.jpg)
ការប្រកួតកីឡាទាញព្រ័ត្រជើងឯកថ្នាក់ជាតិ ឆ្នាំ ២០២១ ផ្នែកនារី។ រូប យូសុះ អាប់ឌុលរ៉ាស់ហ៊ីម
ភ្នំពេញៈ ក្រុមកីឡាកររបស់សមាគមកីឡាទាញព្រ័ត្រខេត្តកំពត និងក្រុមនារីមកពីខេត្តបាត់ដំបង បានបង្ហាញភាពខ្លាំងរៀងៗខ្លួន នៅក្នុងការប្រកួតជ្រើសរើសជើងឯកថ្នាក់ជាតិ ប្រចាំឆ្នាំ ២០២១ ដោយពួកគេ សុទ្ធតែដណ្តើមបានតំណែងជើងឯក បន្ទាប់ពីបានជម្នះការប្រកួតយ៉ាងស្វិតស្វាញ នៅសាលាគរុកោសល្យ ខេត្តកណ្តាល កាលពីថ្ងៃអាទិត្យ និងថ្ងៃចន្ទ កន្លងមកនេះ។
ជាមួយគ្នានេះ មន្ត្រីជំនាញរបស់សហព័ន្ធកីឡាទាញព្រ័ត្រកម្ពុជាបានអះអាងថា ការប្រកួតកីឡាទាញព្រ័ត្រជ្រើសរើសជើងឯកថ្នាក់ជាតិ ឆ្នាំ ២០២១ នេះ ត្រូវបានធ្វើឡើង ដោយសុក្រឹត និងយុត្តិធម៌ ដើម្បីរកឃើញក្រុមខ្លាំងដ៏ពិតប្រាកដ ត្រៀមឱ្យចូលរួមការប្រកួតអន្តរជាតិ តំណាងឱ្យកម្ពុជា។
អ្នកស្រី ប្រាក់ សម្ផស្ស អគ្គលេខាធិការសហព័ន្ធកីឡាទាញព្រ័ត្រកម្ពុជាបានប្រាប់ ភ្នំពេញ ប៉ុស្តិ៍ថា៖ «ការប្រកួតជើងឯកថ្នាក់ជាតិ ប្រចាំឆ្នាំ ២០២១ នេះ ត្រូវបានធ្វើឡើង ដោយយកចិត្តទុកដាក់ និងប្រឹងប្រែងអស់ពីសមត្ថភាព បច្ចេកទេស និងអនុវត្តបានល្អ នូវស្មារតី សាមគ្គីភាព មិត្តភាព ព្រមទាំងអនុវត្តបានយ៉ាងរលូន នូវគោលការណ៍លេងដោយយុត្តិធម៌»។
អគ្គលេខាធិការរូបនេះ បានបន្ថែមថា៖ «ការប្រកួតថ្នាក់ជាតិនេះ ធ្វើឡើងក្រោមគម្រោងថវិកាគាំទ្ររបស់ក្រសួងអប់រំ យុវជន និងកីឡា ដើម្បីពន្លឿនការអភិវឌ្ឍ ដល់សហព័ន្ធកីឡាជាតិ ហើយតាមការប្រកួត២ថ្ងៃនេះ យើងទទួលបានលទ្ធផលល្អ រលូន និងជោគជ័យ ដោយរកឃើញក្រុមខ្លាំង ដើម្បីត្រៀមការប្រកួតអន្តរជាតិនានា ខណៈកីឡាទាញព្រ័ត្រនេះ មានសក្តានុពលល្អ ក្នុងការប្រកួតប្រជែងជាលក្ខណៈអន្តរជាតិ»។
ការប្រកួតថ្នាក់ជាតិនៅឆ្នាំនេះ មានសមាគមចូលរួម សរុបចំនួន ៩ ក្នុងនោះមានកីឡាករកីឡាការិនី ប្រតិភូ គ្រូបង្វឹក សរុបចំនួន ១០១ នាក់នោះ ហើយដោយមានលោក មាស សារិន ជាប្រធានសហព័ន្ធកីឡាទាញព្រ័ត្រកម្ពុជា គឺការប្រកួតនេះ ក៏ដើម្បីចូលរួមអបអរសាទរ ចំពោះខួបទី៦ នៃ «ល្បែងទាញព្រ័ត្រ» ដាក់ចូលទៅក្នុងបញ្ជីបេតិកភណ្ឌពិភពលោកផងដែរ។
ចំពោះលទ្ធផលនៃការប្រកួតវិញ ត្រូវបានកញ្ញា មាស តឿ ជាអគ្គហេរញ្ញិកសហព័ន្ធ ប្រាប់ថា ការប្រកួតផ្នែកបុរស ៤ នាក់ ទល់ ៤ នាក់ លើទម្ងន់ ៣០០ គីឡូក្រាម ចំណាត់ថ្នាក់លេខ ១ បានក្រុមកីឡាករនៃសមាគមកីឡាទាញព្រ័ត្រខេត្តកំពត លេខ២ សមាគមទាញព្រ័ត្រខេត្តបាត់ដំបង និងលេខ ៣ បានទៅសមាគមទាញព្រ័ត្រខេត្តកណ្តាល។
ចំណែកការប្រកួតផ្នែកនារី ៤ នាក់ ទល់ ៤ នាក់ លើទម្ងន់ ២៥០ គីឡូក្រាម វិញ លេខ ១ បានទៅក្រុមមកពីសមាគមកីឡាទាញព្រ័ត្រខេត្តបាត់ដំបង លេខ ២ បានទៅសមាគមទាញព្រ័ត្រខេត្តស្វាយរៀង និងលេខ ៣ បានទៅលើ សមាគមទាញព្រ័ត្រខេត្តកំពត៕
វីដេអូ៖
