.jpg)
Daniel Amartey (ឆ្វេង) របស់ Leicester ព្យាយាមបិទ Sterling របស់ Man City អំឡុងការប្រកួត នៅ Premier League កាលពីថ្ងៃអាទិត្យ។
ក្រុងមេនឆេស្ទ័រ: ក្រុមមេឃខៀវ Manchester City បាន និងកំពុងនាំមុខដាច់ ៦ពិន្ទុ នៅទីកំពូលតារាងនៃក្របខ័ណ្ឌ Premier League បន្ទាប់ពីបានរារាំងមិនឱ្យក្រុមកញ្ជ្រោងខៀវ Leicester City វាយបកបានសម្រេច ដោយការយកឈ្នះ ក្នុងលទ្ធផល ៦-៣ កាលពីថ្ងៃអាទិត្យ។
ក្រុមដ៏ពុះកញ្ជ្រោល Man City របស់លោក Pep Guardiola (Pep)ស៊ុតបញ្ចូលទីក្រុមភ្ញៀវ Leicester ដល់ទៅ ៤គ្រាប់ ត្រឹមរយៈពេលតែ ២៥នាទីប៉ុណ្ណោះ ក្នុងវគ្គទី ១ នៃការប្រកួតដ៏គួរឱ្យជក់ចិត្ត នាកីឡដ្ឋាន Etihad ដោយក្នុងនោះប្រធានក្រុម Kevin De Bruyne ជាអ្នកស៊ុតគ្រាប់បើកឆាក មុននឹងកីឡាករ Riyad Mahrez (ប៉េណាល់ទី), Ilkay Gundogan និង Raheem Sterling (ប៉េណាល់ទី) បន្ថែមពីក្រោយបន្តបន្ទាប់គ្នា។
យ៉ាងណាក្ដី ក្រុម Leicester ចាប់ផ្ដើមមានក្ដីសង្ឃឹមឡើងវិញ នៅពេលដែលខ្សែបម្រើទាំង ២ James Maddison និង Ademola Lookman ព្រមទាំងខ្សែបយុទ្ធ Kelechi Iheanacho ទម្លុះសំណាញ់ទីម្នាក់ ១គ្រាប់ ក្នុងចន្លោះប្រមាណជា ១០នាទី នៅដើមវគ្គទី ២ ដែលធ្វើឱ្យគ្រាប់បាល់នាំមុខនៅសល់តែ ១គ្រាប់ប៉ុណ្ណោះ។
តែខ្សែការពារ Aymeric Laporte បានបំផ្លាញក្ដីសង្ឃឹមរបស់ក្រុមកញ្ជ្រោងខៀវជាមួយនឹងការតែតគ្រាប់ទី ៥ ឱ្យក្រុម Man City មុននឹងខ្សែប្រយុទ្ធ Sterling ធ្វើបានសម្រេចគ្រាប់ទី ២ របស់ខ្លួន ក្នុងហ្គេមនេះ នៅនាទីចុងក្រោយ ហើយក៏គ្រាប់បាល់ ដែលនាំឱ្យនេះ ក្លាយជាការស៊ុតបូកបញ្ចូលគ្នាច្រើនគ្រាប់បំផុត សម្រាប់ការប្រកួត នៅថ្ងៃ Boxing Day (ការប្រកួត ក្រោយថ្ងៃបុណ្យគ្រិស្តស្មាស់) របស់លីគកំពូលអង់គ្លេស គិតតាំងពីក្រុមបិសាចក្រហមឈ្នះ Manchester United ក្រុម Oldham ក្នុងលទ្ធផលដូចគ្នានេះដែរ កាលពីឆ្នាំ១៩៩១។
លោក Pep នៅក្រោយការប្រកួតបញ្ចប់ទៅ បានប្រាប់ទៅអ្នកសារព័ត៌មានថា៖ «វាមានការប្រែប្រួលលឿនមែនទែន ពោលជាហ្គេម នៅថ្ងៃ Boxing Day ដែលមានការស៊ុតបញ្ចូលទីច្រើនគ្រាប់បំផុត។ សម្រាប់គ្រប់គ្នា វាជាការប្រកួតដ៏គួរឱ្យចង់មើល។ វាជាជ័យជម្នះមួយទៀត ដែលជាការសំខាន់ណាស់ ក្នុងការបន្តដំណើរផ្លូវរបស់យើង តែវារាងប្លែកៗបន្តិច។ នៅពេលលទ្ធផល ៤-២ គំនិតរបស់កីឡាករ បានចាប់ផ្ដើមប្រែប្រួល»។
Mahrez ស៊ុតបាល់ប៉េណាល់ទីឱ្យ Man City នាំមុខ Leicester ២-០ អំឡុងការប្រកួត នៅ Premier League កាលពីថ្ងៃអាទិត្យ។
«ពេលលទ្ធផល ៤-៣ ហ្គេមស្ទើរតែស្មើគ្នា ឬសូម្បីតែខាងក្រុមគេទំនងជាអាចឈ្នះទៀតផង ព្រោះការគិតរបស់ពួកគេ ពិតជាមានកម្រិតខ្ពស់ ហើយពួកយើងខ្លួនឯង ហាក់មានភាពមិនច្បាស់លាស់។ តែយើងមានភាពអត់ធ្មត់ និងបានបង្កើតឱកាសជាច្រើន ហើយជាមួយនឹងការរៀបចំបានល្អ ទីបំផុតយើងក៏ឈ្នះហ្គេមនេះ»។ នេះជាការបន្ថែមរបស់អ្នកចាត់ការសញ្ជាតិអេស្ប៉ាញ។
ដោយការប្រកួតរបស់ក្រុមលេខ ២ Liverpool ជាមួយ Leeds កាលពីថ្ងៃអាទិត្យ ត្រូវបានផ្អាក ដោយសារមានការឆ្លងពីវីរុសកូរ៉ូណានោះ ក្រុមមេឃខៀវ អាចបន្តបន្លាយការនាំមុខរបស់ខ្លួនបន្ថែមទៀតលើក្រុមគូប្រជែងពានដ៏ចម្បងរបស់ខ្លួន។
ក្រុមការពារជើងឯក Man City ទាំងលើកនេះផង ឈ្នះដល់ទៅ ៩លើកជាប់ៗគ្នាហើយ សម្រាប់ការប្រកួត ក្នុងលីគ ដោយក្នុងនោះស៊ុតបញ្ចូលទីចំនួន ១៧គ្រាប់ សម្រាប់ ៣ហ្គេមចុងក្រោយ ខណៈដែលពួកគេផ្ដាច់ឆ្នាំ២០២១ ជាមួយនឹងស្ទាយល៍លេងដ៏គួរឱ្យខ្លាចរអារ៕ AFP/VN
