ភ្នំពេញ: លោកនាយករដ្ឋមន្ត្រី ហ៊ុន សែន បានអះអាងថា វិមានកីឡដ្ឋាននៃពហុកីឡដ្ឋានជាតិមរតកតេជោ ដែលត្រូវបានសាងសង់ឡើងប្រកបដោយគុណភាព ជាមួយបច្ចេកវិទ្យាដ៏ទំនើបតាមស្តង់ដាអន្តរជាតិនោះ ជាជំនួយឥតសំណងដ៏ធំជាងគេរបស់ចិន បានផ្តល់មកឱ្យកម្ពុជា ហើយលោកបានបញ្ជាក់ថា សមិទ្ធផលនេះ វាមិនមែនកើតឡើងដោយចៃដន្យ ដោយគ្មានទំនាក់ទំនងការទូតរវាងប្រទេសទាំង ២ ដែលបានចាប់ផ្តើមតាំងពីព្រះបរមរតនកោដ្ឋ សម្តេចព្រះបាទ នរោត្តម សីហនុ នោះទេ។
នៅក្នុងពិធីសម្ពោធដាក់ឱ្យប្រើប្រាស់ជាផ្លូវការ «វិមានកីឡដ្ឋាននៃពហុកីឡដ្ឋានជាតិមរតកតេជោ នឹងរាប់ថយក្រោយ ៥០២ ថ្ងៃ និងបើកយុទ្ធនាការជាតិផ្សព្វផ្សាយស៊ីហ្គេម-ប៉ារ៉ាហ្គេម ឆ្នាំ២០២៣ នៅកម្ពុជា កាលពីថ្ងៃសៅរ៍ កន្លងមកនេះ លោកនាយករដ្ឋមន្ត្រី ហ៊ុន សែន បានសម្តែងការអរគុណដ៏ជ្រាលជ្រៅ ចំពោះសាធារណរដ្ឋប្រជាមានិតចិន ដែលបានផ្តល់ជំនួយឥតសំណង ដើម្បីសាងសង់បាននូវវិមានកីឡដ្ឋានដ៏ធំស្កឹមស្កៃ សម្រាប់កម្ពុជា ប្រើប្រាស់ត្រៀមទៅធ្វើជាម្ចាស់ផ្ទះស៊ីហ្គេម នៅឆ្នាំ ២០២៣។
នៅចំពោះមុខលោក វ៉ាង វិនធៀន ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋប្រជាមានិតចិន លោកនាយករដ្ឋមន្ត្រី ហ៊ុន សែន បានថ្លែងថា៖ «ខ្ញុំសូមយកឱកាសនេះ សម្តែងនូវការអរគុណដ៏ជ្រាលជ្រៅ ចំពោះសាធារណរដ្ឋប្រជាមានិតចិន ដែលបានផ្តល់ជំនួយឥតសំណងមកឱ្យកម្ពុជា ហើយដែលយើងទាំងអស់គ្នា មិនមែនយល់សប្តិ ព្រោះនេះជាពហុកីឡដ្ឋានជាតិ ដែលយើងទាំងអស់គ្នា បានប្រឹងប្រែងកសាងឡើង ក្រោមជំនួយឥតសំណងរបស់សាធារណរដ្ឋប្រជាមានិតចិន»។
«ខ្ញុំពិតជាមានមោទនភាព ដែលនេះជាសមិទ្ធផលនៃផ្លែផ្កា នៅក្នុងទំនាក់ទំនងនៃសាធារណរដ្ឋប្រជាមានិតចិន និងកម្ពុជា ហើយខ្ញុំសូមយកឱកាសនេះ ថ្លែងអំណរគុណជូនចំពោះព្រះវិញ្ញាណក្ខន្ធរបស់ព្រះបរមរតនកោដ្ឋ ដែលព្រះអង្គបានចាប់ផ្តើមបង្កើតទំនាក់ទំនងការទូត ជាមួយសាធារណរដ្ឋប្រជាមានិតចិន។ នោះ គឺជាការចាប់ផ្តើមនៅសម័យកាលថ្មីមួយ សម្រាប់ទុកជាកេរមរតកនៃចំណងមិត្តភាពរវាងប្រទេសទាំង ២ មកដល់អ្នកជំនាន់ក្រោយ អ៊ីចឹងដៃគូរបស់យើង បានផ្តល់ (វិមានកីឡដ្ឋាន) ឱ្យយើងនៅពេលនេះ មិនមែនកើតឡើងដោយចៃដន្យ ដោយខ្វះទំនាក់ទំនងនោះទេ»។
