.jpg)
កីឡាករ ថា សារុន, ខាន់ ឃន, ឌុន រៃយ៉ា និងសេក គឹមសាន្ត ត្រូវប៉ះគ្នា នៅថ្ងៃអាទិត្យ។ រូបថត សហការី
ភ្នំពេញ: អ្នកប្រដាល់ឆ្នើមចំនួន ៤ នាក់ ក្នុងទម្ងន់ ៦០ គីឡូក្រាម ដែលត្រៀមខ្លួន ក្នុងការចាប់ឆ្នោតចូលរួមប្រកួតដណ្តើមយកប្រាក់ចំនួន ៣ លាន ៤ សែនរៀល ត្រូវបានរៀបរយរួចហើយ ដើម្បីប្រកួតនៅព្រលប់ថ្ងៃអាទិត្យ ទី ២ ខែ មករា ឆ្នាំ ២០២២ នៅសង្វៀនថោន ខណៈដែលកីឡាករ ថា សារុន មកពីក្លិបពុទ្ធសេរីវង្ស (ពីមុនឈ្មោះ សឹង្ហ សារុន) ដែលគេកត់សម្គាល់ឃើញថា មានបទពិសោធចាស់វស្សាជាងគេនោះ ត្រូវដាក់ឲ្យប្រកួតប្រជែងជាមួយដៃគូ ៣ នាក់ទៀត មានកីឡាករសេក គឹមសាន្ត មកពីសៀមរាប ខាន់ ឃន មកពីក្លិបបញ្ជាការដ្ឋាន និងឌុន រៃយ៉ា មកពីក្លិបអេភូថង ដោយកីឡាករទាំងនោះនឹងតទល់គ្នា ក្នុងការប្រកួត ២ វគ្គនៃពេលតែមួយ។
ក្នុងសមាសភាពអ្នកប្រដាល់ចំនួន ៤ រូប ដែលត្រៀមសម្រាប់ការប្រកួតដណ្តើមទឹកប្រាក់ប្រចាំសប្តាហ៍នេះ វត្តមានរបស់កីឡាករ ថា សារុន ត្រូវបានគេស្គាល់ថា ជាកីឡាករចាស់-វស្សាជាងគេ ខណៈកីឡាករ ៣ នាក់ទៀត ដែលចូលខ្លួនមកចាប់ឆ្នោតប្រកួត គឺមាន ខាន់ ឃន, ឌុន រៃយ៉ា និងសេក គឹមសាន្ត ក្នុងប្រភេទទម្ងន់ ៦០ គីឡូក្រាមដូចគ្នានោះ ត្រូវបានគេមើលឃើញថា ខ្ចីវស្សាជាង ប៉ុន្តែការប្រកួតរបស់ពួកគេ ជាកីឡាករចិត្តធំ ចូលវាយសម្រុកខ្លាំងៗអស់ពីសមត្ថភាព។
សម្រាប់ប្រវត្តិនៃការប្រកួតរបស់កីឡាករទាំងនោះ ថា សារុន ធ្លាប់ប្រកួតចំនួន ៩៧ លើក ឈ្នះ ៦០ លើក ចាញ់ ៣៥ លើក និងស្មើ ២ លើក ក្នុងនោះផ្តួលដៃគូឲ្យសន្លប់បានចំនួន ១២ លើក។ ខាន់ ឃន ប្រកួតបាន ៣៣ លើក ឈ្នះ ២៨ លើក ចាញ់ ៣ លើក និងស្មើ ២ លើក ក្នុងនោះផ្តួលដៃគូឲ្យសន្លប់បានចំនួន ៩ លើក។ ឌុន រៃយ៉ា ប្រកួតបានចំនួន ៦០ លើក ឈ្នះ ៣៥ លើក ចាញ់ ១០ លើក និងស្មើ ៥ លើក ក្នុងនោះផ្តួលដៃគូឲ្យសន្លប់បានចំនួន ១២ លើក ហើយសេក គឹមសាន្ត ធ្លាប់ប្រកួតបានចំនួន ៩៧ លើក ឈ្នះ ៦២ លើក ចាញ់ ៣០ លើក និងស្មើ ៥ លើក ក្នុងនោះផ្តួលដៃគូឲ្យសន្លប់បានចំនួន ១៧ លើក។
