ភ្នំពេញៈ ការប្រកួតកីឡាប្រដាល់សកលជ្រើសជើងឯកថ្នាក់ជាតិ ឆ្នាំ ២០២១ បានចាប់ដំណើរការ កាលពីថ្ងៃព្រហស្បតិ៍ និងគ្រោងបញ្ចប់ នៅថ្ងៃទី ២៦ ខែធ្នូ ហើយអ្វីដែលទាញការចាប់អារម្មណ៍ខ្លាំង សម្រាប់ការប្រកួតលើកនេះ គឺមានចំនួនអត្តពលិកចូលរួម កើនឡើងជាងឆ្នាំមុន ជិត ៣ ដង ហើយចំនួនក្លិប-សមាគម ដែលបានចូលរួម ក៏មានការកើនឡើងជិត ២ដងផងដែរ។
នៅក្នុងការប្រជុំបច្ចេកទេស មុនពេលប្រកួតនេះ កាលពីល្ងាចថ្ងៃពុធ បានបង្ហាញថា អត្តពលិកចំនួន ១០៤ នាក់ (ស្រី ៤ នាក់) មកពីក្លិប-សមាគមចំនួន ២១ បានចូលរួមការប្រកួតនេះ ហើយក្រុមបច្ចេកទេសនៅក្នុងអង្គប្រជុំ បានវាយតម្លៃថា ចំនួននេះ កើនឡើងជាងឆ្នាំ ២០២០ ជិត ៣ ដង និងមានក្លិបសមាគមកើនឡើងជិត ២ ដងឯណោះ។
លោក ប៊ុយ សោភ័ណ្ឌ អគ្គលេខាធិការសហព័ន្ធកីឡាប្រដាល់សកលកម្ពុជាថ្លែងថា៖ «បន្ទាប់ពីកិច្ចប្រជុំបច្ចេកទេស និងការចាប់ឆ្នោតរៀបចំផ្គូផ្គង តាមរូបមន្ត គឺឆ្នាំនេះ មានអត្តពលិកចូលរួមសរុប ១០៤ នាក់ កើនឡើងជិត៣ដង និងមានមកពី ២១ ក្លិបសមាគម ដែលកើនឡើងជិត ២ ដង បើប្រៀបធៀបនឹងការប្រកួតថ្នាក់ជាតិ កាលឆ្នាំ ២០២០ ដែលមានការរឹតបន្តឹងដោយសារជំងឺកូវីដ ១៩»។
នៅក្នុងកិច្ចប្រជុំបច្ចេកទេសនោះដែរ គណៈកម្មការបច្ចេកទេស ជាពិសេសលោកវេជ្ជបណ្ឌិត ឆឹង យ៉ៅយ៉េន ជាប្រធានសហព័ន្ធកីឡាប្រដាល់សកលកម្ពុជា បានណែនាំឱ្យគ្រប់ក្លិបសមាគមទូទាំងប្រទេស ដែលចូលរួមប្រកួតជើងឯកថ្នាក់ជាតិ ឆ្នាំ ២០២១ នេះ ត្រូវប្រកាន់ខ្ជាប់នូវវិធានការបង្កាជំងឺកូវីដ ១៩ តាមការណែនាំរបស់ក្រសួងសុខាភិបាល ក៏ដូចក្រសួងអប់រំ យុវជន និងកីឡា ឱ្យបានល្អ និងគោរពបទបញ្ជាប្រកួត និងក្រមសីលធម៌ គឺឈ្នះដឹងឈ្នះ ចាញ់ដឹងចាញ់ដោយតម្លាភាព។
ជាមួយគ្នានោះ លោកវេជ្ជបណ្ឌិត ឆឹង យ៉ៅយ៉េន បានប្រាប់ទៅចៅក្រមអាជ្ញាកណ្តាល គឺត្រូវប្រកាន់ខ្ជាប់នូវភាពយុត្តិធម៌ ក្នុងការផ្តល់ពិន្ទុ និងសម្រេចក្តីក្រោយ ក្នុងពេលប្រកួត ខណៈការប្រកួតប្រដាល់សកលថ្នាក់ជាតិ ឆ្នាំ ២០២១ នេះ ផ្នែកនារី មានតែការប្រកួតទម្ងន់ ៥៧ គីឡូក្រាម ១ ទេ ចំណែកកីឡាករ មានការប្រកួតចំនួន ៩ ប្រភេទទម្ងន់។
ទោះជាយ៉ាងណា ចំណែកកញ្ចប់ថវិកាចំនួន ៨០ លានរៀល ប្រចាំឆ្នាំនេះ របស់ក្រសួងអប់រំ យុវជន និងកីឡា សម្រាប់ចំណាយទាំងទៅលើផ្នែករដ្ឋបាល ការបណ្តុះបណ្តាល និងការប្រកួតថ្នាក់ជាតិប្រចាំឆ្នាំនេះ ត្រូវបានលោក ប៊ុយ សុភ័ណ្ឌ អះអាងថា មិនទាន់បានគ្រប់គ្រាន់ពេញលេញនៅឡើយទេ ប៉ុន្តែសហព័ន្ធ រកបានដៃគូឧបត្ថម្ភពីវិស័យឯកជនមានក្រុមហ៊ុន TF Motors (Cambodia) Co., Ltd វិទ្យាស្ថានខេមអេដ និងអគារប្តូរប្រាក់ ទៀ ប៊ុនហាក់ សម្រាប់ទប់ទល់លើការចំណាយបន្ថែម ទៅលើការប្រកួតថ្នាក់ជាតិ នៅឆ្នាំ ២០២១ នេះ៕