ភ្នំពេញៈ អ្នកប្រដាល់ជំនាញស្នៀតទាត់ធ្ងន់ៗ គង់ សំបូរ របស់ក្លិបគោព្រៃ ដែលកំពុងឡើងជើងខ្លាំង ដោយបានឈ្នះចំនួន ១២ ប្រកួតជាប់ៗគ្នានោះ មានការសង្ឃឹមថា រូបគេអាចនឹងធ្វើបានសម្រេច សម្រាប់ការឈានទៅរកការឈ្នះប្រាក់លាន សម្រាប់ការចូលរួមប្រកួតដណ្តើមប្រាក់លាននៅសង្វៀនថោននៅថ្ងៃអាទិត្យ ខណៈបេក្ខភាពជាដៃគូប្រកួតប្រជែង៣នាក់ទៀត មានអ្នកលេងកណ្តាប់ដៃ អេលីត មករា, រឿន ប៊ុនរួន (សេក គឹមរួន) និង រិន សារ័ត្ន សុទ្ធតែមានការញញើត និងបារម្ភទៅលើស្នៀតទាត់របស់ គង់ សំបូរ។
តាមពិត គង់ សំបូរ ធ្លាប់បានដាក់ឱ្យចូលរួមការប្រកួតម៉ារ៉ាតុងដណ្តើមប្រាក់លាននេះ ចំនួន ៥ លើកហើយ ប៉ុន្តែរូបគេមិនដែលឈ្នះបានប្រាក់លានម្តងណាឡើយ ចំណែកបេក្ខភាព៣នាក់ទៀត ក៏សុទ្ធតែធ្លាប់បានចូលរួមកម្មវិធីនេះដូចគ្នា ហើយបានចាញ់ដូចគ្នា ចំណែកការប្រកួតលើកនេះ គង់ សំបូរ ហាក់មានភាគរយខ្ពស់ជាងគេ ហើយបេក្ខភាព៣នាក់ទៀត ពិសេស សេក គឹមរួន និង អេលីត មករា សុទ្ធតែបារម្ភនឹង គង់ សំបូរ។
គង់ សំបូរ បាននិយាយថា៖ «នៅក្នុងចំណោមបេក្ខភាព៣នាក់ទៀត ដែលត្រូវចាប់ឆ្នោតប្រកួតគ្នានេះ ខ្ញុំធ្លាប់ចាញ់ និងធ្លាប់ឈ្នះភាគច្រើន ហើយសម្រាប់ការប្រកួតលើកនេះ ខ្ញុំមានទំនុកចិត្តឈ្នះខ្ពស់ គឺខ្ញុំរំពឹងឈ្នះ ៩០ ភាគរយ ប៉ុន្តែវាអាចលំបាកបន្តិច ពីព្រោះកណ្តាប់ដៃ និងស្នៀតរបស់ពួកគាត់ទាំង ៣ គឺធ្ងន់ៗ និងរឹងមាំដូចគ្នា បើមិនប្រយ័ត្នក៏អាចចាញ់បានដែរ»។
ចំណែក សេក គឹមរួន បាននិយាយថា៖ «ខ្ញុំហ្វឹកហាត់ពេញល្អ ប៉ុន្តែសម្រាប់ការជួបគ្នាលើកនេះ ខ្ញុំបារម្ភខ្លាំង ប្រសិនចាប់ឆ្នោតប៉ះ គង់ សំបូរ តែបើជួប រិន សារ័ត្ន និង អេលីត មករា មិនសូវបារម្ភទេ ហេតុនេះខ្ញុំសង្ឃឹមឈ្នះត្រឹម ៥០ ភាគរយប៉ុណ្ណោះ»។
កីឡាករដែលបានរីកដុះដាល ដោយសារការប្រកួតវាយដាក់ទ្រុង MMA រិន សារ័ត្ន ក៏ជាជើងខ្លាំងលំដាប់ល្អម្នាក់ ប៉ុន្តែអ្នកប្រយុទ្ធមិនសូវចេះមាត់កម្នាក់នេះ មិនសូវហ៊ានអួតមុនការប្រកួតនោះទេ ហើយក៏ហាក់ញញើតនឹង គង់ សំបូរ ដែរ។ រិន សារ័ត្ន បានប្រាប់យ៉ាងខ្លីថា៖ «ខ្ញុំរំពឹងតែ ៦០ ភាគរយប៉ុណ្ណោះ»។
ចំពោះ អេលីត មករា បាននិយាយថា៖ «ខ្ញុំញញើតក្បាច់ទាត់របស់ គង់ សំបូរ គឺលំបាកប្រកួត ប៉ុន្តែធានាវ៉ៃឱ្យល្អ និងសង្ឃឹមឈ្នះ ៨០ ភាគរយ។ ចំពោះវត្តមានកីឡាករ២នាក់ទៀតមានកីឡាករ រិន សារ័ត្ន និង សេក គឹមរួន ខ្ញុំមិនព្រួយទេ អាចទប់ទល់បាន»។
ជាមួយគ្នានេះ លោក ស៊ន អេលីត ដែលជាគ្រូបង្វឹករបស់អេលីត មករា បានអះអាងថា៖ «ខ្ញុំមើលឃើញថា កីឡាករ គង់ សំបូរ ល្អខ្លាំងមួយរយៈនេះ ប៉ុន្តែបើចូលកៀក កណ្តាប់ដៃរបស់ អេលីត មករា អាចផ្តួលបាន ហេតុនេះខ្ញុំគិតថា មករា មានប្រៀបឈ្នះខ្ពស់ ប្រសិនបើចូលកៀកបាន និងមានឱកាសប្រើកណ្តាប់ដៃ»៕