ភ្នំពេញៈ ក្រុមជម្រើសជាតិកម្ពុជា នឹងប្រើការហ្វឹកហាត់រួមគ្នា ត្រឹមរយៈពេលជាង ១ សប្តាហ៍ ដើម្បីប្រកួតបើកឆាកប្រចាំពូល B នៃពានរង្វាន់ AFF Suzuki Cup 2020 ជាមួយក្រុមជម្រើសជាតិម៉ាឡេស៊ី នៅលើទឹកដីប្រទេស សិង្ហបុរី នារសៀលម៉ោង ៤:៣០ ថ្ងៃចន្ទនេះ គឺមុនពេលក្រុមឡាវ ត្រូវប្រឈមជាមួយក្រុមជើងឯក វៀតណាម ហើយការប្រកួតនេះ មានការផ្សាយបន្តផ្ទាល់ តាមកញ្ចក់ទូរទស្សន៍ហង្សមាស។
បើទោះបីជា ក្រុមធំជម្រើសជាតិកម្ពុជាមិនធ្លាប់មានប្រវត្តិឈ្នះក្រុមម៉ាឡេស៊ី នៅក្នុងការប្រកួតពានរង្វាន់ AFF Suzuki Cup នេះ ហើយវាកាន់តែមានភាពស្មុគ-ស្មាញ ដោយពួកគេ បានប្រមូលផ្តុំហ្វឹកហាត់ បានរយៈពេលខ្លី ហើយថែមទាំង មិនបានប្រកួតមិត្តភាពដកស្រង់បច្ចេកទេស ប៉ុន្តែគ្រូបង្គោលលោក Ryu Hiros នៅតែមានការរំពឹងថា កូនក្រុមរបស់លោក នឹងលេងបានល្អ ពេលជួប ម៉ាឡេស៊ី លើកនេះ។
គ្រូបង្វឹកជនជាតិជប៉ុន លោក Ryu Hiros បាននិយាយ នៅក្នុងសន្និសីទកាសែត កាលពីថ្ងៃសៅរ៍ថា៖ «យើងបានជួបប្រទះការលំបាកជាច្រើន នៅក្នុងអំឡុងពេលមានជំងឺរាតត្បាត ដោយក្រុមនេះ មិនមានការប្រកួតមិត្តភាពទេ ប៉ុន្តែយើងរំពឹងថា កីឡាករទាំងយុវជន និងកីឡាករ ដែលមានបទពិសោធច្រើន ពីការប្រកួតអន្តរជាតិ នឹងបង្ហាញការលេងល្អ និងភាពស៊ីចង្វាក់គ្នាបានល្អ សម្រាប់ការប្រកួតនេះ»។
ចំណែកគ្រូបង្គោលក្រុមជម្រើសជាតិម៉ាឡេស៊ី Tan Cheng Hoe មានការរំពឹងថា ក្រុមរបស់លោក នឹងដណ្តើមបានលទ្ធផលល្អ ពីការប្រកួតនេះ ដើម្បីឱ្យស័ក្តិសមទៅនឹងទំនុកចិត្តរបស់អ្នកគាំទ្រ ដែលមានចំពោះក្រុមនេះ ហើយ ក្រុមម៉ាឡេស៊ីក៏ធ្លាប់មានកំណត់ត្រាឈ្នះក្រុមកម្ពុជា ចំនួន ៣ លើកជាប់ៗគ្នា នៅក្នុងពានរង្វាន់នេះផងដែរ។
លោក Tan Cheng Hoe បាននិយាយថា៖ «អ្នកគាំទ្រ ម៉ាឡេស៊ី ជាច្រើនមានការរំពឹងទុកខ្ពស់ ពីពួកយើង ដូច្នេះសង្ឃឹមថា អ្នកនឹងរីករាយជាមួយការប្រកួតនេះ ជាមួយក្រុមម៉ាឡេស៊ី។ យើងបានប្រមូលផ្តុំ នៅគូឡាឡាំពួមួយរយៈ ហើយក៏មានបញ្ហាខ្លះដែរ ប៉ុន្តែក្រុមទាំងមូល នឹងរក្សាការផ្តោតអារម្មណ៍ និងសុទិដ្ឋិនិយម ក្នុងគ្រប់កាលៈទេសៈទាំងអស់ ហើយព្យាយាមរក្សាលំនឹងក្រុមឱ្យល្អ សម្រាប់ការប្រកួតបើកឆាកនឹងកម្ពុជា»។
យ៉ាងណាក៏ដោយ ការលើកឡើងរបស់លោក Tan Cheng Hoe នៅក្នុងសន្និសីទកាសែត កាលពីថ្ងៃសៅរ៍នោះ គឺខុសគ្នាទៅនឹងអ្វីដែលលោកបានប្រាប់កាសែត New Straits Times នៅមុនពេល ការធ្វើដំណើរមកដល់ប្រទេសសិង្ហបុរីនេះ ដោយគ្រូបង្វឹកក្រុមម៉ាឡេស៊ី រូបនេះ បាននិយាយថា៖ «ការជួបកម្ពុជា មិនងាយស្រួលដូចអ្នកគាំទ្រគិតនោះទេ ព្រោះពួកគេលេងបានល្អណាស់ ក្រោមការដឹកនាំរបស់ គ្រូបង្វឹកជនជាតិជប៉ុន»។
លោក Tan Cheng Hoe បានប្រាប់កាសែត ក្នុងស្រុកដដែលនោះទៀតថា៖«បាល់ទាត់កម្ពុជា កំពុងរីកចម្រើននាពេលថ្មីៗនេះ ហើយ ចាន់ វឌ្ឍនាកា ក៏ជាប់ឈ្មោះឡើងមកដែរ ដែលយើងត្រូវតែយកចិត្តទុកដាក់។ ខ្ញុំមិនចង់ឱ្យកីឡាករ មានទំនុកចិត្តខ្លាំងពេក ក្នុងការប្រកួតបើកឆាកនោះទេ គឺពួកគេត្រូវតែផ្តោតលើការលេងតាមការណែនាំ»។
យោងតាមប្រវត្តិ និងកំណត់ត្រា នៃការជួបគ្នារវាងក្រុមជម្រើសជាតិកម្ពុជា និងម៉ាឡេស៊ី ដែលចេញដោយ សហព័ន្ធកីឡាបាល់ទាត់កម្ពុជា នៅក្នុងពានរង្វាន់ AFF Suzuki Cup នេះ តាំងពីឆ្នាំ ១៩៩៦ មក គឺកម្ពុជា បានចាញ់ក្រុមម៉ាឡេស៊ី សម្រាប់ការប្រកួតទាំង៣លើក គឺបានចាញ់ ៣-០ កាលពីឆ្នាំ ២០០០ រួចបន្តចាញ់ ៣-២ កាលឆ្នាំ ២០១៦ ហើយការជួបគ្នាលើកចុងក្រោយ ក្នុងពាននេះ កាលឆ្នាំ ២០១៨ កម្ពុជា បានបន្តចាញ់ ១-០៕