.jpg)
សិក្ខាកាម បានថតជុំគ្នាជាមួយគ្រូឧទ្ទេស និងថ្នាក់ដឹកនាំសហព័ន្ធ នៅក្នុងពិធីបើកវគ្គបណ្តុះបណ្តាល។ រូបថត សហការី
ភ្នំពេញ៖ សហព័ន្ធកីឡាប្រដាល់គុនខ្មែរ ក្រោមកញ្ចប់ថវិកាចំណាយរបស់ក្រសួងអប់រំ យុវជន និងកីឡា បាននឹងកំពុងបើកវគ្គបណ្តុះបណ្តាលអាជ្ញាកណ្តាល ចៅក្រម គុនខ្មែរកម្រិតមធ្យម នៅស្តាតចាស់ ដែលបានចាប់ផ្តើមតាំងពីថ្ងៃទី ៥ ខែធ្នូ ហើយគ្រោងបញ្ចប់ នៅថ្ងៃទី ១០ ខែ ធ្នូ ឆ្នាំ ២០២១ នេះ ប៉ុន្តែគ្រូឧទ្ទេស ២ នាក់ ត្រូវបានគេមើលឃើញថា មិនទាន់មានគុណសម្បត្តិស័ក្តិសម ជាអ្នកចែករំលែកបទពិសោធ និងជាគំរូល្អ សម្រាប់សិក្ខាកាម ដែលបានចូលរួមវគ្គនេះ នៅឡើយទេ។
សម្រាប់វគ្គបណ្តុះបណ្តាលកម្រិតធម្យម ឬកម្រិតទី ២ នេះ បានផ្តល់ជូនទៅអតីតកីឡាករឆ្នើមៗ ជាចៅក្រម កំពុងបំពេញភារកិច្ច នៅតាមសង្វៀនប្រដាល់របស់ស្ថាននីយទូរទស្សន៍ និងជាគរុសិស្សមកពីវិទ្យាស្ថានជាតិអប់រំកាយ និងកីឡា ដែលសុទ្ធតែជាអ្នកមានចំណេះដឹងខាងកីឡាខ្ពង់ខ្ពស់ ដើម្បីឱ្យពួកគេងាយនឹងទទួលបាន នូវចំណេះដឹងថ្មីៗបន្ថែមទៀត។
ជាមួយគ្នានេះ សិក្ខាកាមទាំងអស់ តម្រូវឱ្យមានអាយុ ៣៥ ឆ្នាំចុះ និងមានកាយសម្បទាល្អ ព្រមទាំងមានកម្ពស់ ត្រូវខ្នាតផង ហើយចៅក្រមអាជ្ញាកណ្តាលណា មិនបានឆ្លងកាត់វគ្គបណ្តុះបណ្តាលនេះ មិនអនុញ្ញាតឱ្យទៅបំពេញការងារនោះឡើយ។
លោក តែម ម៉ឺន ប្រធានសហព័ន្ធកីឡាប្រដាល់គុនខ្មែរ បានថ្លែងថា៖ «សិក្ខាកាម ដែលជាអាជ្ញាកណ្ដាល ចៅក្រម ត្រូវមានឆន្ទៈក្នុងការបំពេញការងា នៅលើសង្វៀនប្រកួតជាដាច់ខាន មិនមែនរៀនចប់ហើយ ប៉ុន្មានខែក្រោយមក បែរជាទទួលការពិន័យពីសហព័ន្ធ ដោយការកាត់សេចក្តីមិនត្រូវត្រឹមនោះឡើយ»។
លោកបានបន្ថែមថា៖ «ធនធានសមត្ថភាពអាជ្ញាកណ្តាល ចៅក្រម ដែលបានឆ្លងកាត់វគ្គបណ្តុះបណ្តាលនេះ ត្រូវបានចម្រាញ់ចេញពីចៅក្រមអាជ្ញាកណ្តាលកម្រិត ១ ដែលធ្លាប់បំពេញការងារល្អកន្លងមក និងជាមន្ត្រី ឬគរុសិស្សវិទ្យាស្ថានកីឡា ដែលមានជំនាញខ្ពស់ ហើយអ្នកបានឆ្លងវគ្គកម្រិត ២ នេះ ពេលបញ្ចប់ការសិក្សា នឹងបានទៅបំពេញការងារ នៅតាមស្ថានីយទូរទស្សន៍ តែមិនមែនជាការជួលនោះឡើយ គឺជាការធ្វើដោយស្ម័គ្រចិត្ត»។
