ភ្នំពេញៈ ការសន្លប់ធំរបស់កីឡាករជើងខ្លាំងជម្រើសជាតិ ខាំ ខ្លានាង ក្រោមកណ្តាប់ដៃអ្នកប្រដាល់ឆ្នើមវ័យក្មេង ពេជ្រ ប៊ុនសិដ្ឋ មកពីក្លិបចលនាយុវជន ១៥៧ នៅសង្វៀន PNN កាលពីថ្ងៃអាទិត្យ បានធ្វើឱ្យមហាជនអ្នកនិយមទស្សនាប្រដាល់សម្តែងការភ្ញាក់ផ្អើលខ្លាំង និងស្ទើរមិនចង់ជឿ ដែល ប៊ុនសិដ្ឋ អាចផ្តួល ខ្លានាង ឱ្យសន្លប់យ៉ាងគ្រាំគ្រា ត្រឹមទឹកទី១។
ប៉ុន្តែការបរាជ័យយ៉ាងធ្ងន់ធ្ងរនេះ វាជាការពិត ហើយសាមីខ្លួន ខាំ ខ្លានាង ក៏បានទទួលស្គាល់ដែរថា កណ្តាប់ដៃធ្ងន់របស់ ពេជ្រ ប៊ុនសិដ្ឋ ពិតជាអស្ចារ្យ ដែលវាយចេញលឿនរហ័សបំផុត គេចមិនទាន់ធ្វើឱ្យសន្លប់ភ្លាមៗតែម្តង ខណៈប្រវត្តិប្រកួតរបស់ ខាំ ខ្លានាង មិនធ្លាប់មានកីឡាករខ្មែរណាវ៉ៃឱ្យសន្លប់ក្នុងទឹកទី១ បែបនេះនោះទេ។
នៅក្នុងគម្រោងប្រកួតត្រៀមចំនួន ២ ទឹក ចំនួន ១៤ នាទី ដណ្តើមប្រាក់លានដ៏ស្រួចស្រាល់ក្នុងកម្មវិធីគូឯកប្រចាំសប្តាហ៍ ដែលរំពឹងថា នឹងស្វិតស្វាញជក់ចិត្តនោះ គឺអ្វីដែលស្មានមិនដល់ បានកើតឡើង ដោយ ខ្លានាង តស៊ូនឹង ប៊ុនសិដ្ឋ បានត្រឹមតែ ១ ទឹកប៉ុណ្ណោះ ដោយអាជ្ញាកណ្តាលរាប់ចំនួន ៨ ដល់ទៅ ២ លើក និងឈានទៅបញ្ចប់ការប្រកួតដោយសន្លប់ងើបលែងរួចតែម្តង ក្រោមកណ្តាប់ដៃធ្ងន់ផ្ទួនៗ។
ខាំ ខ្លានាង បាននិយាយក្រោយប្រកួតថា៖ «ខ្ញុំទទួលស្គាល់ថា កណ្តាប់ដៃរបស់ ពេជ្រ ប៊ុនសិដ្ឋ ពិតជាធ្វើឱ្យខ្ញុំទ្រាំមិនបាន ហើយក៏ជាការចាញ់ដោយអស់ចិត្ត មិនទាន់ហ៊ានថា ពេលណាសុំសងសឹកនៅឡើយ។ លទ្ធផលនេះ គឺវាផ្ទុយទៅនឹងការតាំងចិត្តនៅមុនប្រកួត ប៉ុន្តែជាក់ស្តែង គឺស្មានមិនដល់ថា ចាញ់ដោយសន្លប់ធ្ងន់បែបនេះទេ»។
នៅពេលសួរថា តើចំណុចខ្សោយអ្វីខ្លះ ដែលនាំឱ្យគេចាញ់ធ្ងន់ធ្ងរបែបនេះ? ខាំ ខ្លានាង បានឆ្លើយតបថា៖ «ខ្ញុំជាកីឡាករជម្រើសជាតិគុនខ្មែរ នៅក្នុងប្រភេទទម្ងន់ ៥១ គីឡូក្រាម គឺខ្ញុំវាយឈ្នះសឹងតែរកគូប្រកួតក្នុងស្រុកមិនបាន ប៉ុន្តែមួយរយៈនេះ ខ្ញុំប្រឹងដំឡើងទម្ងន់ មកប្រកួតក្នុងប្រភេទទម្ងន់ ៥៤ គីឡូក្រាម គឺទទួលលទ្ធផលបរាជ័យគួរឱ្យខ្មាសគេណាស់»។
«មួយរយៈ ដែលខ្ញុំមានឱកាសបានឡើងប្រកួត ក្នុងទម្ងន់ធ្ងន់ជាងមុន គឺខ្ញុំធ្វើមិនបានល្អសោះ ដោយចាញ់ប្រៀបផ្នែកកម្លាំងគេទៀតផង។ ខ្ញុំចាញ់ចំនួន ៣ ប្រកួត ពិតជាសោកស្តាយគឺចាញ់អស់ចិត្តដូចជាចាញ់ សែន រ៉ាដេត និង ចាញ់ កាន់ ម៉េងហុង ត្រឹមពិន្ទុ ប៉ុន្តែការចាញ់ ពេជ្រ ប៊ុនសិដ្ឋ នេះ គឺសន្លប់ធំតែម្តង។ តែទោះជាយ៉ាងណា ខ្ញុំត្រូវខំហាត់បន្ត ដើម្បីប្រកួតយកឈ្នះដៃគូស្តារមុខមាត់ឡើងវិញ ដោយមិនទាន់ហ៊ានចាប់គូប្រកួតភ្លាមៗនោះទេ គឺខំហាត់ឱ្យខ្លាំងសិន»។
ចំណែកលោក ពេជ្រ សុផាន់ គ្រូបង្វឹក ពេជ្រ ប៊ុនសិដ្ឋ បាននិយាយថា៖«ដូចខ្ញុំរំពឹងតាំងពីមុនប្រកួតមកអ៊ីចឹង គឺ ប៊ុនសិដ្ឋ កណ្តាប់ដៃរហ័ស លឿន និងធ្ងន់ ហើយមានចិត្តមោះមុតក្លាហានណាស់ ដោយមានកីឡាករជើងចាស់ និងជើងថ្មីមួយចំនួន បានចាញ់ក្រោមកណ្តាប់ដៃរបស់គេច្រើនមកហើយ។ សមត្ថភាពរបស់ ពេជ្រ ប៊ុនសិដ្ឋ ក្នុងទម្ងន់ ៥៤ គីឡូក្រាម ឆ្នាំ ២០២២ ខាងមុខនេះ ខ្ញុំមានបំណងឱ្យដាក់ចូលប្រកួតប្រជែងជើងឯកជាតិ ប្រចាំឆ្នាំដើម្បីមានចំណាត់ថ្នាក់ល្អ អាចចូលក្រុមជម្រើសជាតិបាន»៕