ភ្នំពេញៈ វគ្គបណ្តុះបណ្តាលលេខាតុប្រកួត និងមន្ត្រីស្ថិតិកីឡាបាល់បោះ បានបិទបញ្ចប់កាលពីល្ងាចថ្ងៃចន្ទ ចំណែកលទ្ធផលនៃការសិក្សាចំនួន ៥ ថ្ងៃមកនេះ ត្រូវបានគ្រូឧទ្ទេស វាយតម្លៃថា មាននិទ្ទេសល្អចំនួន ៣០ ភាគរយ និទ្ទេសល្អមធ្យម ៤៨ ភាគរយ និងនិទ្ទេសមធ្យម មាន ២៦ ភាគរយក្នុងចំណោមសិក្ខាកាមចូលរួមសិក្សាចំនួន ៣២ នាក់។
លោក ទុយ ប៊ុនហឿន អនុប្រធាននាយកដ្ឋាន អប់រំកាយ និងកីឡា បានថ្លែងថា៖ «សិក្ខាកាមដែលបានចូលរួមវគ្គនេះ នឹងក្លាយជាមន្ត្រីគណៈកម្មការរៀបចំការប្រកួតនានា ដូចជាការប្រកួតសិស្សនិស្សិតវិទ្យាល័យ និងការប្រកួតថ្នាក់ជាតិ ហើយក៏អាចចូលរួមជាធ្វើជាមន្ត្រីក្នុងការប្រកួតស៊ីហ្គេម ឆ្នាំ ២០៣២ នៅកម្ពុជាផងដែរ ព្រោះអ្នកមិនបានចូលរួមវគ្គនេះ មិនអនុញ្ញាតឱ្យធ្វើជាមន្ត្រីគណៈកម្មការប្រកួតឡើយ»។
លោកបានបន្ថែម សម្រាប់មន្ត្រីគណៈកម្មការកម្រិតខ្ពស់ ត្រូវអនុញ្ញាតការប្រកួតកម្រិតខ្ពស់ ព្រោះវគ្គបណ្តុះបណ្តាល មានកម្រិតរបស់វា ហើយដើម្បីឱ្យកីឡាបាល់បោះ មានការរីកចម្រើនល្អទៅមុខ ត្រូវមានការសហការនឹងសាលារៀន វិទ្យាល័យ សាកលវិទ្យាល័យ គឺស្របជាមួយផែនការយុទ្ធសាស្ត្ររបស់រាជារដ្ឋាភិបាលក្នុងការឆ្ពោះទៅរកជោគជ័យ ដណ្តើមបានមេដាយ សម្រាប់ស៊ីហ្គេម ឆ្នាំ ២០២៣។
ជាមួយគ្នានេះ លោក ដួង ឌីម អគ្គលេខាធិការរង នៃសហព័ន្ធកីឡាបាល់បោះកម្ពុជា និងជាអ្នកសម្រលសម្រួលវគ្គនេះ បានប្រាប់ថា៖ «វគ្គបណ្តុះបណ្តាលនេះ ចាប់ផ្តើមដំណើរការចាប់ពីថ្ងៃទី ១៦ ដល់ថ្ងៃទី ២០ ខែធ្នូ ដោយប្រើប្រាស់ថវិកាគាំទ្ររបស់ក្រសួងអប់រំ យុវជន និងកីឡា ប្រចាំឆ្នាំ ២០២១ ដើម្បីអភិវឌ្ឋកីឡាបាល់បោះកម្ពុជា ហើយជាលទ្ធផលយើងវាយតម្លៃជារួមថា សិក្ខាកាមចំនួន ៣២ នាក់ ដែលឆ្លងវគ្គនេះ គឺទទួលបាននិទ្ទេសល្អគួរឱ្យកត់សម្គាល់»៕