លោក ជួប វុត្ថា អ្នកផ្គូផ្គងប្រចាំសង្វៀនថោន បាននិយាយថា៖ «សម្រាប់សមាសភាពអ្នកប្រដាល់ចំនួន ៤ រូបនេះ បើពិនិត្យទៅលើបទពិសោធ និងសមត្ថភាព យើងឃើញថា កីឡាករ ថា សារុន ល្អជាងគេ ចាស់វស្សាជាងគេ តែអាចមានចំណុចខ្សោយជាងគេវិញ ដោយបញ្ហាកម្លាំង ពីព្រោះមានអាយុចាស់ជាងគេ។ តែបើពិនិត្យទៅមើលពីបច្ចេកទេសប្រយុទ្ធវិញ ថា សារុន មានប្រៀបផ្នែកក្បាច់កែង និងជង្គង់ ដោយចំណុចខ្សោយ គឺគ្រាន់តែខ្លាចខ្សោយកម្លាំង នៅចុងទឹកប៉ុណ្ណោះ។ តែយ៉ាងណា នេះក៏ជាឱកាសថ្មីមួយទៀតរបស់ ថា សារុន ក្នុងការដណ្តើមយកប្រាក់រង្វាន់ប្រចាំសប្តាហ៍ ខណៈដែលដៃគូប្រជែងភាគច្រើនជើងថ្មីជាង»។
ថា សារុន និយាយថា៖ «ខ្ញុំក៏គិតថា មានឱកាសឈ្នះប្រាក់លានពេលនេះ តែក្នុងចំណោមអ្នកប្រដាល់ទាំង ៣ នាក់នេះ មានកីឡាករម្នាក់ គឺ សេក គឹមសាន្ត ជាឧបសគ្គធំដែរ គឺមិនងាយយកឈ្នះឡើយ។ ទោះជាយ៉ាងណា ខ្ញុំនៅតែប្រឹងប្រែង ដើម្បីប្រាក់រង្វាន់មួយនេះ ព្រោះជាឱកាសល្អបំផុតនាពេលនេះ ដើម្បីស្វាគមន៍ឆ្នាំថ្មី»។
លោក ណន រិទ្ធ គ្រូបង្វឹក បាននិយាយថា៖ «សារុន ហ្វឹកហាត់បានល្អ ដោយសង្ឃឹមដណ្តើមបានប្រាក់លាននេះឱ្យបានមុ្តង។ ខ្ញុំក៏មើលឃើញថា សារុន មានប្រៀបផ្នែកបច្ចេកទេសជង្គង់ និងទាត់ល្អដែរ ប៉ុន្តែពិបាកសន្និដ្ឋានចំពោះការវាយសម្រុកខ្លាំងៗជាប់ៗគ្នា អាចប្រឈមទៅនឹងកម្លាំងធ្លាក់ចុះ។ ខ្ញុំសង្ឃឹមឈ្នះដល់ទៅ ៨០ ភាគរយ»។
កីឡាករ ខាន់ ឃន និង ឌុន រៃយ៉ា ជាកីឡាករជំនាន់ក្រោយទឹកចិត្តប្រកួតខ្លាំង តែលោក ណន រិទ្ធ បានបញ្ជាក់ថា គ្មានឧបសគ្គធំនោះទេ ព្រោះបទពិសោធនៅខ្ចីជាង។ ជាមួយគ្នានេះ ខាន់ ឃន និងឌុន រៃយ៉ា និយាយខ្លីស្រដៀងគ្នាថា មិនទាន់ដឹងយ៉ាងណាទេ ប៉ុន្តែធានាវ៉ៃអស់ពីសមត្ថភាព។
ចំណែកលោក សេក គឹមស៊ន គ្រូបង្វឹក សេក គឹមសាន្ត និយាយថា៖ «ខ្ញុំមិនហ៊ាននិយាយមុនទេចាំមើលទៅ ប្រសិនបើ ថា សារុន មានឱកាសប៉ះជាមួយ សេក គឹមសាន្ត ពិតជាលំបាកហើយ មិនមែនស៊ីផុយទេ»៕
