ក្រុងវ៉ុលវើរហេមថុន៖ លោក Jurgen Klopp បានលើកឡើងថា កីឡាករ Divock Origi ស័ក្តិសមនឹងមានអ្នកចាត់ការណាម្នាក់ ដែលឱ្យគេលេងបានច្រើនជាងនេះ បន្ទាប់ពីអាចស៊ុតបញ្ចូលទី ក្នុងម៉ោងបន្ថែមបង្គ្រប់ ដែលស្ទើរតែចប់ទៅហើយ ដើម្បីជួយឱ្យក្រុមហង្សក្រហម Liverpool មានជ័យជម្នះ ១-០ នៅទឹកដីរបស់ក្រុម Wolverhampton Wanderers (Wolves) ពីការប្រកួត នៅក្របខ័ណ្ឌ Premier League កាលពីថ្ងៃសៅរ៍។
កីឡាករអន្តរជាតិបែលហ្ស៊ិក Origi ដែលជាញយៗ តែងបង្កើតឱ្យមាននូវភាពឈឺចាប់ដល់ក្រុមគូបដិបក្ខ បានស៊ុតបញ្ចូលទីនូវគ្រាប់បាល់ដ៏លេចធ្លោជាច្រើនដង ក្នុងរយៈពេល ៧ ឆ្នាំមកនេះ គិតតាំងពីមកចូលរួមជាមួយក្រុមហង្សក្រហម តែមិនធ្លាប់បានចូលលេងជាជម្រើសដំបូងជាប់លាប់នោះឡើយ។
ហើយជាមួយគ្នានេះ សូម្បីអ្នកចាត់ការក្រុម Liverpool លោក Klopp កាលពីដើមរដូវកាល បានសម្ដែងនូវការងឿងឆ្ងល់ ចំពោះការមិនមានក្លិបណាចាប់អារម្មណ៍ ក្នុងការស្នើទិញខ្សែប្រយុទ្ធឆ្នើម Origi ទាល់តែសោះ ពេលទីផ្សារដោះដូរកីឡាករកំពុងដំណើរការ។
តែយ៉ាងណា រូបគេ បានបង្ហាញឱ្យឃើញពីតម្លៃរបស់ខ្លួន ក្នុងនាមជាកីឡាករម្នាក់របស់ក្រុម ដោយការដើរចេញពីកៅអីកីឡាករបម្រុង ហើយមកកម្ទេចភាពរឹងត្អឹងរបស់ក្រុម Wolves ក្នុងហ្គេម នៅកីឡដ្ឋាន Molineux បន្ទាប់ពីកីឡាករឆ្នើមៗ ទាំង ៣ រូប នៅជួរមុខ គឺ Mohamed Salah, Sadio Mane និង Diogo Jota មិនអាចបាញ់ (ស៊ុត) ទម្លុះសំណាញ់ទីបាន។
«Divock Origi ដែលជាវីរបុរស បានបញ្ចប់វា (ហ្គេម) ហើយវាគឺប្រវត្តិរឿងរ៉ាវដ៏ពិសេសអស្ចារ្យ នាពេលខាងមុខ។ គេគឺជាខ្សែប្រយុទ្ធដ៏ពិសេសម្នាក់ សម្រាប់ហេតុផលជាច្រើន គេមិនសូវបានលេងញឹកញាប់នោះទេ តែខ្ញុំសង្ឃឺមថា ថ្ងៃណាមួយ គេនឹងរកបានអ្នកចាត់ការណាម្នាក់ ដែលផ្ដល់ឱកាសឱ្យគេលេងបានច្រើនជាងខ្ញុំផ្ដល់ឱ្យ»។ លោក Klopp បានលើកឡើង។
អ្នកចាត់ការសញ្ជាតិអាល្លឺម៉ង់រូបនេះ បានបន្ថែមថា៖ «រូបគេគឺជាអ្នកបញ្ចប់ទីដ៏ល្អបំផុតម្នាក់ ដែលខ្ញុំមិនបានឃើញនោះឡើយ ក្នុងជីវិតរបស់ខ្ញុំ។ ក្នុងក្រុមដ៏ល្អនេះ ដោយមានខ្សែប្រយុទ្ធទាំង ៣ នាំឱ្យរូបគេ មិនបានលេងគ្រប់ពេលនោះឡើយ តែគេជាក្មេងប្រកបដោយភាពវិជ្ជមាន ស្រឡាញ់ក្លិបដោយស្មោះ ចង់មានចំណែករួម ហើយគេបានធ្វើតាមវិធីដ៏ពិសេសអស្ចារ្យមួយ»។
ការបញ្ចប់ទីទាបៗជិតនឹងដីរបស់កីឡាករ Origi ពីការបញ្ចូនបាល់កាត់ចូលមកតំបន់គ្រោះថ្នាក់ បានជួយរុញក្រុម Liverpool ឱ្យទៅនៅពីលើក្រុម Chelsea ដែលធ្លាក់ពីលេខ ១ មកលេខ ៣ ក្រោយពីបានចាញ់ក្រុមម្ចាស់ផ្ទះ West Ham ៣-២ ហើយនៅក្រោមក្រុម Manchester City ដែលឡើងទៅឈរកំពូលតារាង បន្ទាប់ពីយកឈ្នះក្រុម Watford ៣-១ ដល់ផ្ទះ។
«លទ្ធផលរបស់ក្រុមដទៃ ពិតជាមិនសំខាន់នោះឡើយ យើងគ្រាន់តែចង់ឈ្នះការប្រកួតបាល់ទាត់ប៉ុណ្ណោះ។ យើងបានលេង កាលពី ៣ថ្ងៃកន្លងទៅ ហើយការប្រកួត ក្នុងជំនួបរបស់ក្រុមក្នុងក្រុងតែ ១ (ទល់នឹងក្រុម Everton) ជារឿងងាយស្រួលក្នុងការផ្ដោតអារម្មណ៍ ដោយសារវាជាហ្គេមដ៏ល្អប្រចាំឆ្នាំ បន្ទាប់មកយើងចាប់ផ្ដើមបញ្ឆេះម៉ាស៊ីនម្ដងទៀត ហើយខ្ញុំពេញចិត្តចំពោះរបៀប ដែលពួកយើងបានធ្វើ នៅក្នុងការប្រកួតត នាថ្ងៃនេះ»៕ AFP/VN