ភ្នំពេញ: គ្រូប្រដាល់ លោក ស៊ន អេលីត និងលោក ធី ណារិទ្ធ សុទ្ធតែបានសម្ញែងភាពខ្លាំងទៅលើសិស្សរបស់ខ្លួន អេលីត ភក្តី និង នៅ ដារ៉ូ រៀងៗខ្លួន នៅពេលអ្នកទាំង ២ ត្រូវបានដាក់ឱ្យប្រកួតដណ្តើមប្រាក់លាន ក្នុងកម្មវិធី ONESTRIKE មានត្រឹម ២ ទឹក មានរយៈពេល ១៤ នាទី នៅសង្វៀន PNN ថ្ងៃអាទិត្យនេះ។
បើទោះអ្នកទាំង ២ នេះ មិនធ្លាប់ជួបប្រកួតគ្នាកន្លងមក ប៉ុន្តែសម្រាប់ការប៉ះគ្នា នៅក្នុងកម្មវិធីដ៏ប្លែករបស់សង្វៀន PNN លើកនេះ លោកគ្រូបង្វឹក ដែលមានបទពិសោធទាំង ២ គឺលោក ស៊ន អេលីត និង លោក ធី ណារិទ្ធ សុទ្ធតែអះអាង និងបង្ហាញភាពជឿជាក់ លើសមត្ថភាពសិស្សរបស់ខ្លួននិងសង្ឃឹមឈ្នះខ្ពស់ដូចគ្នា។
លោក ស៊ន អេលីត គ្រូបង្វឹក អេលីត ភក្តី បាននិយាយថា៖ «កីឡាករ អេលីត ភក្តី កំពុងហ្វឹកហាត់ត្រៀមបានល្អ ដើម្បីចូលរួមប្រកួតក្នុងកម្មវិធីដ៏ប្លែក និងទាក់ទាញមួយនេះ ហើយខ្ញុំគិតថា វាមានភាគរយឈ្នះខ្ពស់ ព្រោះតាមរយៈការហ្វឹកហាត់ និងបំប៉នកម្លាំង គឺអាចធានាបាននូវការប្រកួតល្អ និងសង្ឃឹមជឿជាក់ថា នឹងមានភាគរយឈ្នះខ្ពស់ គឺដល់ទៅ ៨០ ភាគរយឯណោះ»។
លោក ស៊ន អេលីត បានបន្ថែមថា៖ «ការប្រកួតមួយរយៈចុងក្រោយនេះ វាជួបបញ្ហាខ្លះ មិនសូវល្អ ជាពិសេសប្រកួតចុងក្រោយ នៅសង្វៀនបាយ័ន ដោយមានប្រៀបលើដៃគូហើយ តែគេចាប់កំហុសពិន័យឱ្យចាញ់ទៅវិញ។ តែទោះបីជាយ៉ាងណា សម្រាប់ការប៉ះជាមួយ នៅ ដារ៉ូ លើកនេះ ខ្ញុំជឿជាក់ថា ឈ្នះ»។
ចំណែកលោក ធី ណារិទ្ធ គ្រូបង្វឹករបស់ នៅ ដារ៉ូ ប្រាប់ថា៖ «មួយរយៈនេះ ដារ៉ូ កំពុងហ្វឹកហាត់បានល្អណាស់។ សម្រាប់ការជួបប្រកួតនៅ PNN ក្នុងសប្តាហ៍នេះ គឺត្រៀមបានល្អ ដោយមិនបារម្ភពីការចាញ់ទេ ខណៈកន្លងមក ទាំង ២ នាក់ មិនធ្លាប់ជួបគ្នាឡើយ»។
លោកបានបន្ថែមទៀតថា៖ «ប្រសិនបើនិយាយពីបទពិសោធឡើងសង្វៀនវិញ នៅ ដារ៉ូ របស់ខ្ញុំ ទោះមិនធ្លាប់ចូលលេងខ្សែក្រវាត់ និងមិនធ្លាប់ឈ្នះពាន ប៉ុន្តែការប្រកួតម្តងៗ គឺវាយអស់ពីសមត្ថភាព មិនដែលទទួលការព្រមានម្តងណាឡើយ។ ខ្ញុំគិតថា វាមានស្នៀតទាត់ និងជង្គង់ល្អ ចំណែកកណ្តាប់ដៃក៏ប្រើបានផលល្អដែរ ហេតុនេះ ខ្ញុំមានទំនុកចិត្តឈ្នះ អេលីត ភក្តី ដល់ទៅ ៩០ ភាគរយឯណោះ»៕