The Phnom Penh Post Search

Search form




Logo of Phnom Penh Post newspaper Phnom Penh Post - វី ស​ម្ភ​ស្ស ជឿថា អាច​ផ្តួល គង់ សំបូរ ឱ្យ​សន្លប់ ដើម្បី​សងសឹក​គំនុំ​ចាស់​

វី ស​ម្ភ​ស្ស ជឿថា អាច​ផ្តួល គង់ សំបូរ ឱ្យ​សន្លប់ ដើម្បី​សងសឹក​គំនុំ​ចាស់​

Content image - Phnom Penh Post
គង់ សំបូរ ត្រូវប្រកួត​ជាមួយ វី សម្ភស្ស នៅ​លើសង្វៀន PNN​​។ សហ​ការី

វី ស​ម្ភ​ស្ស ជឿថា អាច​ផ្តួល គង់ សំបូរ ឱ្យ​សន្លប់ ដើម្បី​សងសឹក​គំនុំ​ចាស់​

ភ្នំពេញៈ កីឡាករ​ជម្រើសជាតិ​ប្រដាល់សកល​កម្ពុជា វី ស​ម្ភ​ស្ស ដែល​កំពុងមាន​សមត្ថ​ភាពលេច​ធ្លោ​ខ្លាំង ដោយ​ទទួលបាន​ជ័យជម្នះ​ជា​បន្តបន្ទាប់ ជាពិសេស​ទើបតែ​ឈ្នះ​ជើងឯក​ប្រា​ក់លាន​ប្រដាល់សកល កាលពី​សប្តាហ៍​មុន​នោះ មានការ​ជឿជាក់ថា រូបគេ​អាច​នឹង​ផ្តួល គង់ សំបូរ ឱ្យ​សន្លប់​បាន​វិញ សម្រាប់​ការ​​ជួបគ្នា​ជាថ្មី ក្នុង​កម្មវិធី ONE STRIKE ប្រកួត ​២ ​ទឹក មាន ​១៤ ​នាទី នៅលើ​សង្វៀន PNN នា​ថ្ងៃអាទិត្យ ខាងមុខនេះ​។​

​សម្រាប់​ការប្រកួត​សងសឹក​របស់ វី ស​ម្ភ​ស្ស ទៅលើ គង់ សំបូរ លើក​នេះ ត្រូវបាន​គេ​គិតថា នឹងមាន​ឆាកប្រយុទ្ធ​ល្អ​ផ្តាច់​គូ​ដទៃ ព្រោះ​អ្នក​ទាំង ​២ ​នេះ មាន​ជំនាញ​ពិសេស​ខុសៗ​ពីគ្នា គឺ គង់ សំបូរ មាន​ជំនាញ​ស្នៀត​ទាត់ ឯ វី ស​ម្ភ​ស្ស មាន​ជំនាញ​កណ្តាប់ដៃ​។ ប៉ុន្តែ​ចំពោះ​ប្រវត្តិ​ប្រកួត​វិញ គឺ​ខុសគ្នា​ឆ្ងាយ​ណាស់ ព្រោះ គង់ សំបូរ ប្រកួត​បាន​ខ្ទង់ ​១០០ ​ដង ឯ វី ស​ម្ភ​ស្ស ទើបតែ​បាន​ខ្ទង់​ជាង​ ៣០ ​ដង​ប៉ុណ្ណោះ ហើយ​ក្នុង​ប្រវត្តិ​នេះ គង់ សំបូរ ធ្លាប់​ផ្តួល វី ស​ម្ភ​ស្ស ឱ្យ​សន្លប់​បាន​ម្តង​រួចមកហើយ​។​

​យ៉ាងណាក៏ដោយ មកដល់​បច្ចុប្បន្ននេះ វី ស​ម្ភ​ស្ស មាន​កម្រិត​បច្ចេកទេស​ល្អ​ខ្លាំង បន្ទាប់ពី​រូបគេ បាន​ផ្លាស់ប្តូ​រម​កនៅ​ក្លិប​នាយកដ្ឋានអង្គរក្ស ជាមួយ​លោកគ្រូ​បង្វឹក ស៊ន អេ​លី​ត ហើយ​កំណត់ត្រា​ប្រកួត​មួយរយៈ​ចុងក្រោយ​នេះ វី ស​ម្ភ​ស្ស ឈ្នះ​ចំនួន​៧ ​ប្រកួត​ជាប់​គ្នាៗ ទាំង​ប្រដាល់សកល និង​ប្រដាល់​គុន​ខ្មែរ​។ ចំណែក​ការប្រកួតសងសឹក គង់ សំបូរ លើក​នេះ វី ស​ម្ភ​ស្ស មានការ​ជឿជាក់ថា រូបគេនឹង​អាច​វាយ​ផ្តួល គង់ សំបូរ ​ឱ្យ​សន្លប់​បាន​វិញ​។​

