំ​លំបាក​ប្រកួត​ជាមួយ អ៊ូច ធា​រិ​ទ្ធ ព្រោះ​គាត់​ប្រើ​ស្នៀត​បាន​គ្រប់ផ្នែក និង​មាន​បច្ចេកទេស​វាយ​គេច​លឿន លំបាក​វាយ​ឱ្យ​ចូលដល់​គោលដៅ​ណាស់ ហើយ​ក្រៅពី អ៊ូច ធា​រិ​ទ្ធ ខ្ញុំ​មិនសូវ​ព្រួយបារម្ភ ពី​រឿង​ចាញ់​ទេ​»​។​

​ចំពោះ​បេក្ខភាព​របស់ គង់ ហូ​វ មកពី​ខេត្តសៀមរាប ដែល​មិនសូវមាន​ការចាប់អារម្មណ៍​ពី​មហាជន​នោះ បាន​អះអាងថា​៖ «​ចំពោះ​ខ្ញុំ មិន​ហ៊ាន​អះអាង​ពី​លទ្ធផល​យ៉ាងណា​នោះទេ ព្រោះ​គេ​សុទ្ធតែ​ខ្លាំងៗ ប៉ុន្តែ​ខ្ញុំ​ធានា​វ៉ៃ​អស់ពី​សមត្ថភាព ចំណែក​លទ្ធផល​មិន​ហ៊ាន​និយាយ​មុន​ទេ​»​។​

​ចំណែក​លោក ធន់ សុភា គ្រូ​បង្វឹក ធន់ អៀន​ឡៃ បាន​និយាយថា​៖ «​ឧបសគ្គ​ធំ​របស់​ធន់ អៀន​ឡៃ មាន ​២ ​នាក់ គឺ លាភ រដ្ឋា និង អ៊ូច ធា​រិ​ទ្ធ ព្រោះ​អ្នក​ទាំង​២​នេះ មាន​បទពិសោធ​ល្អ ជា​កីឡាករ​ចាស់វស្សា គឺ​ពិតជា​លំបាក​ឈ្នះ​ណាស់​។ តែ​ទោះជា​យ៉ាងណា ខ្ញុំ​នៅតែ​មានជំនឿថា កីឡាករ ធន់ អៀន​ឡៃ មានប្រៀប​ឈ្នះ​ច្រើន គឺ​ ៧០ ​ភាគរយ​»​។​

​សម្រាប់​បទពិសោធ​ប្រកួត​របស់​អ្នក​ទាំង​ ៤​ នេះ កីឡាករ លាភ រ​ដា្ឋ ចាស់វស្សា​ជាងគេ ប៉ុន្តែ​ចំនួនប្រកួត​តិចជាង អ៊ូច ធា​រិ​ទ្ធ​។ ធា​រិ​ទ្ធ ធ្លាប់​ប្រកួត​បាន ​១០២ ​ដង ឈ្នះ​ ៧៥ ​ចាញ់​ ២២ ស្មើ​ ៥ ​ដង ក្នុងនោះ​ផ្តួល​ដៃគូ​ឱ្យ​សន្លប់​បាន ​៤០ ​ដង រីឯ លាភ រដ្ឋា ប្រកួត​បាន ​៦៧ ​ដង ឈ្នះ​ ៤២ ចាញ់​ ១៨ ស្មើ​ ៧​ ដង ក្នុងនោះ​ផ្តួល​ដៃ​គេ​ឱ្យ​សន្លប់​បាន​ ១៣​ ដង​។​

​ចំណែក​កីឡាករ ធន់ អៀន​ឡៃ ធ្លាប់​ប្រកួត​បាន ​៧៩ ​ដង ឈ្នះ​ ៥៧ ចាញ់​ ១៧ ស្មើ​ ៥ ​ដង ក្នុងនោះ ផ្តួល​ដៃគូ​ឱ្យ​សន្លប់​បាន ​២០ ​ដង ហើយ​អ្នក​ប្រដាល់ គង់ ហូ​វ ធ្លាប់​ប្រកួត​បាន​ ៧៣​ ដង ឈ្នះ​ចំនួន​ ៥៦ ​លើក​ចាញ់​ ១២ ស្មើ ​៥ ​ដង ក្នុង​នោះបាន​ផ្តួល​ដៃគូ​ឱ្យ​សន្លប់​ចំនួន​ ១៣​ ដង​៕

អត្ថបទគួរចាប់អារម្មណ៍