ក្រុងប៊ែរឡាំង៖ ខ្សែបម្រើ Jude Bellingham របស់ក្លិប Borussia Dortmund កាលពីថ្ងៃអង្គារ ត្រូវបានពិន័យជាប្រាក់ចំនួន ៤០ ០០០ អឺរ៉ូ ($៤៥ ០០០) តែរួចផុតពីការជាប់បម្រាម បន្ទាប់ពីបានបញ្ចេញមតិយោបល់ ទាំងអារម្មណ៍ខឹងសម្បា ចំពោះអាជ្ញាកណ្តាល ក្រោយក្រុមរបស់ខ្លួន រងបរាជ័យ ៣-២ ក្នុងផ្ទះខ្លួនឯង សម្រាប់ការប្រកួត នៅក្របខ័ណ្ឌ Bundesliga កាលពីចុងសប្តាហ៍កន្លងមក ក្រោមថ្វីជើងរបស់ក្រុម Bayern Munich។
សហព័ន្ធបាល់ទាត់អាល្លឺម៉ង់ (DFB) បានឱ្យដឹងថា សហព័ន្ធ បានពិន័យកីឡាករ Bellingham ចំពោះការប្រព្រឹត្ត (ទង្វើ) មិនសមជាកីឡាករអាជីព ដោយកីឡាករវ័យ ១៨ឆ្នាំ រូបនេះ បានអះអាងថា ការសម្រេចចិត្ត ដែលនាំឱ្យមានការខាតបង់របស់អាជ្ញាកណ្ដាល លោក Felix Zwayer ក្នុងហ្គេម កាលពីថ្ងៃសៅរ៍នោះ ត្រូវបានគេរំពឹងទុកមុន ដោយសារអាជ្ញាកណ្ដាល ធ្លាប់មានពាក់ព័ន្ធនឹងរឿងអាស្រូវរៀបចំលទ្ធផលទុកមុនដ៏អាក្រក់បំផុត ក្នុងប្រវត្តិសាស្ត្ររបស់ប្រទេសអាល្លឺម៉ង់។
ក្នុងសេចក្ដីប្រកាសរបស់ខ្លួន ក្លិប Dortmund បានឱ្យដឹងថា៖ «ក្លិប និងកីឡាករ បានទទួលយកនូវការសម្រេចនេះ ដោយកីឡាករ Jude Bellingham អាចចូលលេង ក្នុងហ្គេម នៅ Bundesliga ទល់នឹងក្រុម VfL Bochum នាថ្ងៃសៅរ៍នេះបាន»។
ខ្សែបម្រើសញ្ជាតិអង់គ្លេស មានការខឹងសម្បាយ៉ាងខ្លាំង នៅពេលលោក Zwayer ប្រគល់បាល់ពិន័យ ១១ ម៉ែត្រ ដោយសារបាល់ប៉ះដៃខ្សែការពារ Mats Hummels របស់ក្រុម Dortmund ដែលនោះ បាននាំឱ្យកើតមាននូវគ្រាប់បាល់ជ័យជម្នះ សម្រាប់ក្រុម Bayern។
សកម្មភាពនៅមុនហ្នឹង លោក Zwayer ធ្វើសញ្ញាឱ្យលេងបន្ត ហើយបដិសេធ ក្នុងការផ្ដល់បាល់ប៉េណាល់ទីឱ្យក្រុម Dortmund បន្ទាប់ពីខ្សែការពារ Lucas Hernandez ទំនងជាបានប្រព្រឹត្តកំហុសចំពោះខ្សែបម្រើប្រយុទ្ធ Marco Reus នៅក្នុងប្រអប់គ្រោះថ្នាក់។
«អ្នកអាចឃើញការសម្រេចជាច្រើន ក្នុងហ្គេមនេះ។ ប្រសិនបើអ្នកឱ្យអាជ្ញាកណ្ដាលម្នាក់ ដែលធ្លាប់មានពាក់ព័ន្ធនឹងការរៀបចំលទ្ធផលទុកមុន នៅមុនមានហ្គេមដ៏ធំបំផុត ក្នុងប្រទេសអាល្លឺម៉ង់ តើអ្នករំពឹងថា អ្វីនឹងកើតឡើង»។ នេះជាសម្ដីរបស់កីឡាករ Bellingham ដែលនិយាយទៅកាន់ប៉ុស្តិ៍ទូរទស្សន៍ Viaplay របស់ន័រវែស។
រូបគេកំពុងនិយាយសម្ដៅដល់តួនាទី ដែលត្រូវបានចោទប្រកាន់របស់លោក Zwayer ក្នុងនាមជាអាជ្ញាកណ្ដាលខ្សែបន្ទាត់វ័យ ២៣ ឆ្នាំម្នាក់ នៅក្នុងរឿងអាស្រូវ ដែលមានពាក់ព័ន្ធជាមួយនឹងអាជ្ញាកណ្ដាលលើទីលាន លោក Robert Hoyzer កន្លងមក។
លោក Hoyzer បានសារភាពពីការទទួលបា្រក់ពីពួកម៉ាហ្វៀក្រូអាស៊ី ជាថ្នូរឱ្យធ្វើការកែប្រែលទ្ធផល នៃការប្រកួត ក្នុងកម្មវិធី German Cup និងហ្គេមរបស់លីគទាបៗ ដោយក្នុងរួមទាំងការផ្ដល់បាល់ប៉េណាល់ទីពីការប្រព្រឹត្តិកំហុស ដែលមិនទំនងនឹងពិន័យនោះឡើយ។
លោក Hoyzer ត្រូវកាត់ទោសឱ្យជាប់ពន្ធនាគារ ហើយលោក Zwayer ត្រូវពិន័យចំនួន ៦ ខែ ពីបទនៅស្ងៀមមិនព្រមរាយការណ៍ បើទោះជាគាត់ដឹងពីអ្វី ដែលអាជ្ញាកណ្ដាលនៅលើទីលានរូបនោះកំពុងធ្វចើនាពេលនោះ និងពីបទទួលប្រាក់ ៣០០ អឺរ៉ូ ($៣៤០)៕ AFP/VN