The Phnom Penh Post Search

Search form




Logo of Phnom Penh Post newspaper Phnom Penh Post - Bowen ស៊ុត​បញ្ចូល​ទី ២ ​គ្រាប់ ខណៈ West Ham ឈ្នះ ២-០

Bowen ស៊ុត​បញ្ចូល​ទី ២ ​គ្រាប់ ខណៈ West Ham ឈ្នះ ២-០

Content image - Phnom Penh Post
Bowen ស៊ុតបញ្ចូល​ទីឱ្យ West Ham នាំមុខ Norwich ១-០ អំឡុងការប្រកួតនៅលីគ កាលពីថ្ងៃពុធ។ AFP

Bowen ស៊ុត​បញ្ចូល​ទី ២ ​គ្រាប់ ខណៈ West Ham ឈ្នះ ២-០

ក្រុង​ឡុង​ដ៍​: ខ្សែបម្រើ Jarrod Bowen ស៊ុត​បញ្ចូល​ទី ២ ​គ្រាប់​ម្នាក់ឯង ខណៈដែល​ក្រុម West Ham United បាន​វិល​​ត្រឡប់​ទៅ​ឈរ​ក្នុងចំណោម​ក្រុម​នៅ​ទី​កំពូល​ទាំង ​៤ ក្នុង​តារាង​ពិន្ទុ​នៃ​ក្របខ័ណ្ឌ Premier League វិញ ជាមួយនឹង​ជ័យជម្នះ ២-០ នៅ​ទឹកដី​ខ្លួនឯង​លើ​រុម​បាត​តារាង Norwich City កាលពី​ថ្ងៃ​ពុធ​។​

​គ្រាប់​បាល់​ទាំង​ទ្វេ​របស់​កីឡាករ Bowen ដែល​ធ្វើ​ឱ្យគេ​មាន​គ្រាប់​បាល់​សរុប ៨ ​គ្រាប់ នា​រដូវ​កាល​នេះនោះ បាន​នាំឱ្យ​ក្រុម​ញញួរ​ធំ West Ham នាំមុខ​ដាច់ ២​ ពិន្ទុ​លើ​ក្រុម​គូប្រជែង​រួម​ក្រុង​ឡុង​ដ៍ Arsenal ខណៈដែល​ក្រុម​របស់លោក David Moyes ប្រកាស​ពី​ជ័យជម្នះ​នៅ​លី​គ ៣​ លើក​ជាប់ៗ​គ្នា​។​

«​យើង​ត្រូវ​ប្រឹងប្រែង និង​បន្ត​រក្សា​លទ្ធផល​បែបនេះ​ទៀត​។ ដរាបណា​យើង​ស្ថិតនៅ និង​ចងភ្ជាប់​ជាមួយនឹង​ចំណាត់​​ថ្នាក់​នៃ​ការ​បាន​សិទ្ធិ​ទៅលេង​នៅ​អឺរ៉ុប នោះ​នឹង​ជា​រឿង​ល្អ​មែនទែន តែ​ប្រសិនបើ​យើង​អាច​យក​គំរូ​តាម​ភាព​ជោគ​​ជ័យ​របស់​ក្រុមនៅ​ពីលើ​យើង នោះ​គឺជា​អ្វី ដែល​យើង​នឹង​ព្យាយាម​ប្រឹងប្រែង និង​ធ្វើឱ្យបាន​»​។ នេះ​ជាការ​លើកឡើង​របស់​អ្នកចាត់ការ​ក្រុម West Ham លោក Moyes ដែល​បាន​ប្រាប់​ទៅ​ប្រព័ន្ធ​ផ្សព្វផ្សាយ BBC​។​

​ដោយឡែក​ពាក់ព័ន្ធ​នឹង​ការ​​ប្រកួត​វិញ លោក Moyes បាន​ប្រាប់​យ៉ាងខ្លីៗ​ថា​៖ «​យើង​សម​នឹង​បាន​ជ័យជម្នះ​នេះ​ទាំង​​ស្រុង តែ​វា​មិនមែន​ងាយស្រួល​នោះឡើយ​»​។​

​គ្រូបង្វឹក​របស់​ក្រុម Norwich លោក Dean Smith មានការ​ខកចិត្ត​ជាមួយ​នឹង​វិធី​​សាស្ត្រ​នៃ​ការ​ចាញ់​ចុងក្រោយ​នេះ តែ​បានបញ្ជាក់​អះអាងថា គ្រប់យ៉ាង គឺ​នៅ​ឆ្ងាយ​ពី​ភាព​​បរាជ័យ សម្រាប់​ក្រុម​កូនចាប​ពណ៌​លឿង ក្នុងការ​ប្រឹង​តស៊ូ​ប្រយុទ្ធ​ទប់ទល់​នឹង​ការ​ត្រូវ​ធ្លាក់​ពី​លី​គ​កំពូល​អង់គ្លេស​។​

