.jpg)
ឯម សុធី ពេលឡើងទទួលប្រាក់រង្វាន់ តែ វ៉ាន់ វឿន មានអ្នកឡើងយកជំនួស។សហការី
ភ្នំពេញៈ អ្នកប្រដាល់ ឯម សុធី ដែលរំពឹងឈ្នះតិចបំផុត តាំងពីមុនពេលប្រកួតនោះ បែរជាអាចបង្កើតបាននូវរឿងដែលគ្រប់គ្នាស្ទើរតែមិនចង់ជឿ ខណៈកីឡាករមានរហ័ស្សនាម «មនុស្សយន្ត» រូបនេះ បានប្រាក់ពេលមិនដល់ ២ ទឹកពេញ ដើម្បីទាត់ឱ្យអ្នកប្រដាល់សកលជម្រើសជាតិ ទូច ដេវីត និងអ្នកលេងកាំភ្លើងភ្លោះ វ៉ាន់ វឿន ខូចជើងក្រោមដូចគ្នា ដើម្បីឈ្នះប្រាក់លានជាលើកដំបូង នៅលើសង្វៀនថោននោះ។
ផ្ទុយពីនេះ ជើងខ្លាំង ឈុត សេរីវ៉ាន់ថង ដែលបានតាំងចិត្តខ្ពស់ បែរជាជួបស៊យធំ ដោយប្រកួតខុសបច្ចេកទេស នៅវគ្គជម្រុះ ៣ ទឹក នាំឱ្យបាត់បង់ឱកាសឈ្នះ ដោយគណៈកម្មការប្រកួតបានពិន័យឱ្យចាញ់ វ៉ាន់ វឿន ដោយស្វ័យប្រវត្តិ ពីបទល្មើសវាយដៃគូពីក្រោយ ហើយរូបគេក៏បានប្រកាសជាសាធារណៈសូមទោសដល់ វ៉ាន់ វឿន ចំពោះកំហុសអចេតនានេះផងដែរ។ ជាមួយគ្នានេះ កម្មវិធីទស្សន៍ទាយរបស់ថោន ពីថ្ងៃអាទិត្យនោះ គឺមានបងប្អូនមហាជន បានទស្សន៍ទាយលទ្ធផលខុសស្រឡះ រហូតដល់ ៩៨ ភាគរយឯណោះ។
លទ្ធផលនេះក៏អាចចាត់ទុកថា ជាសំណាងរបស់ ឯម សុធី ផងដែរ ដោយសារតែការប្រកួតវគ្គជម្រុះ មានឱកាសទាត់ផ្តួលកីឡាករ ទូច ដេវីត ឱ្យចុះចាញ់ទឹកទី១ ហើយបន្តឡើងមកវគ្គផ្តាច់ព្រ័ត្រ បានម៉ាត់ និងទាត់កីឡាករ វ៉ាន់ វឿន ដែលទ្រមខ្លួនតាំងពីវគ្គជម្រុះ និងអស់ថាមពលស្រាប់នោះ ឱ្យខូចជើងក្រោម នៅក្នុងទឹកទី១ ដូច ទូច ដេវីត ដែរ។
កីឡាករ វ៉ាន់ វឿន បាននិយាយក្រោយពេលប្រកួតថា៖ «ខ្ញុំរបួសជើង និងធ្លាក់កម្លាំងជាងមុនៗ បន្ទាប់ពីឈឺខ្លួនតាំងពីវគ្គជម្រុះ។ ខ្ញុំចាញ់អស់ចិត្ត គឺកម្លាំងខ្សោយ និងឈឺជើងផង មិនអាចស៊ូបានទេ។ ខ្ញុំសុំទោសបងប្អូន ដែលគាំទ្រខ្ញុំ ព្រោះខ្ញុំប្រឹងអស់ពីសមត្ថភាពទៅហើយ ពោលគឺមិនអាចមើលស្រាលដៃគូបានទេ ហើយកន្លងមកខ្ញុំក៏ធ្លាប់ចាញ់ ឯម សុធី ផងដែរ។ ខ្ញុំធ្លាប់ប្រកួតកម្មវិធីនេះ ៤ លើក ឈ្នះបានប្រាក់រង្វាន់២លើក និងឈ្នះជើងឯករង ១ លើក តែចាញ់លើកនេះ គឺវេទនាតែម្តង»។
ចំណែកម្ចាស់ប្រាក់រង្វាន់ ៣,៤ លានរៀល ឯម សុធី និយាយថា៖ «ខ្ញុំប្រកួតបាន ៤ លើក នៅសង្វៀនថោននេះ គឺទើបតែឈ្នះប្រាក់លានពេលនេះទេ។ ខ្ញុំអរគុណ ដែលបងប្អូនជួយគាំទ្រលើកទឹកចិត្តចំពោះខ្ញុំ ហើយអរគុណចំពោះគ្រូបង្វឹក និងខាងគណៈកម្មការ ដែលផ្តល់ឱកាសឱ្យខ្ញុំបានប្រកួត»៕
