ភ្នំពេញៈ កីឡាករកំពុងមាន សមត្ថភាពខ្លាំង ឡុង បេនលឿន និងអ្នកប្រដាល់វាយមិនដកថយ ធន់ ចាន់តាក់ ដែលសុទ្ធតែធ្លាប់បានឈ្នះប្រាក់លាន នៅក្នុងការប្រកួតម៉ារ៉ាតុង ដណ្តើមប្រាក់លាន នៅលើសង្វៀនថោន ត្រូវបានគេមើលឃើញថា នៅជាបេក្ខភាពដែលមានភាគរយខ្ពស់ ក្នុងការឈ្នះប្រាក់លានជាថ្មី ខណៈអ្នកទាំង ២ ត្រូវបានដាក់ឱ្យប្រកួតម្តងទៀតជាមួយ សួន ចាន់នី និង ចាន់ ប៊ុនលាភ នៅថ្ងៃអាទិត្យនេះ។
សម្រាប់ការទទួលបានឱកាសឡើងប្រកួតដណ្តើមប្រាក់លានជាថ្មីនេះ ឡុង បេនលឿន នៅតែមានទំនុកចិត្តខ្ពស់ ក្នុងការឈ្នះបានប្រាក់លាន បើទោះបីជា ការប្រកួតលើកនេះ រូបគេគិតថា មានការពិបាកជាងពេលមុនៗក៏ដោយ ព្រោះទាំង ធន់ ចាន់តាក់ និង សួន ចាន់នី សុទ្ធតែទើបចាញ់ បេនលឿន ខណៈ ចាន់ ប៊ុនលាភ អាចចាញ់កម្លាំង។
កីឡាករ ឡុង បេនលឿន ដែលធ្លាប់ឈ្នះបានប្រាក់លាន នៅក្នុងកម្មវិធីនេះបានចំនួន ២ ដងនោះ បាននិយាយថា៖ «សម្រាប់ការប្រកួត នៅថ្ងៃអាទិត្យនេះ ទោះចាប់ឆ្នោតប៉ះចំមួយណា ក៏លំបាក និងតឹងតែងដែរ ព្រោះសុទ្ធតែជើងចាស់ មានបទពិសោធច្រើនដូចគ្នា។ តែទោះជាយ៉ាងណា ខ្ញុំនឹងប្រឹងយកឈ្នះឱ្យបាន គឺមានទំនុកចិត្តឈ្នះ ៨០ ភាគរយ»។
ផ្ទុយពីនេះ លោក ឡុង សាវ័ន្ត ជាគ្រូបង្វឹក មិនហ៊ានអះអាងលទ្ធផលទុកមុននោះទេ ដោយលោកបានប្រាប់ថា ការប្រកួតនេះ ឡុង បេនលឿន ប៉ះប្រកួតជាមួយម្នាក់ណា ក៏មានការពិបាកឈ្នះដែរ ព្រោះ បេនលឿន ប្រកួតជាប់ៗគ្នារាល់សប្តាហ៍ពេក អ៊ីចឹងគឺឈឺខ្លួនលំបាកសង្ឃឹមណាស់។
តែទោះបីជាយ៉ាងណា លោក ធន់ សុភា គ្រូបង្វឹករបស់ ធន់ ចាន់តាក់ បានចាត់ទុក ឡុង បេនលឿន ជាឧបសគ្គ ដោយលោកប្រាប់ថា៖ «សម្រាប់៣នាក់នេះ ប្រសិនបើ ចាន់តាក់ ចាប់ឆ្នោតប៉ះក្រៅពី បេនលឿន គឺការប្រកួតធូរបន្តិច ហើយមានបញ្ហាលំបាកមួយទៀត គឺ ចាន់តាក់ មានកម្ពស់ទាបជាងដៃគូទាំងអស់ ប៉ុន្តែបើ ចាន់តាក់ ចូលលេងកណ្តាប់ដៃបាន សង្ឃឹមឈ្នះតែម្តង ហេតុនេះខ្ញុំជាគ្រូសង្ឃឹមឈ្នះ ៧០ ភាគរយ»។
ចំណែកលោក សួន ប៊ុនសូត្រ គ្រូបង្វឹក និងជាឪពុក សួន ចាន់នី ក៏មានការបារម្ភទៅលើ ឡុង បេនលឿន ផងដែរ។ «ចាន់នី វាហាត់បានល្អ តែវាធ្លាប់ចាញ់ ឡុង ប៊ុនលឿន ថ្មីៗនេះ ចំនួន ២ដងហើយ ហើយ ២ ប្រកួតចុងក្រោយ វាចាញ់ម្តង និងឈ្នះម្តងជាមួយ មឿន សុខហ៊ុច»។ លោក សួន ប៊ុនសូត្រ បានបន្ថែមថា៖ «ខ្ញុំមានរំពឹងឈ្នះបានជើងឯក ប្រសិនបើចាប់ឆ្នោតគេចផុត មិនជួបប្រកួតជាមួយ ឡុង បេនលឿន»។
ចំពោះ ចាន់ ប៊ុនលាភ មិនអាចទាក់ទងបានទេ ប៉ុន្តែតាមរយៈគណៈកម្មការផ្គូផ្គងប្រចាំសង្វៀនថោន លោក ជួប វុត្ថា បាននិយាយថា កីឡាករ ចាន់ ប៊ុនលាភ ខកខានប្រកួតយូរដែរ គឺបាត់ឃើញៗ។ លោកបន្តថា ប៊ុនលាភ មានចំណុចខ្សោយ តែបញ្ហាធ្លាក់កម្លាំង នៅចុងទឹកប៉ុណ្ណោះ ចំណែកបច្ចេកទេស ធានានៅល្អដដែល។
តាមស្តិតិប្រកួតរបស់កីឡាករទាំង ៤ នេះ សួន ចាន់នី ធ្លាប់ប្រកួតបានច្រើនជាងគេ គឺបាន ១២៩ ដង ឈ្នះ ១០០ ចាញ់ ២៦ ស្មើ ៣ ដង (ផ្តួលដៃគូឱ្យសន្លប់បាន ២០ ដង) ចំណែក ឡុង បេនលឿន នៅខ្ចីវស្សាជាង ដោយប្រកួត ៨៣ ដង ឈ្នះ ៦៩ ចាញ់ ១១ ស្មើ ៣ ដង (វ៉ៃគេឱ្យសន្លប់បាន ៩ ដង) ហើយ ធន់ ចាន់តាក់ ប្រកួតបាន ៨៧ ដង ឈ្នះ ៦៤ ចាញ់ ២០ ស្មើ ៣ ក្នុងនោះផ្តួលដៃគូឱ្យសន្លប់បាន ៣០ ដង រីឯ ចាន់ ប៊ុនលាភ ប្រកួតបាន ៨៧ ដង ឈ្នះ ៥៣ ដង ចាញ់ ២៩ និងស្មើ ៥ ដង ក្នុងនោះផ្តួលដៃគូឱ្យសន្លប់បាន ៥ ដង៕