The Phnom Penh Post Search

Search form




Logo of Phnom Penh Post newspaper Phnom Penh Post - ប្រដាល់សកល ដក​អ្នក​អសកម្ម និង​បញ្ចូល​អ្នកថ្មី ដើម្បី​ពង្រឹងក្បាលម៉ាស៊ីន​ដឹកនាំ​

ប្រដាល់សកល ដក​អ្នក​អសកម្ម និង​បញ្ចូល​អ្នកថ្មី ដើម្បី​ពង្រឹងក្បាលម៉ាស៊ីន​ដឹកនាំ​

Content image - Phnom Penh Post
លោក ច័ន្ទ សុទ្ធ, លោក ពេជ្រ សូផែន លោក ខេស៊ី បាណែត លោកវេជ្ជ​បណ្ឌិត ឆឹង យ៉ៅយ៉េន និង​លោក ប៊ុយ សោភ័ណ្ឌ ​ពេល​​ថត​រូបរួមគ្នាជាមួយ​គណៈកម្មាធិការ​ប្រតិបត្តិ​ថ្មី​របស់សហព័ន្ធ។ រូបថត សហ​ការី

ប្រដាល់សកល ដក​អ្នក​អសកម្ម និង​បញ្ចូល​អ្នកថ្មី ដើម្បី​ពង្រឹងក្បាលម៉ាស៊ីន​ដឹកនាំ​

​ភ្នំពេញៈ សហព័ន្ធ​កីឡា​​ប្រដាល់សកល​កម្ពុជា បានសម្រេច​ដក​គណៈកម្មាធិកា​រ​ប្រតិបត្តិ​អសកម្ម​មួយចំនួន​ចេញ ហើយ​បានដាក់​អ្នកថ្មី​ឱ្យចូល​ជំនួស ដើម្បី​ពង្រឹង​ក្បាល​ម៉ាស៊ីន ដឹកនាំ​សហព័ន្ធ​នេះ សម្រាប់​អាណត្តិ​ថ្មី​ទី​៧ ឆ្នាំ ​២០២១-២០២៥ ប៉ុន្តែ​ប្រធាន​ដឹកនាំ​ចាស់ លោក​សាស្ត្រា​ចា​រ្យ​វេជ្ជបណ្ឌិត ឆឹង យ៉ៅ​យ៉េន នៅតែ​ទទួលបាន​ការគាំទ្រ ១០០​ ភាគរយ ឱ្យ​បន្ត​ធ្វើជា​ប្រធាន​សហព័ន្ធ​ទៀត​។​

«​ក្នុង​អាណត្តិ​ថ្មី​នេះ សហព័ន្ធ​បាន​ផ្លាស់ប្ដូរ​សមាជិក​គណៈ​ក​ម្មា​ធិ​ការប្រតិបត្តិ​អសកម្ម​មួយចំនួន​ចេញ និង​ជ្រើសរើស​បញ្ចូល​សមាជិក​ថ្មី ដើម្បី​ពង្រឹង​ក្បាលម៉ាស៊ីន​សហព័ន្ធ ឱ្យ​កាន់​តែ​រឹងមាំ​ក្នុងការ​ដឹកនាំ និង​ជំរុញ​ការអភិវឌ្ឍ​វិស័យ​កីឡា​ប្រដាល់សកល​របស់​យើង ឱ្យមាន​សក្ដានុពល និង​កាន់តែ​រីក​ចម្រើន​»​។ នេះ​ជាការ​បញ្ជាក់​របស់លោក ប៊ុ​យ សុ​ភ័​ណ្ឌ បន្ទាប់ពី​សហព័ន្ធ​កីឡាប្រដាល់​សកល​កម្ពុជា បានធ្វើ​មហា​សន្និបាត​បញ្ចប់​អាណត្តិ​ចាស់ និង​ជ្រើសរើស​ថ្នាក់ដឹកនាំ​អាណត្តិ​ថ្មី កាលពី​ថ្ងៃ​សុក្រ​។​

