ភ្នំពេញៈ កម្មវិធី «គុណតម្លៃអូឡាំពិក» ដែលសហការរៀបចំដោយ គណៈកម្មាធិការជាតិអូឡាំពិកកម្ពុជា (NOCC) និងអង្គការសាមគ្គីអូឡាំពិកអន្តរជាតិ (OS) បានផ្តល់ជូនដល់វិទ្យាល័យចំនួន ២ គឺវិទ្យាល័យ ហ៊ុន សែន ល័យចំការដូង និងវិទ្យាល័យប៊ុនរ៉ានីហ៊ុនសែនចរិយាវង្ស នៅក្រុងកែប ខេត្តកែប រយៈពេល ២ ថ្ងៃ ដោយភ្ជាប់ជាមួយប្រភេទកីឡាទ្រីយ៉ាត្លុង ដែលកំពុងហ្វឹកហាត់បោះជំរំនៅទីនោះស្រាប់តែម្តង ហើយក៏បានបូកបញ្ជូលការផ្សព្វផ្សាយជាមួយសកម្មភាពរបស់ CAMSOC ក្នុងគោលដៅឱ្យមហាជនជ្រាប ពីកីឡាស៊ីហ្គេម ឆ្នាំ ២០២៣ ផងដែរ។
លោក ប៊ុយ សុភ័ណ្ឌ អ្នកគ្រប់គ្រងបេសកកម្មនៃកម្មវិធីនេះ បានប្រាប់ថា កម្មវិធីនេះ ផ្តួចផ្តើមដោយ NOCC និង OS ជាផ្នែកមួយរបស់គណៈកម្មាធិការអូឡាំពិកអន្តរជាតិ (IOC) ដែលផ្តោតទៅលើការអប់រំ បណ្តុះបណ្តាល ការលេងកីឡា និងការស្វែងយល់ពីកីឡា ព្រមទាំងជាកម្មវិធីបញ្ចូលចលនាការផ្សព្វផ្សាយជូនមហាជន ពិសេសសិស្សនៅតាមវិទ្យាល័យនេះតែម្តង។
លោកបន្ថែមថា៖ «បេសកកម្មនេះ យើងបានផ្តល់ជូនវិទ្យាល័យហ៊ុនសែនចំការដូង ដែលមានសិស្សជាង ៥០ នាក់ នៅថ្ងៃទី ៩ ខែធ្នូ ហើយថ្ងៃទី ១០ យើងផ្តល់ជូនវិទ្យាល័យប៊ុនរ៉ានីហ៊ុនសែនចរិយាវង្ស ដែលមានសិក្ខាកាមជាសិស្សជាង ៥០ នាក់ បន្ថែមលើនេះ មានសកម្មភាពលេងកីឡា ជាលក្ខណៈមហាជនបើកទូលាយ នៅលើទីលានជាក់ស្តែងដែរ»។
ចំណែកលោក វ៉ាត់ ចំរើន អគ្គលេខាធិការ NOCC បានប្រាប់ពីថ្ងៃព្រហស្បតិ៍ថា៖ «កម្មវិធីនេះ ជាចលនាអូឡាំពិក ដែល NOCC បានសហការជាមួយ OS ធ្វើសកម្មភាពជារៀងរាល់ចុងឆ្នាំ ហើយស្របពេលដែលកម្ពុជា មានបេសកកម្មផ្សព្វផ្សាយពីគោលនយោបាយកីឡាឆ្ពោះទៅស៊ីហ្គេម លើកទី៣២ ឆ្នាំ ២០២៣ នោះ គឺយើងបានដាក់បញ្ជូលគោលដៅ ដែលរាជរដ្ឋាភិបាលបានសម្រេចថា ប្រជាពលរដ្ឋម្នាក់ គប្បីលេងកីឡាឱ្យបាន ១ មុខ ឬ ១ ប្រភេទ»៕