​វី ស​ម្ភ​ស្ស បាន​និយាយថា​៖ «​ខ្ញុំ​ត្រៀម​បានល្អ ដើម្បី​ផ្តួល គង់ សំបូរ ដើម្បី​សងសឹក​ឱ្យបាន​វិញ​។ ការប្រកួត​នេះ គង់ សំបូរ មិនអាច​ឈ្នះ​ខ្ញុំ ដោយ​ផ្តួល​ឱ្យ​សន្លប់​ដូច​មុន​នោះទេ​។ លើក​នេះ នឹង​ស៊ីសង​គ្នា ក្នុង​រយៈពេល ​២ ​ទឹក មាន​ ១៤ ​នាទី គឺ​មិនធម្មតា​ទេ ហើយ​ខ្ញុំ​រំពឹង​ឈ្នះ ​៧០ ​ភាគរយ​ដោយមាន​ជំនឿ​លើ​កណ្តាប់ដៃ​របស់ខ្ញុំ​»​។​

​តែ​ទោះបីជា​យ៉ាងណា គង់ សំបូរ ក៏​មានការ​ជឿជាក់ថា នឹង​អាច​បន្ត​រក្សា​ការ​ឈ្នះ​លើ វី ស​ម្ភ​ស្ស ផងដែរ​។ «​ខ្ញុំ​ធ្លាប់​ប្រកួត​គ្នា​បានតែ​ម្តគ​ត់ នៅ​សង្វៀន CNC កន្លងមក គឺ​ខ្ញុំ​បាន​ប្រកួត​ឈ្នះ​ដោយ​ផ្តួល វី ស​ម្ភ​ស្ស ឱ្យ​សន្លប់​ត្រឹម​ទឹក​ទី​៣ ចំណែក​ការ​​ប្រកួត​លើ​នេះ ខ្ញុំ​គិតថា នឹង​ការពារ​ជ័យជម្នះ​ឱ្យបាន ដោយ​សង្ឃឹម​ឈ្នះ​៧០​ភាគរយ​។​

«​ខ្ញុំ​អាច​ការពារ​ស្នៀត​កណ្តាប់​ដៃ​របស់ វី ស​ម្ភ​ស្ស បាន គឺ​គ្មាន​បញ្ហា​ទេ ចំណែក​ក្បាច់​ជង្គង់ និង​ទាត់ គឺ​ខ្ញុំ​សង្ឃឹមថា មានប្រៀប​ជាង​»​។ នេះ​ជាការ​បញ្ជាក់បន្ថែម​រប​ស់​សិស្សគណ​ក្លិប​គោព្រៃ គង់ សំបូរ ដែល​៣​ប្រកួត​ចុងក្រោយ​កន្លងមកនេះ រូបគេ​បាន​យកឈ្នះ​កីឡាករ អេ​លី​ត ភក្តី ឈ្នះ សោម ពិសិដ្ឋ និង​ឈ្នះ​កីឡាករ សេក គឹម​រួន​។​

​ជាមួយគ្នានេះ គង់ សំបូរ មាន​បទពិសោធ​ប្រកួត​នៅលើ​សង្វៀន​ច្រើនជាង វី ស​ម្ភ​ស្ស​ចំនួន​ ៦៦ ​ដង​ឯណោះ ប៉ុន្តែ​គិត​ត្រឹម​ពេល​​នេះ ក៏​មិនអាច​វាយតម្លៃថា គង់ សំបូរ នឹង​បន្ត​ឈ្នះ វី ស​ម្ភ​ស្ស បាន​នោះដែរ​។ គង់ សំបូរ ធ្លាប់​ប្រកួត​បាន ​១០០ ​ដង ឈ្នះ​ ៦៨ ចាញ់​ ២៩ ស្មើ​ ៣​ ដង ក្នុងនោះ​ផ្តួល​ដៃគូ​ឱ្យ​សន្លប់​បាន​ចំនួន ​២២ ​ដង ចំណែក វី ស​ម្ភ​ស្ស ប្រកួត​បាន​ ៣៤ ​ដង ឈ្នះ ​២១ ចាញ់​ ១១ ​ស្មើ ​២ ​ដង ក្នុងនោះ​ផ្តួល​ដៃគូ​ឱ្យ​សន្លប់​បាន ​១០ ​ដង​៕

អត្ថបទគួរចាប់អារម្មណ៍