តែទោះបីជាយ៉ាងណា វត្តមានគ្រូឧទ្ទេស សម្រាប់ផ្តល់ចំណេះដឹងទៅដល់សិក្ខាកាមចំនួន៣ នាក់ ក្នុងវគ្គនេះ មានលោកសាស្ត្រាចារ្យវេជ្ជបណ្ឌិត ឆឹង យ៉ៅយ៉េន លោក អ៊ិន ខេមរិន្ទ និង លោក មាស សុខគ្រី ត្រូវបានគេមើលឃើញថា គ្មានលក្ខណៈសម្បត្តិ ឬជំនាញគ្រប់គ្រាន់ ដើម្បីបង្រៀនដល់សិក្ខាកាមនោះទេ។
ប្រភពជាច្រើន ដែលចាប់អារម្មណ៍ ចំពោះប្រដាល់គុនខ្មែរ បាននាំគ្នាបញ្ចេញជាមតិយោបលថា វត្តមានលោកបណ្ដិត ឆឹង យ៉ៅយ៉េន ស័ក្តិសមជាគ្រូឧទ្ទេស ព្រោះលោកជាអ្នកស្រាវជ្រាវ ចងក្រងបទបញ្ជាប្រកួត ច្បាប់ប្រកួត ព្រមទាំងមានជំនាញខាងច្បាប់ និងទ្រឹស្តីប្រកួតប៉ុន្តែវត្តមានរបស់លោក អ៊ិន ខេមរិន និង លោក មាស សុខគ្រី ដែលធ្លាប់មានរឿងអាស្រូវច្រើនរាប់មិនអស់ ទាក់ទងនឹងរឿងរ៉ាវ នៅលើសង្វៀនប្រកួតកន្លងមកជាច្រើននោះ ហាក់បីដូចវាមិនស័ក្តិសម យកមកធ្វើជាគ្រូឧទ្ទេស សម្រាប់វគ្គកម្រិតមធ្យម នេះទេ។
ប្រភពមួយចំនួនទៀត មានលើកជាចម្ងល់ថា វត្តមានបញ្ញាវ័ន្តចាស់់ៗ និងថ្មីៗ មួយចំនួនមានបទពិសោធល្អៗ ដូចជាលោក ម៉ិល កាដូ លោក និន ភារម្យ លោក រាជ សុផែន លោក ចាន់សុទ្ធ លោក ប៊ុយ សុភ័ណ្ឌ លោក វ៉ា វណ្ណៈ លោក ឯម ហៀង ដែលមានសមត្ថភាពជំនាញច្បាប់កីឡា និងបទពិសោធល្អនោះ ហេតុអ្វីមិនអញ្ជើញ មកធ្វើជាគ្រូឧទ្ទេស ឬវាគ្មិន សម្រាប់សិក្ខាកាមកម្រិតមធ្យមនេះ? ព្រោះគ្រូឧទ្ទេសមានគុណសម្បត្តិល្អ ទើបជាគំរូល្អដល់សិក្ខាកាម គឺដូចពាក្យចាស់ពាលថា បើពុម្ពវៀច ផលិតផល ចេញមក ក៏វៀចដែរ។
គួររំឭកថា មន្ត្រីបច្ចេកទេសសហព័ន្ធ ដែលបានឆ្លងវគ្គបណ្តុះបណ្តាលកន្លងមក បានប្រាប់ថា គ្រូឧទ្ទេស ដែលបានបង្រៀនពីការផ្តល់ពិន្ទុឱ្យកីឡាករពេលប្រកួត មានលក្ខណៈខុសគ្នា គឺលោកគ្រូ ម៉ិល កាដូ បង្រៀនផ្សេង លោក មាស សុខគ្រី បង្រៀនផ្សឹង ហើយលោក ឆឹង យ៉ៅយ៉េន បង្រៀនផ្សេងទៀត ហេតុនេះនៅពេលដាក់ពិន្ទុពេលប្រកួត ធ្វើឱ្យពួកគាត់វង្វេង គឺភ័យផង ខ្លាចផង ព្រោះកីឡាករមួយចំនួន សុទ្ធតែជាខ្សែរបស់អ្នកនេះ អ្នកនោះ លំបាកដាក់ពិន្ទុណាស់។
បន្ថែមលើនេះ ចៅក្រមអាជ្ញាកណ្តាល ភាគច្រើន ដែលធ្វើការជាក់ស្តែង បានទទួលប្រាក់របបឧបត្ថម្ភ ជាថ្នូរនឹងតម្លៃពល មានចំនួនកម្មតិច ប៉ុន្តែចៅក្រម ឬអាជ្ញាកណ្តាល មានខ្សែ បានលុយច្រើន និងមានឈ្មោះបើកលុយ សឹងគ្រប់សង្វៀន ដោយធ្វើការតែមួយកន្លែងប៉ុណ្ណោះ ហើយបញ្ហានេះ នៅតែកើតមានឡើង នៅក្នុងពិភពប្រដាល់គុនខ្មែរ នាពេលបច្ចុប្បន្ន៕
