The Phnom Penh Post Search

Search form




Logo of Phnom Penh Post newspaper Phnom Penh Post - ការ​​ប្រកួត​​កីឡា​ស្ប៉េស្យាល់​អូឡាំពិក​​ថ្នាក់ជាតិ ផ្តល់​ទាំង​ឱកាស និងផលប្រយោជន៍ ដល់​ក្រុម​អត្តពលិក​ខ្សោយ​បញ្ញា​

ការ​​ប្រកួត​​កីឡា​ស្ប៉េស្យាល់​អូឡាំពិក​​ថ្នាក់ជាតិ ផ្តល់​ទាំង​ឱកាស និងផលប្រយោជន៍ ដល់​ក្រុម​អត្តពលិក​ខ្សោយ​បញ្ញា​

Content image - Phnom Penh Post
ក្រុម​អត្តពលិក និង​អាណាព្យាបាល ថត​រូប​ជាមួយ​គណៈអធិបតី នៅ​ក្នុងពិធី​បិទការ​ប្រកួត​កីឡា​ស្ប៉េស្បាល់អូឡាំពិក​ជើង​ឯក​ថ្នាក់ជាតិ ឆ្នាំ​២០២១ កាលពី​ថ្ងៃអាទិត្យ។ រូប សហការី

ការ​​ប្រកួត​​កីឡា​ស្ប៉េស្យាល់​អូឡាំពិក​​ថ្នាក់ជាតិ ផ្តល់​ទាំង​ឱកាស និងផលប្រយោជន៍ ដល់​ក្រុម​អត្តពលិក​ខ្សោយ​បញ្ញា​

ភ្នំពេញ៖ ក្រុម​អត្តពលិកបញ្ញា​ខ្សោយ ​សរុប​ចំនួន​ ១៨០ ​នាក់​ មាន​មក​ពី​រាជធានី​ភ្នំពេញ ​ខេត្ត​កណ្តាល​, សៀមរាប​ តាកែវ ស្វាយរៀង ​បាត់ដំបង​ និង​ខេត្តកំពង់​ធំ បាន​មក​ជុំ​គ្នា កាលពី​ថ្ងៃអាទិត្យ ដើម្បី​​ប្រកួត​ប្រជែង​គ្នា ក្នុង​ព្រឹត្តិការណ៍​កីឡា​ស្ប៉េស្យាល់​អូឡាំពិក​ថ្នាក់​ជាតិ ​ឆ្នាំ​ ២០២១។

សម្រាប់ការ​ប្រកួត ដែល​ត្រូវបាន​ធ្វើ​ឡើង ​នៅ​លើទីលាន​មួយ​កន្លែង ស្ថិតនៅ​ខណ្ឌ​ទួល​គោក​​នេះ ​គឺ​មានការ​​រួម​បញ្ចូល​កម្មវិធី​ត្រួត​ពិនិត្យ​សុខភាព​ និង​កម្មវិធី​អប់​រំ​សុខភាព​ ចំពោះ​កីឡាករ​ កីឡាការិនី​ពិការ​ខ្សោយ​សតិ​បញ្ញា ​ព្រម​ទាំង​ផ្តល់​ជូន​នូវ​ចំណេះ​ដឹង​ជូន​អាណា​ព្យបាល​ ​ក្នុង​គោល​បំណង​ឱ្យ​អត្តពលិក​ នៅ​រាជធានី​ និង​មក​ពី​ខេត្ត​ បាន​ជួប​ជុំ​គ្នា ​ធ្វើ​ការ​ប្រកួត​ប្រជែង​ ដើម្បី​ចែក​រំលែក បទពិសោធ​ក្នុង​ការ​ថែ​ទាំ​អត្តពលិក​ ហើយ​​ក្រុម​អត្តពលិក​​បញ្ញា​ខ្សោយ ក៏​​បាន​ទទួល​ផង​ដែរ​ នូវ​មតិ​យោបល់​ពី​​លោក​វេជ្ជបណ្ឌិត ដោយ​​ធ្វើការ​ណែ​នាំ ​អប់​រំ ​ពី​របៀប​​ថែ​​ទាំ​សុខភាព ​ក្នុង​ជីវភាព​​រស់​នៅ​ប្រចាំ​ ថ្ងៃ​របស់​ពួក​គេ​។​