«​យើង​ត្រូវបាន​វាយប្រហារ​ពី​ខាងក្រៅដែលថា ពួកយើង​មិន​សម​មានមុខនៅ Premier League ទេ​។ តែ​យើង​តាមតែ ៣​ ពិន្ទុ​ប៉ុណ្ណោះ ពី​ទី​សុវត្ថិភាព ហើយ​ខ្ញុំ​មាន​ក្រុម​កីឡាករដែលមាន​ការប្ដេជ្ញា និង​ស្មោះ​​ត្រង់​»​។ នេះ​ជាការ​លើកឡើង​របស់លោក Smith​។​

​នៅក្នុង​ការប្រកួត ដែល​ត្រូវ​បានរៀបចំ​ឡើងវិញ​ពី​ខែធ្នូ ដោយសារតែ​មានការ​ផ្ទុះ​ឡើង​នៃ​ជំងឺ​កូ​វីដ ​១៩ ក្នុង​ក្រុម Norwich កីឡាករ Bowen ស្ទើរ​​តែ​បាន​ជួយ​ឱ្យ​ក្រុម West Ham នាំមុខ​ទៅហើយ ក្នុង​ប្រមាណ​ជា ២​ នាទី នៅឯ​កីឡដ្ឋាន London ពេលដែល​ខ្សែបម្រើ Manuel Lanzini បញ្ជូន​បាល់​ចូលទៅក្នុង​តំបន់​គ្រោះថ្នាក់ តែ​ការ​ស៊ុត​របស់គេ គឺ​នៅ​កៀក​នឹង​អ្នកចាំទី​ Tim Krul ពេក​។​

​ក្រុម West Ham ស៊ុត​បញ្ចូល​ទី​បាននៅ​នាទី​ទី​៣៥ នៅពេលដែល​កា​រប​ញ្ចូ​ន​បាល់​ចូល​ប្រអប់​គ្រោះថ្នាក់​របស់​កីឡាករ Bowen តម្រង់​ចូល​ទី​តែម្ដង តែ​គ្រាប់​បាល់​នោះ ត្រូវបាន​បដិសេធ ដោយសារ​ខ្សែ​​បម្រើ​ប្រយុទ្ធ Nikola Vlasic ឈរ​នៅក្នុង​ជំហរ​អកហេ្ស៊ី​។​

​តែ​យ៉ាងណាក្ដី ការ​គ្រប​​សង្កត់​ញយ​ដង​របស់​ពួកគេ ទទួលបាន​ផល​នៅ ៣​ នាទី មុន​ឈប់សម្រាក​វគ្គ​ទី​១ នៅពេលដែល​កីឡាករ Bowen មានឱកាស​តែ​ត​បញ្ចូល​ទី​នូវ​គ្រាប់​បាល់ ដែល​លើក​ចូល​ប្រអប់​គ្រោះថ្នាក់​ដោយ​ខ្សែ​​ការពារ Vladimir Coufal​។ ខ្សែប្រយុទ្ធ Michail Antonio គួរតែ​បាន​ជួយ​ឱ្យ​ក្រុម​ម្ចាស់ផ្ទះ​នាំមុខ ២-០ ទៅហើយ នៅ​ដើម​វគ្គ​ទី​២ តែ​ការ​ស៊ុត​របស់​កីឡាករ​សញ្ជាតិ​ហ្សា​ម៉ា​អ៊ី​ក​រូបនេះ ហោះ​រំលង​របារ​ទី​។​

​ក្នុងពេល​តាម​ពីក្រោយ ១-០ នោះ ក្រុម Norwich នៅមាន​សង្ឃឹម​នៅឡើយ​ទេ ហើយ​ពួកគេ​ប៊ិះ​នឹង​តាម​ស្មើ​ទៀតផង តែ​គួរឱ្យ​ស្ដាយ ការ​ស៊ុត​របស់​កីឡាករ Adam Idah ត្រូវបាន​អ្នកចាំទី Lukasz Fabianski របស់​ក្រុម West Ham ទះ​បាន ហើយ​បាល់​ប៉ើង​ទៅបុក​បង្គោល​ទី​។​

​តែ​នៅ​ទីបំផុត ខ្សែបម្រើ​ស្លាប​សញ្ជាតិ​អង់គ្លេស​វ័យ ២៥ ​ឆ្នាំ Bowen អាចធ្វើ​បា​នស​ម្រ​ច​គ្រាប់​ទី​២ របស់ខ្លួន ក៏ដូចជា​ជួយ​ធានាថា ហ្គេម​នេះ នឹង​បញ្ចប់ទៅដោយ​ជ័យជម្នះ​ជា​របស់​ក្រុម West Ham នៅ​ប្រមាណ​ជា ៧​ នាទី ចប់​ម៉ោង​ ៩០ ​នាទី​៕ AFP/VN

អត្ថបទគួរចាប់អារម្មណ៍