.jpg)
បឺត សង្ឃឹម ត្រូវប្រកួតផ្តាច់ព្រ័ត្រ ដណ្តើមខ្សែក្រវាត់ ជាមួយ អេលីត ចំរើន។ សហការី
ភ្នំពេញៈ ការប្រកួតដ៏ធំ វគ្គផ្តាច់ព្រ័ត្រដណ្តើមយកខ្សែក្រវាត់ អមដោយប្រាក់រង្វាន់ចំនួន ១ ម៉ឺនដុល្លារ រវាងជើងខ្លាំង បឺត សង្ឃឹម និង អេលីត ចំរើន នឹងត្រូវធ្វើឡើង នៅលើសង្វៀន PNN នារសៀលថ្ងៃអាទិត្យ ប៉ុន្តែអ្នកទាំង ២ នេះ ហាក់ខ្លាចគ្នា ទោះបីជាគណៈកម្មការរៀបចំការប្រកួតបានអនុញ្ញាតឱ្យពួកគេ ហ្វឹកហាត់បំប៉នកម្លាំង និងពង្រឹងសមត្ថភាពចំនួន ៣ សប្តាហ៍ពេញ ត្រៀមការប្រកួតនេះក៏ដោយ។
បើពិនិត្យទៅលើប្រវត្តិប្រកួតរបស់អ្នកប្រដាល់ទាំង ២ នេះ បឺត សង្ឃឹម មានបទពិសោធ និងឡើងប្រកួតច្រើនជាង អេលីត ចំរើន ប៉ុន្តែលទ្ធផលជាក់ស្តែងវិញ បឺត សង្ឃឹម ទទួលបានភាពជោគជ័យតិចជាង ពោលគឺឈ្នះខ្សែក្រវាត់បានតែ ១ លើកប៉ុណ្ណោះ ចំណែក អេលីត ចំរើន ឈ្នះខ្សែក្រវាត់បានចំនួន ៣ ហើយ។
តែទោះជាយ៉ាងណា សម្រាប់ភាពរីកចម្រើនផ្នែកកម្លាំង និងវិជ្ជាគុន មកដល់បច្ចុប្បន្ន គឺ បឺត សង្ឃឹម និង អេលីត ចំរើន ពិតជាលំបាកទស្សន៍ទាយណាស់ ព្រោះពួកគេមានបច្ចេកទេសវាយផ្សេងៗគ្នា ដោយក្នុងនោះ របៀបប្រកួតរបស់ បឺត សង្ឃឹម គឺវាយតាមប្លង់ លក្ខណៈបច្ចេកទេសមួយៗ ដោយក្បាច់ទាត់ និងជង្គង់ ចំណែក អេលីត ចំរើន ពូកែទាត់ជើងឆ្វេង ចូលគោលដៅល្អ។
លោក ស៊ន អេលីត គ្រូបង្វឹក អេលីត ចំរើន បាននិយាយថា៖ «កន្លងមក អេលីត ចំរើនធ្លាប់ឈ្នះ បឺត សង្ឃឹម ដោយពិន្ទុម្តង ប៉ុន្តែចំពោះការប្រកួតវគ្គផ្តាច់ព្រ័ត្រ នៅថ្ងៃអាទិត្យនេះ ខ្ញុំមិនចង់និយាយច្រើន គឺខ្លាចគេដឹងពីរបៀបវាយ ព្រោះត្រូវតែសម្ងាត់ដូចគ្នា ដោយសមត្ថភាពរបស់ពួកគេ គឺល្អដូចគ្នា ហើយការចាញ់ឈ្នះ វាអាស្រ័យលើភាពឆ្លាត វ៉ៃប្តូរយុទ្ធវិធីភ្លាមៗ នៅសង្វៀនផ្ទាល់តែម្តង»។
គ្រូបង្វឹករូបនេះ បានបន្ថែមថា៖ «ខ្ញុំបានបង្វឹក អេលីត ចំរើន ដោយផ្ទាល់ដៃ ព្រមទាំងបំប៉នកម្លាំង និងមានស្នៀតពិសេស ដើម្បីយកឈ្នះ តែសង្ឃឹម ៥០ ភាគរយប៉ុណ្ណោះ។ ខ្ញុំមិនហ៊ានអួតទេ សម្រាប់គូនេះ គឺ ១ ចានទឹក ១ ចានគោក ខណៈដែលជ័យជម្នះ ទទួលបានខ្សែក្រវាត់ ១ អមដោយទឹកប្រាក់ ១ ម៉ឺនដុល្លារ គឺមិនងាយមានឱកាសបានមកដល់វគ្គនេះនោះឡើយ»។
ចំណែកលោក តាំង លីហួរ អ្នកកាន់កម្មវិធីកីឡាប្រចាំនៅសង្វៀន PNN និយាយថា៖ «នៅក្នុងជំនួបសម្ភាសជាមួយកីឡាករទាំង ២ នាក់នេះ គឺទាំង បឺត សង្ឃឹម និង អេលីត ចំរើន សុទ្ធតែបានខិតខំហ្វឹកហាត់ និងតាំងចិត្តប្រកួត ប៉ុន្តែទំនងខ្លាចគ្នា ដោយពួកគេ មិនអះអាងពីការឈ្នះ ឬមានប្រៀបលើគ្នាច្រើននោះទេ»។
កីឡាករធ្លាប់ប្រកួត ៨៤ ដង ឈ្នះ ៥៦ ចាញ់ ២៦ ស្មើ ២ ដង និងធ្លាប់ផ្តួលដៃគូឱ្យសន្លប់ចំនួន ៣០ ដង អេលីត ចំរើន បាននិយាយថា៖ «មិនទាន់ហ៊ាននិយាយមុនទេ ព្រោះគេក៏ហាត់យើងក៏ហាត់ ហេតុនេះខ្ញុំមានក្តីសង្ឃឹមត្រឹម ៥០ ភាគរយ តែធានាវ៉ៃឱ្យអស់ពីសមត្ថភាព»។
ចំណែក បឺត សង្ឃឹម ដែលធ្លាប់ប្រកួតបាន ១០៦ ដង ឈ្នះ ៨៤ ចាញ់ ២០ ស្មើ ២ និងផ្តួលគូប្រកួតឱ្យសន្លប់បាន ២២ ដង បាននិយាយថា៖ «ខ្ញុំសង្ឃឹមឈ្នះ ៦០ ភាគរយ តែយើងមិនហ៊ាននិយាយមុនទេ ព្រោះការចាញ់ ឬឈ្នះ អាចនឹងលំបាកតឹងតែងណាស់ ហេតុនេះបើយើងប្រថុយប្រថាន ឬវាយផ្សងព្រេង មិនអាចទៅរួច គឺមានតែវាយស្រង់យកពិន្ទុសិន ហើយបើមានឱកាសទើបសម្រុកផ្តាច់តែម្តង»៕
