ភ្នំពេញ៖ នាយកបេសកកម្មរង និងប្រធាននាយកដ្ឋានទំនាក់ទំនងអន្តរជាតិ នៃគណៈកម្មាធិការជាតិអូឡាំពិកកម្ពុជា (NOCC) លោក ញាន សុខវិសាល និង លោក ប៊ុយ សុភ័ណ្ឌ ទីប្រឹក្សា NOCC និងជាប្រធានគណៈកម្មាការព័ត៌មានវិទ្យារបស់ CAMSOC បានបន្តបេសកកម្ម ជាគ្រូឧទ្ទេស ដើម្បីបន្តរៀបចំការបញ្រ្ជាបគុណតម្លៃអូឡាំពិក និងផ្សព្វផ្សាយពីព្រឹត្តិការណ៍ស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣។
ចំពោះបេសកកម្មលើកនេះ លោក ញ៉ាន សុខវិសាល និង លោក ប៊ុយ សុភ័ណ្ឌ បានបន្តធ្វើ កាលពីព្រឹកថ្ងៃពុធ ដោយផ្តល់ជូនទៅដល់សិស្សានុសិស្ស នៅវិទ្យាល័យឬស្សីកែវ រាជធានីភ្នំពេញ ដែលមានសិស្សចំនួន ៥០ នាក់។
លោក ញ៉ាន សុខវិសាល បានប្រាប់ថា សម្រាប់ឆ្នាំ ២០២១ នេះ យើងមាន ៦ កម្មវិធីហើយកាលពីសប្តាហ៍មុន យើងបានធ្វើនៅវិទ្យាល័យចំនួន ២ នៅខេត្តកែប ចំណែកថ្ងៃនេះ យើងកំពុងធ្វើនៅវិទ្យាល័យឬស្សីកែវ រាជធានៅភ្នំពេញ។ ចំពោះកម្មវិធី នៅសល់ចំនួន ៤ ទៀត យើងនឹងបន្តធ្វើនៅវិទ្យាល័យមួយចំនួន ដែលកំពុងតែទំនាក់ទំនង ដូចជាវិទ្យាល័យដំបូកខ្ពស់ ជាដើម។
លោកបានបន្តថា៖ «NOCC បានរៀបចំឱ្យមានកម្មវិធីនេះ ដើម្បីបញ្ជ្រាបការផ្សព្វផ្សាយគុណតម្លៃអូឡាំពិក និងផ្សព្វផ្សាយពីដំណើរឆ្ពោះទៅទទួលរៀបចំធ្វើជាម្ចាស់ផ្ទះ ការប្រកួតកីឡាស៊ីហ្គេម-អាស៊ានប៉ារ៉ាហ្គេម ឆ្នាំ២០២៣។ អ្វីដែលសំខាន់ គឺការស្វែងយល់ពីសកម្មភាពចលនាអូឡាំពិក ដោយមានទស្សនផ្តោតទៅលើការអប់រំកាយ និងកីឡា ដើម្បីឱ្យសិស្សានុសិស្ស នៅតាមវិទ្យាល័យនានា នៅភ្នំពេញ និងតាមបណ្តាខេត្តមួយចំនួនទៀត បានលើកឡើងពីអ្វី ដែលជាសារសំខាន់ៗ នៃការចូលរួមក្នុងកីឡា»។
«ជាមួយគ្នានេះ គឺគុណតម្លៃអូឡាំពិក មានគោលបំណងផ្តល់ជូនដល់ស្រទាប់យុវជនឱ្យបានច្រើន និងបានយកទៅអនុវត្ត នៅក្នុងការរស់នៅរបស់ពួកគាត់ ព្រោះក្រៅពីការប្រកួត យើងមានការអប់រំកាយ និងចំណេះដឹងផ្នែកសុខភាពរាងកាយ ផងដែរ»។ លោក ញ៉ាន សុខវិសាល បានប្រាប់បន្ថែម។
ចំណែកលោក ប៊ុយ សុភ័ណ្ឌ បានប្រាប់ថា៖ «ចលនា និងគុណតម្លៃអូឡាំពិក ជាផ្នែកមួយចង់ផ្តល់ចំណេះដឹង ដល់យុវជន ដើម្បីយល់ដឹងថា ទស្សនរបស់អូឡាំពិក គឺការអប់រំចំណេះដឹងនិងរាងកាយ ព្រមទាំងការប្រកួតកីឡា ដែលគ្មានហិង្សា។ ជាមួយគ្នានេះ ស្របពេល ដែលកម្ពុជាធ្វើដំណើរឆ្ពោះទៅធ្វើម្ចាស់ផ្ទះការប្រកួតកីឡាស៊ីហ្គេម-អាស៊ានប៉ារ៉ាហ្គេម ឆ្នាំ២០២៣នោះ គឺបញ្ហាគុណតម្លៃអូឡាំពិក ត្រូវបានយកចិត្តទុកដាក់ច្រើនជាងពេលមុនៗ»។
លោកបានបញ្ជាក់ថា៖ «បន្ថែមពីលើនេះកម្មវិធីរបស់ NOCC យើងបានលើកទឹកចិត្តដល់សិស្សានុសិស្ស ដើម្បីឱ្យមានការចូលរួមក្នុងផ្នែកណាមួយ ក្នុងឋានៈជាអ្នកស្ម័គ្រចិត្ត ក្នុងគោលបំណង ដើម្បីឱ្យព្រឹត្តិការណ៍ប្រកួតកីឡាស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣ ទទួលបានលទ្ធផលល្អត្រចះត្រចង់»៕