ខណៈព្រះរាជាណាចក្រកម្ពុជាបានធ្វើជាម្ចាស់ផ្ទះព្រឹត្តិការណ៍ប្រកួតកីឡាទូកក្តោងអន្តរជាតិលើកដំបូង ជាមួយនឹងការប្រកួតកីឡាទូកក្តោងជ្រើសរើសជើងឯកអាស៊ីអាគ្នេយ៍ឆ្នាំ ២០២១ កាលពីដើមខែនេះ កាសែត ភ្នំពេញ ប៉ុស្តិ៍ បានជួបកីឡាករ-កីឡាការិនីទូកក្តោងកម្ពុជាវ័យក្មេងចំនួន ២ រូប ដែលមានការតាំងចិត្តខ្ពស់ ខណៈកីឡាប្រភេទនេះកំពុងបន្តរីកចម្រើន មុនការប្រកួតកីឡាស៊ីហ្គេម ឆ្នាំ ២០២៣។
កីឡាការិនី សំសូរិយា ជាអ្នកត្រួសត្រាយផ្លូវ
ក្នុងនាមជាកីឡាការិនីដំបូងគេដែលតំណាងឱ្យព្រះរាជាណាចក្រកម្ពុជា ក្នុងការប្រកួតកីឡាទូកក្តោងលក្ខណៈអន្តរជាតិ, កីឡាការិនីទូកក្តោង ទិត្យ សំសូរិយា បានបង្ហាញពីការតាំងចិត្តខ្ពស់ក្នុងនាមជាស្ត្រីកម្ពុជា ១ រូប។
ស្ថិតក្នុងវ័យ ១៧ ឆ្នាំ សំសូរិយា គឺជាកីឡាការិនីកម្ពុជាតែម្នាក់គត់ ដែលបានចូលរួមប្រកួតកីឡាទូកក្តោងជ្រើសរើសជើងឯកអាស៊ីអាគ្នេយ៍ឆ្នាំ ២០២១ នៅក្នុងខេត្តព្រះសីហនុ កាលពីដើមខែនេះ។
ពិតជាគួរឱ្យចាប់អារម្មណ៍ សម្រាប់អ្នកដែលមិនចេះសូម្បីតែហែលទឹក ពេលគាត់ចូលហាត់កីឡានេះកាលពី ៥ ឆ្នាំមុន។ សំសូរិយា លើកឡើងថា៖ «ឪពុកម្តាយខ្ញុំព្រួយបារម្ភខ្លាចខ្ញុំលង់ទឹក ហើយមិនសប្បាយចិត្តទេ ដែលខ្ញុំចង់ហាត់កីឡាទូកក្តោង»។
ថ្វីបើខ្លួនឯងមិនច្បាស់អំពីផ្លូវខាងមុខ ដោយសារតែការមិនចេះហែលទឹក ប៉ុន្តែវាមិនបានរារាំងយុវតីរូបនេះ ពីការចាប់អាជីពកីឡានេះឡើយ។
«ខ្ញុំបារម្ភ ប៉ុន្តែបានសម្រេចចិត្តសាកល្បងដោយប្រើអាវពោងសុវត្ថិភាព។ ខ្ញុំរៀនហែលទឹកដំណាលគ្នាពេលខ្ញុំហាត់កីឡាទូកក្ដោង។ វាត្រូវចំណាយពេល ១ ឆ្នាំ ទើបខ្ញុំចេះហែលទឹកដោយមានទំនុកចិត្តនៅក្នុងសមុទ្រ។ សិស្សវិទ្យាល័យ ហ៊ុន សែន ស្មាច់ដែង រូបនេះ ក៏ទទួលបានការលើកទឹកចិត្តយ៉ាងច្រើនពីបងស្រីរបស់ខ្លួនដែរ គឺមិនឱ្យបោះបង់ក្តីស្រមៃរបស់ខ្លួនក្នុងការចាប់យកអាជីពនេះ។
ក្នុងនាមជាកីឡាការិនីទូកក្តោងតែម្នាក់នៅខេត្តព្រះសីហនុ និងដោយការស្រឡាញ់កីឡានេះ គាត់ក៏បានព្យាយាមលើកទឹកចិត្តយុវតីផ្សេងទៀតឱ្យចូលលេងកីឡានេះដែរ។
«ខ្ញុំបានព្យាយាមបញ្ចុះបញ្ចូលមិត្តរបស់ខ្ញុំឱ្យលេងកីឡាទូកក្តោង ប៉ុន្តែពួកគេនៅភ័យខ្លាច។ ពួកគេនៅតែស្ទាក់ស្ទើរក្នុងការសាកល្បង»។