លោក ​ឃ្លាំង​ ចន្ធូ​ អគ្គ​លេខាធិការ​គណៈកម្មាធិការ​ជាតិ​ស្ប៉េស្យាល់​អូឡាំពិក​កម្ពុជា ​បាន​ប្រាប់​​ថា​ ​វិស័យ​កីឡា​ជន​ពិការ ​ក៏​ត្រូវ​បាន​រាជ​រដ្ឋាភិ​បាល​យក ​ចិត្ត​ទុក​ដាក់​ជំរុញ​លើក​ស្ទួយ​យ៉ាង​សកម្មផងដែរ​។ ​ជា​មួយ​គ្នា​នេះ​ តាម​រយៈ​កីឡា​ជន​ពិការ​បញ្ញា​ខ្សោយ​នេះ​ ​បាន​ចូល​រួម​ចំណែក​យ៉ាង​ធំ​ធេង​ និង​មាន​ផល​ប្រ​យោជន៍​ខ្លាំង ​ធ្វើ​ឱ្យ​​អត្តពលិក​ និង​ក្រុម​គ្រួសារ​កីឡា ​មាន​បញ្ញា​ខ្សោយ ​ទទួល​បាននូវ​​ការ​អប់​រំ​សុខភាព ​និង​លេង​កីឡា​ ដើម្បី​បង្កើន​នូវ​ការ​គិត​​បាន​រហ័ស ​ស្មារតី​ឆ្លាត​វាង​វៃ​ ជាង​ការ​មិន​ទាន់​លេង​កីឡា​​។

លោក​បាន​បន្ត​ថា​៖​«ការ​ប្រកួត​នេះ​ មិន​សំដៅ​ ដើម្បី​ជ័យ​ជម្នះ​​ជា​ចម្បង​នោះ​ទេ ​គឺ​ដើម្បី​មិត្តភាព​សាមគ្គីភាព ​សុខភាព ​និង​បំបាត់​ភាព​រើសអើង​ ក្នុង​សង្គម​ចំពោះ​កីឡា​ជន​បញ្ញា​ខ្សោយ​។​ សកម្មភាព​នេះ ​គឺ​បាន​ចូល​រួម​ក្នុង​សង្គម​តាមរយៈ​វិស័យ​កីឡា​ ស្រប​តាម​ចលនា​កីឡា​ស្ប៉េស្យាល់​អូឡាំពិក​ក្នុង​តំបន់ ​និង​ពិភព​លោក ​ព្រម​ទាំង​ភាព​រីក​ចម្រើន​លើ​គ្រប់វិស័យ​របស់​កម្ពុជា ​នា​ពេល​បច្ចុប្បន្ន និង​តាម​គោល​នយោបាយ​របស់រាជរដ្ឋាភិបាល​ ក្នុងការ​លើក​កម្ពស់​សិទ្ធ​ជន​ពិការ»។​

Content image - Phnom Penh Post

ចំណែក​លោក​ មាស​ សារិន​ អនុ​ប្រធាន​អចិន្ត្រៃយ៍​គណៈ​កម្មាធិការជាតិ​ស្ប៉េស្យាល់អូឡាំពិក​កម្ពុជា​ ដែល​បាន​​អញ្ជើញ​ចូល​រួមក្នុង​​ពិធី​ប្រកួត​កីឡា​ស្ប៉េស្យាល់​អូឡាំពិក​ជ្រើសរើស​ជើង​ឯក​ថ្នាក់ជាតិ​នេះ ​បាន​ថ្លែងថា​៖​«នេះ​ជា​វេទិកា​អប់​រំ​សុខភាព​ និង​កម្មវិធី​ត្រួត​ពិនិត្យ​សុខភាព​ សម្រាប់​ជនបញ្ញា​ខ្សោយ ​នៅ​ទូ​ទាំង​ប្រទេស ​ដែល​ប្រារព្ធ ​នៅ​រាជ​ធានី​​ភ្នំពេញ»។

