ភ្នំពេញ៖ ការប្រកួតកីឡាទ្រីយ៉ាត្លុងថ្នាក់ជាតិ ឆ្នាំ ២០២១ បានចាប់ផ្តើម កាលពីថ្ងៃអាទិត្យ ដោយមានការចូលរួម និងគាំទ្រខ្លាំងពីលោក សោម ពិសិដ្ឋ អភិបាលខេត្តកែប ស្របពេលដែលភូមិសាស្ត្រខេត្តកែប ស័ក្តិសមទៅនឹងប្រភេទកីឡានេះ ហើយគណៈកម្មការរៀបចំប្រកួតកីឡាស៊ីហ្គេម លើកទី ៣២ ឆ្នាំ២០២៣ (CAMSOC) ក៏បានសម្រេចជ្រើសរើសយកទីតាំងខេត្តកែបនេះផងដែរ។
ការប្រកួតកីឡាទ្រីយ៉ាត្លុងថ្នាក់ជាតិ ឆ្នាំ ២០២១នេះ មានសារសំខាន់ណាស់ ព្រោះដើម្បីពង្រឹងសមត្ថភាពដល់អត្តពលិក សម្រាប់ត្រៀមការប្រកួតស៊ីហ្គេម ឆ្នាំ២០២២ នៅវៀតណាម និងស៊ីហ្គេម ឆ្នាំ២០២៣ នៅកម្ពុជា។ អ្វីដែលប្លែក ក្នុងឆ្នាំនេះ គឺមានការហ្វឹកហាត់បោះជំរំ និងសិក្ខាសាលាផង មុននឹងប្រកួតថ្នាក់ជាតិនេះ។ នេះបើតាមការអះអាងរបស់លោក ងិន សុបញ្ញា។
អគ្គលេខាធិការសហព័ន្ធកីឡាទ្រីយ៉ាត្លុងកម្ពុជា រូបនេះ បានបន្តថា៖ «មុននឹងបើកជាផ្លូវការ ការប្រកួតថ្នាក់ជាតិនេះ គឺកាលពីថ្ងៃ ១០និងទី ១១ ខែធ្នូ ឆ្នាំ២០២១ យើងបានរៀបចំការប្រកួតថ្នាក់ជាតិកីឡាឌូអាត្លុង ផងដែរ ចំណែកលទ្ធផលគឺ ក្រសួងមហាផ្ទៃ ប្រជែងបានចំណាត់ថ្នាក់លេខ១»។
គួរបញ្ជាក់ថា សហព័ន្ធកីឡាទ្រីយ៉ាត្លុងកម្ពុជា ទើបបានបោះជំរំហ្វឹកហាត់ដល់ក្រុមជម្រើសជាតិរបស់ខ្លួន នៅខេត្តកែបនេះ ដោយមានគ្រូឧទ្ទេសជនជាតិអ៊ីតាលី លោក Francisco ជាអ្នកបង្រៀនតាមប្រព័ន្ធអនឡាញ ហើយមានគ្រូបង្វឹកលោក Derrick Murray ជនជាតិនូវែលសេឡង់ ជាគ្រូបង្ហាត់ផ្ទាល់ ជាមួយគ្រូជម្រើសជាតិទ្រីយ៉ាត្លុងកម្ពុជា លោក ចេង ចាន់ដារ៉ា ដើម្បីបង្កើនសមត្ថភាពអត្តពលិក មុនការប្រកួតថ្នាក់ជាតិនេះ។
លោក ងិន សុបញ្ញា បញ្ជាក់ថា៖ «ការពុះពាររបស់សហព័ន្ធ គឺចង់ផលិតធនធានអត្តពលិកឱ្យខ្លាំង ដែលមានស្ដង់ដារ និងអាចប្រកួតប្រជែងបានលទ្ធផលល្អ។ សកម្មភាព ដែលធ្វើឡើងនេះ គឺទទួលបានការគាំទ្រពីគណៈកម្មាធិការជាតិអូឡាំពិកកម្ពុជា (NOCC) ក្រសួងអប់រំ យុវជន និងកីឡា ព្រមទាំងអង្គការសាមគ្គីអូឡាំពិក (OS)»។
ចំពោះអត្តពលិក ដែលចូលរួមប្រកួតប្រជែងថ្នាក់ជាតិ នៅឆ្នាំនេះ មានមកពី ១០ សមាគម និងក្លិប ដោយមានអត្តពលិកចំនួន២៥នាក់ ក្នុងនោះមានកីឡាករ ១៨ នាក់ និងកីឡាការិនី ៧ នាក់ ហើយពួកគេ ត្រូវប្រកួតគ្នា នៅលើវិញ្ញាសាចំនួន ៤។
ចំណែកលោក សោម ពិសិដ្ឋ អភិបាលខេត្តកែប និងជាអនុប្រធាន CAMSOC បានប្រាប់ថា៖ «ខ្ញុំសប្បាយចិត្តខ្លាំងណាស់ ដែលវត្តមានរបស់កីឡាមួយចំនួន បានប្រកួត នៅលើទឹកដីខេត្តកែបរបស់យើង ជាពិសេសកីឡាទ្រីយ៉ាត្លុងនេះ ដោយមានវត្តមាន និងសកម្មភាពយូរហើយ នៅលើទឹកដីកែប ដែលខ្ញុំពេញចិត្ត និងគាំទ្រយ៉ាងសកម្ម»។
លោកបានបន្ថែមថា៖ «កាលខ្ញុំ នៅជាអភិបាលរងខេត្ត ចំនួន ២អាណត្តិ គឺខ្ញុំទទួលបន្ទុកផ្នែកកីឡា ដូច្នេះខ្ញុំនិយមចូលចិត្ត និងស្រឡាញ់វិស័យនេះណាស់ ហេតុនេះក្នុងមានខ្ញុំអាជ្ញាធរ និងជាអនុប្រធាន CAMSOC ផង ខ្ញុំនឹងសហការជាមួយ NOCC និងក្រសួងអប់រំ ជាពិសេសសហព័ន្ធកីឡាទ្រីយ៉ាត្លុងនេះតែម្តង ដើម្បីធ្វើយ៉ាងណាឱ្យព្រឹត្តិការណ៍កីឡាស៊ីហ្គេម នៅកម្ពុជា ទទួលបានលទ្ធផលល្អជូនជាតិ»៕