The Phnom Penh Post Search

Search form




Logo of Phnom Penh Post newspaper Phnom Penh Post - សហព័ន្ធ​ប្រដាល់​គុន​ខ្មែរ​ បន្ថែម​ការ​ប្រកួត ១​ សង្វៀន​ទៀត ​នៅ​ទូរទស្សន៍​ជាតិ​​កម្ពុជា​

សហព័ន្ធ​ប្រដាល់​គុន​ខ្មែរ​ បន្ថែម​ការ​ប្រកួត ១​ សង្វៀន​ទៀត ​នៅ​ទូរទស្សន៍​ជាតិ​​កម្ពុជា​

Content image - Phnom Penh Post
ការ​ប្រកួត​កីឡា​ប្រដាល់គុនខ្មែរ​ ដែល​ត្រូវបាន​ធ្វើ​ឡ់ើង នៅ​លើ​សង្វៀនថោន កន្លង​មក។ រូប​ថត ថោន

សហព័ន្ធ​ប្រដាល់​គុន​ខ្មែរ​ បន្ថែម​ការ​ប្រកួត ១​ សង្វៀន​ទៀត ​នៅ​ទូរទស្សន៍​ជាតិ​​កម្ពុជា​

ភ្នំពេញៈ សហព័ន្ធ​កីឡា​ប្រដាល់​គុន​ខ្មែរ បាន​ឈាន​ដល់​ការ​ចាប់​ដៃ​សហការ​ជាមួយ​ទូរទស្សន៍ជាតិ​កម្ពុជា (TVK ឬ ទទក) បើក​ឱ្យមាន​ការ​ប្រកួតប្រដាល់គុនខ្មែរ មួយ​សង្វៀន​ទៀត បន្ថែម​ទៅ​លើ​សង្វៀន​​ប្រដាល់​ឯក​ជន នៅ​តាមស្ថានីយ​ទូរទស្សន៍បាយ័ន CNC ថោន និង​សង្វៀន PNN ដែល​មានការ​ប្រកួត​​ពី​​ថ្ងៃ​សុក្រ ដល់​​ថ្ងៃអាទិត្យ នៅរៀង​រាល់សប្តាហ៍។

យ៉ាង​ណា​មិញ ចំពោះ​សង្វៀនថ្មី ដែល​មាន​ឈ្មោះ​ថា «​ការ​ប្រកួតប្រដាល់ TVK Fighter» ត្រូវ​​ធ្វើ​ឡើង​នៅ​ថ្ងៃព្រហស្បតិ៍ ពោលគឺ​បានចាប់ផ្តើមការ​ប្រកួត​នៅ​ថ្ងៃ​នេះតែ​​ម្តង ​នៅ​ស្ទូឌីយោ​ទស្សន៍​ជាតិ​កម្ពុជា ​ក្នុង​ក្រសួង​ព័ត៌មាន​ រាជ​ធានី​ភ្នំពេញ​ ដោយ​មាន​ការ​ផ្សាយ​ផ្ទាល់ ពី​​វេលា​ម៉ោង​​៤ ដល់​​ម៉ោង​​៦​។​

អ្នក​គ្រប់​គ្រង​កម្ម​វិធី​ប្រកួតនេះ ​មិន​អាច​ទំនាក់​ទំនង​បាន​ទេ​ ប៉ុន្តែ​ លោក​ ស៊ន​ អេលីត ដែល​​​ធ្លាប់​​សហការ​ពី​ដំបូង​ ជាមួយ​ទូរទស្សន៍​ជាតិ​កម្ពុជា បាន​​ប្រាប់​​ថា​ ​កន្លង​មក ​ក្រុម​ការ​ងារ​រៀប​ចំ​​​ជាមួយ​លោក ​ធ្លាប់​អញ្ជើញ​ទូរទស្សន៍​ទទក ​មក​ផ្សាយ​ផ្ទាល់​ ក្នុង​កម្ម​វិធី​ប្រ​កួត​គុន​ខ្មែរ​អល​ស្តារ ដោយ​មាន​ការ​ចាប់​អារម្ភ​ខ្លាំង ​និង​មាន​អ្នក​ចូល​មើល​តាម​ហ្វេសប៊ុក​ច្រើន ​ប៉ុន្តែ​​ឥឡូវពួក​​គេ ​ទៅ​រៀប​ប្រកួត​នៅ​ទទក​តែ​ម្តង​។ លោកបញ្ជាក់ថា៖​«​​នេះ​ជា​កម្ម​វិធី​​ផ្សេង ​ដែលគេ​​រៀប​ចំ​បែក​ចេញ​ពី​គម្រោង​ គុន​ខ្មែរ​អល​ស្តារ​របស់​ខាង​ខ្ញុំ»​។​

ចំណែក​លោក​ តែម​ ម៉ឺន​ ប្រធាន​សហព័ន្ធកីឡា​​ប្រដាល់​គុន​ខ្មែរ ​ដែល​ទើប​ទទួលបានការ​គាំ​ទ្រ​​ឱ្យ​បន្ត​ធ្វើ​ជា​​ប្រធាន​ថ្មី ​​បាន​ប្រាប់​​ថា​៖ «​ពិត​ជា​មាន​បើក​ការ​ប្រកួត​ នៅ​ទូរទស្សន៍​ជាតិ​មែន​ហើយ​ខាង​សហព័ន្ធ​កីឡាប្រដាល់​​គុន​ខ្មែរ ​នៅ​តែ​គាំ​ទ្រ​ចូល​រួម ​សហការ​ខាង​បច្ចេកទេស​ជូន ​ប៉ុន្តែ​យើង​ទើប​តែ​ចាប់​ផ្តើម​ មិន​ទាន់​បាន​រៀប​រយ​ល្អ​នៅ​ឡើយ​ទេ»​។​

ជាមួយ​គ្នា​នេះ លោក​ និន ​វណ្ណដា​ អ្នក​កាន់​កម្មវិធី​ប្រដាល់​របស់​សហព័ន្ធកីឡា​​ប្រដាល់​គុន​ខ្មែរ បាន​ប្រាប់​​​ថា​៖ «​គេ​រៀប​ចំ​គូ​ប្រកួត​ហើយ​ ប៉ុន្តែ​ខាង​ខ្ញុំ ​មិន​ទាន់​ជា​អ្នក​រៀប​រយលើការ​ងារ​នេះ​នៅ​ឡើយ​​ទេ​ តែ​ឃើញ​មាន​ឈ្មោះ​កីឡាករ​ល្អ​ៗដែរ»​៕

អត្ថបទគួរចាប់អារម្មណ៍