​លោក ប៊ុ​យ សុ​ភ័​ណ្ឌ ដែល​ត្រូវបាន​អង្គ​មហាសន្និបាត បោះឆ្នោតឱ្យ​បន្តធ្វើ​ជា​អគ្គ​លេខាធិការ​សហព័ន្ធ​នោះ បាន​បន្ថែមថា​៖ «​ការផ្លាស់ប្តូរ​នេះ ដើម្បី​ត្រៀម​ការប្រកួត​អន្ដរជាតិ​នានា ជាពិសេស​ការប្រកួត​ស៊ី​ហ្គេម ២​ លើក នៅ​ចំពោះមុខ ឱ្យ​ធានាបាន​លទ្ធផល​ល្អ គឺ​ស៊ី​ហ្គេម លើក​ទី​៣១ នៅ​វៀតណាម ឆ្នាំ​ ២០២២ និង​ស៊ី​ហ្គេម លើក​ទី​៣២ ក្នុង​ឆ្នាំ​ ២០២៣ នៅ​កម្ពុជា ដែល​ក្នុង​គោលដៅ យើង​ត្រូវ​ដណ្តើម​ឱ្យបាន​មេដាយមាស​»​។​

​ក្រៅពី​ការគាំទ្រ តាមរយៈ​ការ​បោះឆ្នោតឱ្យ លោក​វេជ្ជបណ្ឌិត ឆឹង យ៉ៅ​យ៉េន បន្ត​ធ្វើជា​ប្រធាន និង​លោក ប៊ុ​យ សុ​ភ័​ណ្ឌ ឱ្យធ្វើជា​អគ្គលេខាធិការ​សហព័ន្ធ ក្នុង​អាណត្តិ​ថ្មី​នេះ អង្គ​មហា​សន្និបាត​របស់​សហព័ន្ធ​កីឡា​ប្រដាល់សកល​កម្ពុជា បាន​គាំ​​ទ្រ​លោក ខេ​ស៊ី បា​ណេ​ត ជា​នាយក​វិទ្យាស្ថាន​ខេ​ម​អេ​ដ ដែលជា​មនុស្ស​សំខាន់​និយម​ចូលចិត្ត​ជួយ​វិស័យ​កីឡា​ជា​​ច្រើន​ប្រភេទនៅ​កម្ពុជា ឱ្យធ្វើជា​អនុប្រធាន​សហព័ន្ធ ជាមួយ​លោក​វេជ្ជបណ្ឌិត មាស វុ​ឌ្ឍី​។​

​ចំណែក​មន្ត្រី​ជើងចាស់​មកពី​សហព័ន្ធ​កីឡាប្រដាល់​គុន​ខ្មែរ ២ ​រូប មាន​លោក ពេជ្រ សូ​ផែន និង​លោក ច័ន្ទ សុទ្ធ ត្រូវ​បានទទួល​ការគាំទ្រ​ឱ្យធ្វើជា​អគ្គលេខាធិការរង​រប​ស់​សហព័ន្ធ ហើយ​លោក សំ ពិសិដ្ឋ ជា​អគ្គ​ហេរញ្ញិក និង​មាន​សមាជិក​ចំនួន ​៤ ​នាក់​ផ្សេងទៀត ជា​សមាជិក​គណៈ​-​ក​ម្មា​ធិ​ការប្រតិបត្តិ របស់​សហ​​ព័ន្ធ​មួយ​នេះ​។​

​លោក​វេជ្ជបណ្ឌិត ឆឹង យ៉ៅ​យ៉េន ដែល​បន្ត​ជាប់​ជា​ប្រធាន​សហ​ព័ន្ធបាន​ថ្លែងថា​៖ «​នៅក្នុង​អាណត្តិ​បន្ត​នេះ ខ្ញុំ​សូម​គាំទ្រ និង​លើកទឹកចិត្ត ចំពោះ​បងប្អូន ព្រមទាំង​សមាជិក​គណៈ​ក​ម្មា​​ធិ​ការប្រតិបត្តិ ពិសេស​លោក​អគ្គលេខាធិកា​រ និង​អត្ត​ព​លិ​ក ត្រូវ​រួមគ្នា​បង្កើត​ព្រឹត្តិការណ៍​ប្រកួត ឱ្យបាន​ច្រើន​បន្ថែមទៀត ទៅលើ​កម្មវិធី​ប្រកួត​របស់​ក្រសួង​អប់រំ យុវជន និង​កីឡា ខណៈ​បញ្ហា​ចម្បង​របស់​យើង គឺ​ការហ្វឹកហាត់ និង​ប្រកួត ដើម្បី​ពង្រឹងសមត្ថភាព ឆ្ពោះទៅ​សម្រេច​គោលដៅ​ក្នុងការ​-​ដណ្ដើម​មេដាយ​ជូន​ជាតិ នៅ​ស៊ី​ហ្គេម ឆ្នាំ ​២០២២ នៅ​វៀត​​ណា​ម និង​ស៊ី​ហ្គេម ឆ្នាំ​២០២៣ ​នៅ​កម្ពុជា​»៕

អត្ថបទគួរចាប់អារម្មណ៍