.jpg)
ការប្រកួតកីឡាកង់ភ្នំ ដែលសហព័ន្ធខ្មែរកីឡាទោចក្រយាន បានរៀបចំនាពេលកន្លងមក។ ឈន ណន
ភ្នំពេញ: ការប្រកួតកីឡាទោចក្រយានជ្រើសរើសជើងឯកថ្នាក់ជាតិ ប្រចាំឆ្នាំ ២០២១ ដែលគ្រោងធ្វើនៅថ្ងៃទី ២៥ ខែធ្នូ ត្រូវបានពន្យារពេល និងបន្តទទួលចុះឈ្មោះ រហូតដល់ថ្ងៃទី ៣១ ខែធ្នូ ហើយបានកំណត់យកកាលបរិច្ឆេទថ្មី នាថ្ងៃទី ១១ ដល់ថ្ងៃទី ១៣ ខែ មករា ឆ្នាំ ២០២២ នៅខេត្តសៀមរាបវិញ ខណៈដែលការប្រកួតនេះ មានការបើកទូលាយគ្រប់មជ្ឈដ្ឋាន និងមានទិសដៅធំ ក្នុងដំណើរឆ្ពោះទៅកាន់ការប្រកួតស៊ីហ្គេម ឆ្នាំ ២០២២ នៅវៀតណាម និងស៊ីហ្គេម ឆ្នាំ២០២៣ នៅកម្ពុជា។
អគ្គលេខាធិការសហព័ន្ធខ្មែរកីឡាទោចក្រយាន លោក នូ ចំរើន បានប្រាប់ កាលពីថ្ងៃពុធថា៖ «សហព័ន្ធបានលើកពេលការប្រកួតកីឡាទោចក្រយានជ្រើសរើសជើងឯកថ្នាក់ជាតិ ដោយសារទីលានប្រកួតប្រជែងជំនាញកម្រិតខ្ពស់ ទាំងកង់គួក និងកង់ភ្នំ មិនទាន់រៀបចំរៀបរយ តាមបច្ចេកទេសរួចរាល់ និងទាន់ពេលវេលា ហេតុនេះយើងមិនទាន់អាចធ្វើបានទេ ព្រោះព្រឹត្តិការណ៍នេះ ធ្វើឡើងដើម្បីត្រៀមឆ្ពោះទៅគោលដៅស៊ីហ្គេម ២ លើកចំពោះមុខ ដែលតម្រូវរៀបចំឱ្យបានរលូនតាមបច្ចេកទេស»។
លោកបន្ថែមថា៖ «សម្រាប់ការប្រកួតជើងឯកថ្នាក់ជាតិនេះ យើងបើកយ៉ាងទូលាយ សម្រាប់កីឡាករ-កីឡាការិនី ទាំងប្រភេទកង់គួក និងកង់ភ្នំ អ៊ីចឹងការប្រកួតនេះ យើងសម្រួចទៅជំនាញក្នុងកម្រិតខ្ពស់ ដើម្បីវាស់ស្ទង់សមត្ថភាពកីឡាករ-កីឡាការិនីជម្រើសជាតិផង និងផ្តល់ឱកាសជូនដល់កីឡាករ-កីឡាការិនី មកពីបណ្តាក្លិប-សមាគមទូទាំងប្រទេស ដើម្បីបានបញ្ចេញសមត្ថភាពផង ពោលគឺគ្រប់មជ្ឈដ្ឋាន។ នេះជាផែនការគោលដៅរបស់សហព័ន្ធ ដើម្បីសម្រិតសម្រាំងយកកីឡាករកីឡាការិនី ដែលមានសមិទ្ធផលខ្ពស់ៗ ទុកត្រៀមហ្វឹកហាត់បំប៉នបន្ថែម សម្រាប់ស៊ីហ្គេមនៅខែឧសភា ឆ្នាំ ២០២២ នៅប្រទេសវៀតណាម និងត្រៀមស៊ីហ្គេម លើកទី៣២ ក្នុងឆ្នាំ ២០២៣ នៅកម្ពុជា»។
គិតត្រឹមពេលនេះ ការរៀបចំឈ្មោះប្រកួត ទាំងប្រភេទកង់គួក និងកង់ភ្នំ ទើបតែទទួលបានជាង ១០ នាក់ទេ ខណៈក្រុមជម្រើសជាតិ សរុបទាំងបេក្ខភាពបម្រុងផងនោះ ទើបតែបាន ២០ នាក់ ហើយការប្រកួតថ្នាក់ជាតិនេះ ធ្វើឡើង ក្រោមគម្រោងជំនួយឧបត្ថម្ភរបស់ក្រសួងអប់រំ យុវជន និងកីឡា។ បន្ថែមលើនេះទៀត សហព័ន្ធខ្មែរកីឡាទោចក្រ-យាន បានសហការជាមួយសាលាខេត្តសៀមរាប និងក្លិបម៉ូតូប៊ីអឹមដាប់ប៊លយូកម្ពុជា ដោយរំពឹងថា នឹងរៀបចំការប្រកួតប្រជែងជើងឯកថ្នាក់ជាតិ ឆ្នាំ ២០២១ នេះ ឱ្យបានល្អផ្តាច់ឆ្នាំមុនៗ។
ចំពោះវិញ្ញាសា ដែលត្រូវដាក់ឱ្យប្រកួតនេះ គឺប្រភេទកង់គួក (Road Bike) មានការប្រកួតក្រុមថ្នាលបុរស អាយុក្រោម ១៨ ឆ្នាំ (Man Junior Road Bike) ក្រុមបុរស ដែលកម្រិតជំនាញខ្ពស់ អាយុ ១៨ ឆ្នាំឡើង (Man Elite Road Bike) និងក្រុមបុរសកម្រិតជំនាញ អាយុ ៤០ ឆ្នាំឡើង (Man Master Road Bike)។ ចំណែកប្រភេទកង់ភ្នំ (Mountain Bike) មានការប្រកួត សម្រាប់ក្រុមបុរសកម្រិតថ្នាល ក្រុមបុរសកម្រិតជំនាញខ្ពស់ ក្រុមបុរសកម្រិតជំនាញ និងការប្រកួតក្រុមនារី (Women Mountain Bike)។
ចំណែក លោក វ៉ាត់ ចំរើន អគ្គលេខាធិការ NOCC បានប្រាប់ថា៖ «កីឡាប្រណាំងកង់ ក៏បានចាត់ទុកថា ជាប្រភេទកីឡាជំនាញ និងទេសចរណ៍ផងដែរ ហេតុនេះ ការរៀបចំ ត្រូវតែមានភាពប្រយ័ត្នប្រយែង និងគោរពតាមគោលការណ៍ស្តង់ដាអន្តរជាតិ ឱ្យបានល្អរលូន ដើម្បីជាគំរូ ក្នុងគោលបំណងឆ្ពោះ ទៅកាន់ព្រឹត្តិការណ៍ស៊ីហ្គេម លើកទី៣២ នាឆ្នាំ ២០២៣ ដែលកម្ពុជាធ្វើជាម្ចាស់ផ្ទះ»៕