សំសូរិយា ដែលបច្ចុប្បន្នកំពុងហ្វឹកហាត់ក្រោមការឃ្លាំមើលយ៉ាងយកចិត្តទុកដាក់ពីលោក វីន កៅវាសនា ដែលជាអ្នកត្រួសត្រាយផ្លូវកីឡាទូកក្ដោងនៅកម្ពុជាលើកឡើងថា ការភ័យខ្លាចរបស់មិត្តគាត់ គឺស្រដៀងទៅនឹងអ្វីដែលគាត់ធ្លាប់ឆ្លងកាត់ពីមុន។
«ទូកក្តោងមានកម្ពស់ជាង ៤ ម៉ែត្រ ប៉ុន្តែខ្ញុំមានកម្ពស់ត្រឹមតែ ១,៥៣ ម៉ែត្រប៉ុណ្ណោះ ដូច្នេះវាមិនងាយស្រួលទេ»។ ថ្វីដ្បិតតែគាត់មានកម្ពស់ត្រឹមប៉ុណ្ណឹង ប៉ុន្តែកីឡាការិនី សំសូរិយា ឈរយ៉ាងខ្ពស់ត្រដែតជាអ្នកត្រួសត្រាយផ្លូវសម្រាប់កីឡាការិនីទូកក្តោងកម្ពុជានៅលើឆាកអន្តរជាតិ។ ដោយបានជម្នះលើការភ័យខ្លាច កីឡាការិនីរូបនេះបានជួយត្រួសត្រាយផ្លូវសម្រាប់ស្ត្រីខ្មែរផ្សេងទៀត មិនត្រឹមតែសម្រាប់កីឡាទូកក្តោងប៉ុណ្ណោះទេ ប៉ុន្តែសម្រាប់កីឡាជាទូទៅ។ camsoc
ស៊ុនហេង ត្រឡប់មកវិញ បន្ទាប់ពីជម្នះការលំបាក
កីឡាករ ហៀង ស៊ុនហេង បានវិលត្រឡប់មកវិញ បន្ទាប់ពីបានជម្នះនូវទុក្ខលំបាកជាច្រើនកន្លងមក។
ទុក្ខលំបាកកើតឡើងចំពោះមនុស្សខុសៗគ្នា ប៉ុន្តែសម្រាប់កីឡាករទូកក្តោង ហៀង ស៊ុនហេង គឺវាបានជួយកសាងនូវបុគ្គលិកលក្ខណៈ។ កីឡាករវ័យ ២១ ឆ្នាំរូបនេះ មានទុក្ខព្រួយយ៉ាងខ្លាំង បន្ទាប់ពីឪពុកមារបស់គាត់បានស្លាប់ភ្លាមៗ ដែលធ្វើឱ្យគាត់ស្ទើរតែបោះបង់កីឡាទូកក្តោងចោលទាំងស្រុង។
ស៊ុនហេង បានទៅកន្លែងហ្វឹកហាត់សម្រាប់ការប្រកួតកីឡាទូកក្តោងជ្រើសរើសជើងឯកអាស៊ីអាគ្នេយ៍ និងបានលើកទឹកចិត្តមិត្តរួមក្រុមកម្ពុជា នៅក្នុងវិញ្ញាសា RS One ដោយឈរនៅក្នុងចំណាត់ថ្នាក់ទី១ ទី២ និងទី៣ ដែលនាំមុខគូប្រជែងសិង្ហបុរី។
ស៊ុនហេង ថ្លែងថា៖ «ខ្ញុំបាត់បង់ឆន្ទៈធ្វើអ្វីៗទាំងអស់ បន្ទាប់ពីឪពុកមារបស់ខ្ញុំបានស្លាប់។ ប៉ុន្តែឥឡូវនេះខ្ញុំបានត្រៀមខ្លួនរួចហើយ និងប្រឹងប្រែងឱ្យអស់ពីសមត្ថភាពដើម្បីជាតិ និងកីឡា»។
ដោយបានបាត់បង់ឪពុកម្តាយតាំងពីគាត់នៅក្មេង ឪពុកមារបស់គាត់បានជួយចិញ្ចឹមបីបាច់គាត់។ ប៉ុន្តែគ្រោះថ្នាក់ចរាចរណ៍កាលពីចុងឆ្នាំ ២០១៩ បានឆក់យកជីវិតឪពុកមារបស់គាត់ ពេលនោះ ស៊ុនហេង កើតទុក្ខយ៉ាងខ្លាំង និងគ្មានឆន្ទៈបន្តអាជីពជាកីឡាករទូកក្តោងទៀតទេ។