«គណៈកម្មាធិការ​ស្ប៉េស្យាល់​អូឡាំពិក​កម្ពុជា ​មាន​ការ​ទទួល​ខុស​ត្រូវ ​ជា​ចម្បង​​ក្នុង​ការ​អភិ​វឌ្ឍចលនា​កីឡាជន​បញ្ញា​ខ្សោយ​ ទាំងក្មេង​ ពេញវ័យ​ និង​មនុស្ស​​ចាស់ ​នៅ​ទូទាំង​ប្រទេស​កម្ពុជា ​គឺ​ផ្តោត​សំខាន់ ​ទៅ​លើ​ការ​ហាត់​ហ្វឹកហ្វឺន​ និង​ការ​ប្រកួត​​កីឡា ​ជា​រៀង​រាល់​ឆ្នាំ ​ព្រម​ទាំង​ផ្តល់​ឱកាស​ឱ្យ​​ជន​បញ្ញា​ខ្សោយ​ បាន​ចូល​រួម​សកម្មភាព ​ដើម្បី​ស្តារ​​កាយ​សម្បទា​មាំមួន​ បញ្ញា​ស្មារតី រឹង​មាំ​ និង​មាន​សីលធម៌​ថ្លៃថ្នូរ»​។​

លោក​ មាស សារិន បាន​បន្ថែម​ថា៖​ «​ការ​ប្រកួត​​នេះ យើង​​ជ្រើស​​រើស​​បាន​ក្រុម​កីឡាករ កីឡាការិនី​ឆ្នើមៗ ​ប្រចាំ​ឆ្នាំ ដើម្បី​ត្រៀម​ចូល​រួម​ការ​ប្រកួត​កីឡា​ស្ប៉េស្យាល់​អូឡាំពិក​លក្ខណៈ​អន្តរជាតិ​នានា​ នៅ​ឆ្នាំ​បន្ត​បន្ទាប់​​ទៀត ហើយ​​ផែន​ការយុទ្ធសាស្រ្ត​​បន្ត​របស់​យើង ​គឺ​ការ​​ធ្វើ​សកម្មភាព​​បាន​ល្អ ​តាម​​ខេត្ត​-រាជធានី ជា​គោល​ដៅ​ ដូចជា​ រាជធានី​ភ្នំពេញ​ ខេត្ត​កណ្តាល ​តាកែវ ​ស្វាយរៀង ​កំពត ​កំពង់ស្ពឺ ​ព្រៃវែង ​បាត់ដំបង​ បន្ទាយមានជ័យ ​កំពង់ធំ ​សៀមរាប ​កំពង់ចាម​ និង​និង​ខេត្ត​ព្រះវិហារ។

«ប៉ុន្តែ​ ការ​ពង្រីក​អនុគណៈ​កម្មាធិការ​នេះ ​នៅ​មាន​កម្រិត​នៅ​ឡើយ​ ដោយ​ចលនា​កីឡា​ស្ប៉េស្យាល់​អូឡាំពិក​ភាគច្រើន​ គឺ​ពឹង​ផ្អែក​លើ​ការ​ជួយ​ឧបត្ថម្ភ​មួយ​ផ្នែក​ធំ ​ពី​រាជរដ្ឋាភិបាល​កម្ពុជា​និង​មួយ​ផ្នែក​ទៀត ​ពី​អង្គកា​ដៃ​គូ​ជាតិ ​អន្តរជាតិ ​និង​សប្បុ​រសជន​ទូទៅ ​ព្រម​ទាំង​យោង​តាម​កម្ម​វិធី​របស់​ក្រ​សួង​ផង​ដែរ»​។ លោក មាស សារិន បាន​បញ្ជាក់បន្ថែម៕​

អត្ថបទគួរចាប់អារម្មណ៍