ភ្នំពេញៈ កីឡាករ​ជើង​ខ្លាំង​វ័យ​ក្មេងជំនាន់ក្រោយ ពេជ្រ ប៊ុនសិដ្ឋ របស់​ក្លិប​ចលនា​យុវជន​ ១៥៧ ត្រូវបាន​ដាក់ឱ្យ​ប្រកួត​កម្មវិធី ONESTRIKE ចំនួន​ ២ ​ទឹក (១ ​ទឹក​មាន​ ៧ ​នាទី​) ជាមួយ​កីឡាករ​ជ​ជើង​ខ្លាំង​ជម្រើសជាតិ​ក្នុង​ប្រភេទ​ទម្ងន់​ ៥៤ ​គីឡូក្រាម ខាំ ខ្លានាង នៅ​សង្វៀន PNN នា​រសៀល​ថ្ងៃអាទិត្យ​ខាងមុខ​។

វត្តមាន​របស់​កីឡាករ​វ័យក្មេង ទម្ងន់​ស្រាល​ទាំង​ ២ ​នេះ​ត្រូវបាន​គេ​មើលឃើញថា មាន​របៀប និង​ល្បិច​ប្រកួត​ទាក់ទាញ​បំផុត ព្រមទាំង​មាន​ការចាប់អារម្មណ៍​ខ្លាំង ពី​សំណាក់​អ្នកទស្សនា ហើយ​វា​ជា​លើក​ទី​ ១ ហើយ ដែល ពេជ្រ ប៊ុនសិដ្ឋ សុំ​សាកល្បង​ក្បាច់គុន​ជាមួយ​ជើងខ្លាំង ខាំ ខ្លានាង ប៉ុន្តែ​ប្រភពពី​អ្នកទស្សនា​ភាគច្រើន​គេ​មានជំនឿ​ថា ពេជ្រ ប៊ុនសិដ្ឋ មាន​ភាគរយ​តិច​ណាស់ ដែល​អាច​យកឈ្នះ​ទៅលើ​កីឡាករ​ល្បីល្បាញ មាឌ​ល្អិត​ចិត្តខ្លាំង ខាំ ខ្លានាង​។

តាមរយៈ​ការប្រកួត​ជាក់ស្តែង​នៅលើ​សង្វៀន​ប្រដាល់ ពេលបច្ចុប្បន្ន ខាំ ខ្លានាង និង ពេជ្រ ប៊ុនសិដ្ឋ មាន​លក្ខណៈ​វាយ​សម្រុក​មិនចេះ​បន្ធូរដៃ​ដូចគ្នា ហើយ​ទឹកចិត្ត​ប្រកួត គ្មាន​ចំណាយពេល​ស្ទាបស្តង់ ឬ​អូសបន្លាយ​ពេលវេលា​ឱ្យ​យូរ​នោះឡើយ ហេតុនេះ​ទីផ្សារ​ប្រកួត​របស់​ពួកគេ​ពេញនិយម​ខ្លាំងណាស់ ព្រោះ​សឹងតែ​គ្រប់​សង្វៀន​ប្រដាល់ ត្រូវការ​ពួកគេ ដោយសារ​តែ​ការប្រកួត​មាន​ប្រិយភាព​ខ្លាំង​។

ខាំ ខ្លានាង បច្ចុប្បន្ន ដែល​ទើប​ផ្លាស់​មក​នៅ​ក្លិប​ប៉ែន​កាក់​គុន​ខ្មែរ​នោះ មាន​អាយុ​ ២៤ ​ឆ្នាំ​កម្ពស់​ ១,៦៤ ​ម៉ែត្រ ធ្លាប់​ប្រកួត​បាន​ ៩៦ ​ដង ឈ្នះ​ ៧៥ ចាញ់​ ១៩ ស្មើ​ ២ ​ដង ក្នុងនោះ​ផ្តួល​ដៃគូ​ឱ្យ​សន្លប់​បាន​ ២២ ​ដង​។ ចំណែក ពេជ្រ ប៊ុនសិដ្ឋ មាន​អាយុ​ ២១ ​ឆ្នាំ កម្ពស់​ ១,៦៣ ​ម៉ែត្រ ធ្លាប់​ប្រកួត​បាន​ ៦០ ​ដង ឈ្នះ​ ៤០ ​ដង ចាញ់​ ១០ ស្មើ​ ១០ ​ដង និង​ធ្លាប់​ផ្តួល​ដៃគូ​ឱ្យ​សន្លប់​បាន​ ៩ ​ដង​។