លោកនាយករដ្ឋមន្ត្រី បានបន្ថែមថា៖ «យើងបានខិតខំកសាងនូវទំនាក់ទំនងរវាងកម្ពុជា និងសាធារណរដ្ឋប្រជាមានិតចិន ដោយឈរលើការជឿទុកចិត្តគ្នា ការគោរពគ្នា និងសាមគ្គីភាពជាមួយគ្នា ហើយវិមានកីឡដ្ឋាននៃពហុកីឡដ្ឋានជាតិមរតកតេជោ វាគ្រាន់តែជាសមិទ្ធផលមួយ ក្នុងចំណោមសមិទ្ធផលជាច្រើនទៀត ដែលយើងទទួលបាន តាមការជួយជ្រោមពីសាធារណរដ្ឋប្រជាមានិតចិន»។
ប្រមុខដឹកនាំប្រទេស លោក ហ៊ុន សែន បានបញ្ជាក់ថា៖ «បើនិយាយពីជំនួយឥតសំណង គឺវិមានកីឡដ្ឋាននេះ ជាគម្រោងធំជាងគេ នៅក្នុងចំណោមជំនួយឥតសំណង ដែលសាធារណរដ្ឋប្រជាមានិតចិន បានផ្តល់ឱ្យយើង ហើយនៅថ្ងៃនេះ យើងបានទទួលនូវសមិទ្ធផលដ៏ធំនេះ ប៉ុន្តែខ្ញុំគិតថា អ្វីដែលធំជាងនេះទៅទៀត ដែលមិនអាចខ្វះបាន គឺជម្រៅទឹកចិត្ត ដែលមេដឹកនាំចិន និងប្រជាជនចិន បានផ្តល់សម្រាប់ប្រជាជនកម្ពុជាយើង»។
តាមរបាយការណ៍របស់លោក ថោង ខុន ប្រធានគណៈកម្មាធិការជាតិអូឡាំពិកកម្ពុជា និងជាអនុប្រធានគណៈកម្មាធិការជាតិរៀបចំការប្រកួតកីឡាស៊ីហ្គេម លើកទី៣២ ឆ្នាំ ២០២៣ (CAMSOC) បានឱ្យដឹងថា វិមានកីឡដ្ឋាននៃពហុកីឡដ្ឋានជាតិមរតកតេជោ ត្រូវបានសាងសង់ឡើង ក្រោមជំនួយឥតសំណងរបស់សាធារណរដ្ឋប្រជាមានិតចិន ក្នុងទឹកប្រាក់ ១,១
ប៊ីលានយន់ ត្រូវនឹងប្រមាណ ១៥០ លានដុល្លារអាមេរិក។
វិមានកីឡដ្ឋាននេះ បានសាងសង់នៅលើផ្ទៃដី ១៦,៤ ហិកតា ផ្ទៃក្រឡាសំណង់អគារ ៨៦ ០០០ ម៉ែត្រការ៉េ ដែលអាចផ្ទុកអ្នកទស្សនាបាន ៦ ម៉ឺននាក់ និងមានស្តង់ដាសុវត្ថិភាពខ្ពស់ គឺអាចជម្លៀសមនុស្ស ៦ ម៉ឺននាក់ ក្នុងករណីមានហានិភ័យកើតឡើង ត្រឹមរយៈពេល ៧ នាទី ដោយវិមានកីឡដ្ឋាននេះ មានច្រកចេញចំនួន ៥៤ មានបន្ទប់ទឹកចំនួន ៩៣ តំបន់ ស្មើនឹង ៨៦៣បង្គន់អនាម័យ។
តាមរបាយការណ៍ដដែលនេះ លោក ថោង ខុន បានបញ្ជាក់ថា៖ «ក្នុងទិដ្ឋភាពបច្ចេកទេស វិមានកីឡដ្ឋាននេះ បានបំពាក់នូវបច្ចេកវិទ្យាថ្មីទំនើបចុងក្រោយ តាមស្តង់ដាកីឡាអន្តរជាតិ ដែលអាចជួយឱ្យកម្ពុជា កាន់តែមានលទ្ធភាពគ្រប់គ្រាន់ ក្នុងការរៀបចំព្រឹត្តិការណ៍កីឡា ក៏ដូចជាព្រឹត្តិការណ៍ទេសចរណ៍ ដែលមានស្គ្រីន LED ចំនួន ៤ (ខាងក្នុង ៣ ខាងក្រៅ ១) មានហាងលក់ទំនិញ កន្លែងតាំងពិព័រណ៍ព្រមទាំងមានបន្ទប់សណ្ឋាគារចំនួន ៣៤ និងបន្ទប់ ១៧ ផ្សេងទៀត ជាលក្ខណៈ VIP សម្រាប់ទស្សនាកីឡា»៕