.jpg)
បេក្ខភាពត្រៀមការប្រកួតទាំង ៨ នាក់ បានថតជាមួយថ្នាក់ដឹកនាំ និងម្ចាស់ឧបត្ថម្ភ ក្នុងសន្និសីទកាសែត។ ហេង ជីវ័ន
ភ្នំពេញៈ ព្រឹត្តិការណ៍ប្រកួតថ្មីឈ្មោះថា «អធិរាជគុនខ្មែរ ISI PIPE-ISI PALM» ដែលត្រូវបានបង្កើតឡើង នៅលើសង្វៀនថោន ក្រោមការសហការជាមួយនឹងម្ចាស់ឧបត្ថម្ភក្រុមហ៊ុន ISI STEEL និងសហព័ន្ធកីឡាប្រដាល់គុនខ្មែរនោះ នឹងក្លាយជាការប្រកួតដ៏ធំ ប្លែក មិនធ្លាប់មាននៅកម្ពុជា ហើយប្រាក់រង្វាន់ក៏ច្រើនទៀត។
កីឡាករជើងខ្លាំងលំដាប់ល្អៗទម្ងន់ ៦០ គីឡូក្រាម នៅក្នុងស្រុកចំនួន ៨ នាក់ ត្រូវបានសម្រិតសម្រាំងរួចហើយ ដើម្បីត្រៀមការប្រកួតនេះ ដោយពួកគេត្រូវបានបែងចែកជា ២ ពូល ក្នុងនោះ ពូល A មានកីឡាករ ម៉ន សាម៉េត, វេង សុភ័ក្រ, ជ័រ ពៅ និង ចាន់ សំអាត ខណៈពូល B មានកីឡាករ អេលីត ចំរើន, សេក ចៅជូត, ឈុត សេរីវ៉ាន់ថន និង វ៉ាន់ វឿន ហើយនេះជាកម្មវិធីមួយទៀតរបស់សង្វៀនថោន ដែលត្រូវប្រកួតចាប់ពីម៉ោង ១១ ថ្ងៃត្រង់តទៅ គឺបន្ថែមទៅលើកម្ម-វិធីចាស់ ដែលធ្វើពេលល្ងាច នៅថ្ងៃអាទិត្យដូចគ្នា។
តាមលោក ជួប វុត្ថា អ្នកផ្គូផ្គង និងជាអ្នកសម្របសម្រួលប្រចាំសង្វៀនថោន បានឱ្យដឹងថា កីឡាករកម្ពុជាទាំង ៨ នាក់នេះ ត្រូវប្រកួតគ្នា នៅតាមពូលរៀងៗខ្លួន ហើយអ្នកបានលេខ ១ នៅតាមពូលទាំង ២ នឹងទទួលបានខ្សែក្រវាត់មាស ១ ម្នាក់ អមដោយប្រាក់រង្វាន់ចំនួន ៤ ពាន់ដុល្លាររៀងៗខ្លួន ហើយអ្នកលេខ ២ តាមពូលទាំង ២ បានម្នាក់ៗចំនួន ២ ពាន់ដុល្លារ។
មិនតែប៉ុណ្ណោះ អ្នកបានលេខ ១ និងលេខ ២ ប្រចាំពូល A និងពូល B នេះ នឹងទទួលបានឱកាសកាន់តែពិសេស គឺពួកគេត្រូវដាក់ឱ្យប្រកួតជាមួយកីឡាករបរទេសចំនួន ៤ នាក់ទៀត តាមរូបមន្តចាញ់ធ្លាក់ៗ រហូតរកឃើញអ្នកឈ្នះ ២ នាក់ ឡើងទៅប្រកួតផ្តាច់ព្រ័ត្រ ដណ្តើមយកខ្សែក្រវាត់មាសពិភពលោកគុនខ្មែរ (World Kun Khmer) អមដោយប្រាក់រង្វាន់លេខ ១ បាន ១ ម៉ឺនដុល្លារ និងលេខ ២ បាន ៣ ពាន់ដុល្លារ។
តំណាងគណៈកម្មការប្រដាល់ពិភពលោក ប្រចាំស្ថានីយទូរទស្សន៍ថោន លោក គឹម ស្រ៊ុនកុសល បាននិយាយ នៅក្នុងសន្និសីទកាសែត កាលពីថ្ងៃទី ២៦ ខែធ្នូថា នាពេលបច្ចុប្បន្ន កីឡាប្រដាល់គុនបុរាណខ្មែរ មានការពេញនិយមគាំទ្រគ្រប់ទិសទី និងបានបោះជំហានទៅមុខ ១ ដំណាក់កាលទៀត។
លោកបានបន្តថា៖ «ចំណែកព្រឹត្តិការណ៍ថ្មី អធិរាជគុនខ្មែរ ISI PIPE-ISI PALM នេះ នឹងនាំយកកីឡាករកម្ពុជា ចូលទៅប្រកួតលើសង្វៀនលំដាប់អន្តរជាតិ ដើម្បីបង្ហាញឱ្យពិភពលោក បានឃើញ និងស្គាល់ប្រដាល់គុនខ្មែរកាន់តែច្បាស់ថា ជាក្បាច់គុនដែលដូនតាខ្មែរបានបន្សល់ទុកតាំងពីបុរាណកាល រហូតដល់បច្ចុប្បន្ន ហើយគុនខ្មែរនៅតែមានឈ្មោះល្បីខ្លាំង នៅក្នុងកម្រិតពិភពលោក»។
យ៉ាងណាក៏ដោយ លោក គឹម ស្រ៊ុនកុសល ក៏បានបញ្ជាក់ទៀតថា៖ «កីឡាករដែលមានសមត្ថភាពខ្លាំងពិតប្រាកដ នោះទើបអាចដណ្ដើមបាន ខ្សែក្រវាត់មាសពីសង្វៀនថោន ពោលគឺមិនអាចវ៉ៃលំៗ ដណ្តើមយកត្រឹមជ័យជម្នះបានឡើយ ពីព្រោះគណៈកម្មការ តម្រូវឱ្យមានលក្ខខណ្ឌប្រកួតជម្រុះ ត្រៀមទៅប្រកួតជាមួយក្រុមកីឡាករបរទេស មានរហស្សនាម អ្នកពិឃាត (Killer) ចំនួន ៤ ប្រទេសផ្សេងទៀត ដើម្បីមកដណ្ដើមខ្សែក្រវាត់មាសលំដាប់ពិភពលោក គឺមិនមែនជារឿងងាយស្រួលនោះឡើយ»។
យ៉ាងណាមិញ សម្រាប់ការប្រកួតបើកឆាក នៅលើសង្វៀនថោន ថ្ងៃអាទិត្យនេះ ជាការប្រកួតជម្រុះជុំទី១ រវាងបេក្ខភាពទាំង ៤ នាក់ ដែលឈរនៅពូល A ដោយក្នុងនោះកីឡាករជើងចាស់ ម៉ន សាម៉េត ត្រូវជួប វេង សុភ័ក្រ ហើយ ជ័រ ពៅ ត្រូវប្រកួតជាមួយ ចាន់ សំអាត៕