ប៉ុន្តែ ១ សប្តាហ៍មុនការប្រកួតកីឡាទូកក្តោងជ្រើសរើសជើងឯកអាស៊ីអាគ្នេយ៍ឆ្នាំ ២០២១ នៅខេត្តព្រះសីហនុ ទើបគ្រូបង្វឹកកីឡាទូកក្តោងជម្រើសជាតិ លោក វីន កៅវាសនា (Vin Kao Veasna) បានលើកទឹកចិត្តឱ្យគាត់ត្រឡប់មកលេងកីឡានេះវិញ។ ស៊ុនហេង ដែលមានស្រុកកំណើតនៅខេត្តកំពង់ស្ពឺ បានចាប់អាជីពកីឡានេះ ដោយមានការគាំទ្រពីឳពុកមា ចាប់តាំងពីគាត់នៅវ័យក្មេងម្ល៉េះ។ ស៊ុនហេង មិនបានចូលរួមប្រកួតនៅខេត្តព្រះសីហនុទេ ដោយសារតែគាត់មិនបានហ្វឹកហាត់អស់រយៈពេល ២ ឆ្នាំ ប៉ុន្តែគាត់រំពឹងថា នឹងវិលត្រឡប់មករកភាពខ្លាំងរបស់ខ្លួនវិញ មុនពេលកម្ពុជាធ្វើជាម្ចាស់ផ្ទះកីឡាស៊ីហ្គេម នៅឆ្នាំ ២០២៣។
ឳពុកមារបស់គាត់បម្រើការងារនៅក្នុងកងទ័ពជើងទឹកកម្ពុជា និងបានស្នាក់នៅមូលដ្ឋានទ័ពជើងទឹករាម និងបានលើកទឹកចិត្ត ស៊ុនហេង ឱ្យចាប់យកអាជីពកីឡានេះ។ ស៊ុនហេង បានខិតខំប្រឹងប្រែង និងយកចិត្តទុកដាក់យ៉ាងខ្លាំង ដែលគាត់បានរៀនសូត្រពីមូលដ្ឋានគ្រឹះ រហូតស្ទាត់ជំនាញ និងមានល្បឿនលឿនជាងមិត្តភក្តិរបស់គាត់។
ក្នុងការចេញដំណើរទៅប្រកួតលក្ខណៈអន្តរជាតិលើកដំបូង នៅប្រទេសថៃ (Thai sailing hotbed Pattaya) គាត់បានបញ្ចប់នៅក្នុងចំណាត់ថ្នាក់លេខ ៥ ប៉ុន្តែការប្រកួតរបស់គាត់បានទាក់ទាញចំណាប់អារម្មណ៍អ្នកទស្សនាយ៉ាងខ្លាំង។
ថ្លែងនៅក្នុងព្រឹត្តិការណ៍ប្រកួតកីឡាទូកក្តោងជ្រើសរើសជើងឯកអាស៊ីអាគ្នេយ៍ នៅខេត្តព្រះសីហនុ គាត់បានឱ្យដឹងថា រយៈពេល ២ ឆ្នាំកន្លងមកនេះ មានបញ្ហាប្រឈមជាច្រើនសម្រាប់គាត់។ ស៊ុនហេង លើកឡើងថា៖ «ខ្ញុំមានអារម្មណ៍ថា រងសម្ពាធជាខ្លាំង ប៉ុន្តែបានធូរស្បើយ នៅពេលខ្ញុំមាន ឪពុកម្តាយចិញ្ចឹមម្នាក់ទៀត ទើបអ្វីៗបានផ្លាស់ប្តូរ»។
បច្ចុប្បន្នគាត់ គឺជាអ្នកបើកបរនៅក្នុងទីក្រុងភ្នំពេញ និងបានរស់នៅជាមួយមន្ត្រីទាហានចូលនិវត្តន៍ ដែលទើបទទួលយកគាត់ជាកូនចិញ្ចឹម។
នៅពេលដែលកម្ពុជាធ្វើជាម្ចាស់ផ្ទះកីឡាស៊ីហ្គេម ឆ្នាំ ២០២៣ ប្រាកដណាស់ថា យុវជនម្នាក់នេះ គឺមានសក្តានុពលខ្លាំង បន្ទាប់ពីគាត់បានជម្នះរាល់ការលំបាក ហើយកំពុងស្វែងរកភាពជោគជ័យនៅក្នុងជីវិតរបស់គាត់ម្តងទៀត៕ camsoc