ភ្នំពេញ៖ សហព័ន្ធកីឡាទាញព្រ័ត្រកម្ពុជា បានបើកវគ្គបណ្តុះបណ្តាលជំនាញរៀបចំការប្រកួតកីឡាទាញព្រ័ត្រកមិ្រតមូលដ្ឋាន ដល់សិក្ខាកាមចំនួន ៣១ នាក់ នៅសាលប្រជុំ នៃមន្ទីរអប់រំកាយ និងកីឡា ខេត្តកណ្តាល កាលពីព្រឹកថ្ងៃព្រហស្បតិ៍នេះ ហើយគ្រោងបញ្ចប់នៅថ្ងៃទី ៤ ខែ ធ្នូ ឆ្នាំ ២០២១ នេះ។
នៅក្រោយបញ្ចប់វគ្គបណ្តុះបណ្តាលនេះ សិក្ខាកាមទាំង ៣១ នាក់ នេះ នឹងត្រូវផ្តល់ឱកាសឱ្យចូលរួមរួមអនុវត្តការងារដោយផ្ទាល់ នៅក្នុងការប្រកួតកីឡាទាញព្រ័ត្រជ្រើសរើសជើងឯកថ្នាក់ជាតិ ឆ្នាំ ២០២១ ដែលនឹងត្រូវធ្វើនៅក្រុងតាខ្មៅ ខេត្តកណ្តាល នោះតែម្តង។ នេះបើតាមមន្រ្តីសហព័ន្ធកីឡាទាញព្រ័ត្រកម្ពុជា បានប្រាប់ឱ្យដឹង។
លោក ឯម ហៀង អនុប្រធានសហព័ន្ធកីឡាទាញព្រ័ត្រកម្ពុជា ដែលបានចូលរួមការបើកវគ្គបណ្តុះបណ្តាល តំណាងឱ្យលោកបណ្ឌិត មាស សារិន ជាប្រធានសហព័ន្ធ កាលពីព្រឹកមិញនេះ បាននិយាយថា៖ «វគ្គសិក្សានេះ មានសារសំខាន់ណាស់ សម្រាប់សិក្ខាកាម ព្រោះក្រោយពីបញ្ចប់វគ្គនេះភ្លាមៗ ពួកគាត់ ត្រូវដាក់ឱ្យអនុវត្តជាក់ស្តែង នៅក្នុងការប្រកួតកីឡាទាញព្រ័ត្រជ្រើសរើសជើងឯកថ្នាក់ជាតិ ឆ្នាំ ២០២១ ចាប់ពីថ្ងៃទី ៥ ដល់ថ្ងៃទី ៦ ខែ ធ្នូ ឆ្នាំ ២០២១ នៅខេត្តកណ្តាលនេះតែម្តង»។
លោកបន្តថា ហេតុនេះវាជំរុញឱ្យសិក្ខាកាម ត្រូវយកចិត្តទុកដាក់ ក្នុងការសិក្សាជាមួយលោកគ្រូ អ្នកគ្រូ ដែលមានបទសោធរៀបចំការប្រកួតជាច្រើនឆ្នាំកន្លងមក ខណៈវគ្គបណ្តុះបណ្តាលនេះ មានសិក្ខាកាមចូលរួមចំនួន ៣១ នាក់ (ស្រី ១៦ នាក់) មានមកពីរាជធានីភ្នំពេញ ក្រសួងការពារជាតិ និងមហាផ្ទៃ ព្រមទាំងខេត្តចំនួន ៤ មាន ខេត្តរតនគីរី ខេត្តបាត់ដំបង ខេត្តកណ្តាល និងខេត្តកំពង់ស្ពឺ។
ទាក់ទងនឹងការប្រកួតកីឡាទាញព្រ័ត្រថ្នាក់ជាតិនេះ កញ្ញា មាស តឿ អគ្គហិរញ្ញិក សហព័ន្ធកីឡាទាញព្រ័ត្រកម្ពុជា បានប្រាប់ថា មានសមាគមកីឡាទាញព្រ័ត្រជាច្រើនបានចូលរួមប្រកួតប្រជែង រួមមានសមាគមកីឡាទាញព្រ័ត្រអប់រំ យុវជន និងកីឡាខេត្តកំពត ខេតកែប ខេត្តកណ្ដាល ខេត្តស្វាយរៀង ខេត្តព្រៃវែង ខេត្តបាត់ដំបង សមាគមកីឡាទាញព្រ័ត្របញ្ជាការដ្ឋានកងទ័ពជើងទឹក, រាជធានីភ្នំពេញ សមាគមកីឡាទាញព្រ័ត្រក្រសួងការពារជាតិ និងក្រសួងមហាផ្ទៃ។
ចំណែកលោកស្រី ប្រាក់ សម្ភស្ស ធ្លាប់កាន់តួនាទីជាអគ្គលេខាធិការសហព័ន្ធកីឡាទាញព្រ័ត្រកម្ពុជា ដែលជាគ្រូឧទ្ទេស ក្នុងវគ្គបណ្តុះបណ្តាលនេះ បាននិយាយថា៖ «កីឡាទាញព្រ័ត្រនេះសំខាន់ និងមានសកត្តានុពលល្អ ក្នុងការប្រកួតប្រជែងលក្ខណៈអន្តរជាតិ ហើយកីឡាប្រភេទនេះ មើលមួយភ្លែតថា ស្រួល ប៉ុន្តែបច្ចេកទេសមានច្រើន ពីព្រោះមិនអាចប្រើតែកម្លាំង អត់បច្ចេកទេសបាននោះទេ»៕