សម្រាប់​ការប្រកួត​នេះ ខាំ ខ្លានាង បាន​ហ្វឹកហាត់​ត្រៀម​ជាមួយ បឺត ខាំ និង សេន ប៊ុនថេន យ៉ាង​ល្អ​។ ខាំ ខ្លានាង និយាយថា​៖ «​សម្រាប់​ជំនួប​នេះ ខ្ញុំ​ធានា​ឈ្នះ​បាន ព្រោះ​ខ្ញុំ​គិតថា ក្បាច់​របស់ ប៊ុនសិដ្ឋ មិនជា​បញ្ហាលំបាក​ទប់ទល់​ទេ​»​។

«​តែ​ទោះបីជា​យ៉ាង យើង​ក៏​មិន​ងាយ​នឹង​យកឈ្នះ​បាន​ស្រួលៗ​នោះដែរ គឺ​និយាយ​ទៅ ខ្ញុំ​ការពារ​ឱ្យបាន​ច្រើន ព្រោះ​កណ្តាប់ដៃ​របស់គេ​ធ្ងន់​ដែរ​»​។ ខាំ ខ្លានាង បាន​បញ្ជាក់ថា​៖ «​ខ្ញុំ​មាន​ទំនុកចិត្ត​ឈ្នះ​ ១០០ ​ភាគរយ​តែម្តង គឺ​មិនអាច​ចាញ់​បានទេ គឺ​លើកលែងតែ​ករណី​ភ្លាត់ស្នៀត​ណាមួយ ដោយ​ចៃដន្យ​ប៉ុណ្ណោះ​»​។ ខាំ ខ្លានាង បានបញ្ជាក់​បន្ថែម​។

ចំណែក ពេជ្រ ប៊ុនសិដ្ឋ បាន​និយាយថា​៖ «​ខ្ញុំ​ចង់​ប្រកួត​ជាមួយ​គាត់ ដើម្បី​ឱ្យដឹងថា តើ​សមត្ថភាព​ខ្ញុំ​អាចឈាន​ទៅបាន​ល្អ​ជាង​សព្វថ្ងៃនេះ​ទេ​? នៅក្នុង​ទម្ងន់​ ៥៤ ​គីឡូ​ក្រុម​នេះ ខ្ញុំ​ធ្លាប់​ជួប​អស់ហើយ គឺ​នៅតែ ខាំ ខ្លានាង នេះ​ទេ ហេតុនេះ​ខ្ញុំ​ចង់​ប្រកួត​ជាមួយ​គាត់​ណាស់ ហើយដោយ​សារ កម្មវិធី​គូឯក ONESTRIKE នេះ​មាន​ ២ ​ទឹក ស្មើនឹង​ ១៤ ​នាទី គឺ​ខុសពី​គុនខ្មែរ អ៊ីចឹង​បើ​ខ្ញុំ​រក្សា​កម្លាំង​បាន គឺអាច​ស៊ី​នៅ​ចុង​ទឹកបាន​»​។

ចំណែក​លោក ពេជ្រ សុផាន់ ជា​គ្រូបង្វឹក ប៊ុនសិដ្ឋ បាន​និយាយថា​៖ «​ខ្ញុំ​មានជំនឿថា ពេជ្រ ប៊ុនសិដ្ឋ នឹង​ឈ្នះ ព្រោះ​បើ​វា​មិនល្អ ខ្ញុំ​មិន​ដាក់ចូល​ឱ្យ​ប្រកួត​ទេ​។ ខ្ញុំ​សង្ឃឹម​ ៧០ ​ភាគរយ ហើយ​ការចាញ់ ឬ​ឈ្នះ មិនទាន់​អាចនិយាយបាន​ទេ ប៉ុន្តែ​ភាគច្រើន​គឺ​ស្មើ ព្រោះ​ការប្រកួត​នេះ អ្នកឈ្នះ​បាន លុះត្រា​តែ​ផ្តួល​ដៃគូ​ឱ្យ​សន្លប់ មិនមែន​ឈ្នះ​ពិន្ទុ​ឡើយ​»៕