.jpg)
លោកបណ្ឌិត ថោង ខុន ពេលដឹកនាំអង្គប្រជុំរបស់គណៈកម្មការ CAMSOC កាលពីព្រឹកថ្ងៃអង្គារ។ រូបថត CAMSOC
ភ្នំពេញ៖ អគ្គលេខាធិការនៃគណៈគម្មាធិការជាតិរៀបចំស៊ីហ្គេម ឆ្នាំ ២០២៣ (CAMSOC) បានអះអាងថា លោកបណ្ឌិត ថោង ខុន នៅក្នុងកិច្ចប្រជុំ កាលពីព្រឹកថ្ងៃអង្គារ បានណែនាំដល់គណៈកម្មការជំនាញរបស់ខ្លួនទាំងអស់ ឱ្យផ្តោតទៅលើការរៀបចំទីលានប្រកួត ការត្រៀមលើការហូបចុក ស្នាក់នៅ ព្រមទាំងការគ្រប់គ្រងពហុកីឡដ្ឋានជាតិមរតកតេជោ និងភូមិកីឡាជាដើម ឱ្យបានល្អប្រសើរ។
ជាមួយគ្នានោះគណៈអចិន្ត្រៃយ៍ CAMSOC កំពុងស្នើសុំគោលការណ៍ពីលោកឧបនាយករដ្ឋមន្ត្រីរដ្ឋមន្រ្តីក្រសួងការពារជាតិ និងជាប្រធាន CAMSOC ទៀ បាញ់ ដើម្បីរៀបចំសិក្ខាសាលាមួយ ស្តីពីអភិបាលកិច្ចល្អ ក្នុងគោលដៅជំរុញឱ្យការត្រៀមលក្ខណៈសម្បត្តិ ធ្វើជាម្ចាស់ផ្ទះរបស់កម្ពុជា មានភាពរលូនគ្រប់ជ្រុងជ្រោយ ទៅតាមផែនគម្រោងមេ។
នៅក្រោយកិច្ចប្រជុំ ប្រចាំសប្តាហ៍របស់ CAMSOC កាលពីព្រឹកថ្ងៃអង្គារនេះ លោក វ៉ាត់ ចំរើន ជាអគ្គលេខាធិការ CAMSOC បានប្រាប់ប្រព័ន្ធផ្សព្វផ្សាយថា៖ «ទិសដៅបន្ត សម្រាប់ឆ្នាំ ២០២២ ខាងមុខ គឺត្រៀមរៀបចំធ្វើសិក្ខាសាលា ស្តីពីអភិបាលកិច្ចល្អ ក្នុងការគ្រប់គ្រង ឆ្ពោះទៅធ្វើម្ចាស់ផ្ទះការប្រកួតកីឡាស៊ីហ្គេម-អាស៊ានប៉ារ៉ាហ្គេម ឆ្នាំ ២០២៣ ហើយសិក្ខាសាលានេះ នឹងធ្វើឱ្យកាន់តែមានភាពច្បាស់លាស់ ប្រកបដោយតម្លាភាព គណនេយ្យភាព និងភាពស្មោះត្រង់ ក្នុងការងារប្រកបដោយការទទួលត្រូវខ្ពស់»។
ជាមួយនោះ សិក្ខាសាលា នឹងរៀបចំចងក្រង នូវក្រមសីលធម៌ ដាក់ជូនដល់គណៈកម្មការជំនាញទាំងអស់ ក្រោមការគ្រប់គ្រងរបស់ CAMSOC ព្រមទាំងអាជ្ញាធរ និងភាគីពាក់ព័ន្ធទាំងអស់ ដើម្បីជំរុញឱ្យការអនុវត្តផែនការមេស៊ីហ្គេម ឆ្នាំ ២០២៣ សម្រេចជោគជ័យល្អ អ៊ីចឹងឆ្នាំ ២០២២ គឺជាដំណាក់កាលរៀបចំអនុវត្ត ដំណើរការស៊ីហ្គេម ឆ្នាំ ២០២៣ និងឱ្យគ្រប់ការងារទាំងអស់ បានដំណើរឆ្ពោះទៅព្រមគ្នា ប្រកបដោយរលូនច្បាស់លាស់។
លោក វ៉ាត់ ចំរើន បានបន្ថែមថា៖ «ឯកឧត្តមបណ្ឌិត ថោង ខុន ក្នុងនាមជាប្រធានក្រុមប្រឹក្សាកីឡាអាស៊ីអាគ្នេយ៍ នឹងដឹកនាំកិច្ចប្រជុំសមាជិកអាស៊ីអាគ្នេយ៍ ដែលមាន ១១ ប្រទេស នៅខែកុម្ភៈ ឆ្នាំ ២០២២ ដើម្បីកំណត់បង្ហាញពីវិញ្ញាសា និងប្រភេទកីឡាឱ្យបានរួចរាល់ទាំងអស់»។
អគ្គលេខាធិការរូបនេះ បានបន្ថែមទៀតថា៖ «យើងបានធ្វើកិច្ចការទាំងអស់នេះ ជាជំហានៗ ហើយបានយកគោលការណ៍ណែនាំរបស់សម្តេចពិជ័យសេនា ទៀ បាញ់ ក្នុងឱកាសបើកសម្ពោធវិមានកីឡដ្ឋាន នៃពហុកីឡដ្ឋានជាតិមរតកតេជោ កាលពីថ្ងៃទី ១៨ ខែធ្នូ ឆ្នាំ ២០២១ ដែលបានដាក់ចេញនូវសារៈសំខាន់ៗនោះ យកមកអនុវត្ត សម្រាប់ឆ្នាំ ២០២២ និងឆ្នាំ ២០២៣ ដែលជាឆ្នាំគន្លឹះស៊ីហ្គេម និងអាស៊ានប៉ារ៉ាហ្គេម»។
ចំណែកបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងជាអនុប្រធានអចិន្ត្រៃយ៍CAMSOC ដែលបានដឹកនាំកិច្ចប្រជុំ ដើម្បីពិនិត្យរៀបចំរបាយការណ៍បូកសរុបប្រចាំឆ្នាំ ២០២១នេះ បានថ្លែងថា៖ «យើងរៀបចំ ដើម្បីទទួលភ្ញៀវអត្តពលិកអន្តរជាតិ ប្រកបដោយកិត្តិយស និងសេចក្តីថ្លៃថ្នូ ក្នុងឋានៈកម្ពុជាជាម្ចាស់ផ្ទះ ការប្រកួតកីឡាស៊ីហ្គេម លើកទី ៣២ និងការប្រកួតកីឡាជនពិការអាស៊ានប៉ារ៉ាហ្គេម លើកទី ១២ ឆ្នាំ ២០២៣ គឺជាប្រវត្តិសាស្ត្រនៃកម្ពុជា ដែលយើងទាំងអស់គ្នាគប្បីយកចិត្តទុកដាក់បំផុត»៕
