ក្រុងឡុងដ៍: លោក Rafael Benitez ត្រូវបានបញ្ចប់តំណែងជាអ្នកចាត់ការរបស់ក្រុម Everton កាលពីថ្ងៃអាទិត្យ ក្រោយរយៈពេលតែ ២០០ ថ្ងៃ ក្នុងការដឹកនាំក្រុមកំពុងយ៉ាប់ នៅក្របខ័ណ្ឌ Premier League ខណៈដែលអតីតកីឡាករ លោក Wayne Rooney ត្រូវបានចាត់ទុកថា ជាអ្នកនាំមុខគេ ក្នុងការបានមកស្នងតំណែង។
លោក Benitez ត្រូវបានតែងតាំង ក្រោមការមិនពេញចិត្តពីអ្នកគាំទ្រ កាលពីខែមិថុនា ឆ្នាំមុន ដោយសារតែទំនាក់ទំនងដ៏យូរអង្វែងរបស់គាត់ជាមួយក្រុមគូប្រជែងនៅតំបន់ Merseyside របស់ក្រុម Everton គឺហង្សក្រហម Liverpool។
បុរសអេស្ប៉ាញ ទទួលផលពីដំណើរផ្លូវដ៏គួរឱ្យខកចិត្តជាមួយនឹងការចាញ់ ៩ លើក ក្នុងចំណោមការប្រកួត ១៣ ដង នៅលីគរបស់ក្រុម Everton ដោយបញ្ចប់ចុងក្រោយ ក្នុងបរាជ័យ ២-១ ក្រោមថ្វីជើងក្រុមខ្សោយ Norwich កាលពីថ្ងៃសៅរ៍។
ពាក់ព័ន្ធនឹងការបញ្ចប់តួនាទីនេះ ក្លិប Everton ឱ្យដឹងក្នុងសេចក្ដីប្រកាសថា៖ «ក្លិបបាល់ទាត់ Everton អាចបញ្ជាក់អះអាងពីការចាកចេញរបស់លោក Rafael Benitez ពីតំណែងជាអ្នកចាត់ការក្រុមធំ។ លោក Benitez ដែលចូលរួមជាមួយ Everton ក្នុងខែមិថុនា ឆ្នាំ ២០២១ បានចាកចេញពីក្លិប ដោយមានប្រសិទ្ធភាពភ្លាមៗ។ ការផ្ដល់បច្ចុប្បន្នភាព ចំពោះអ្នកជំនួសជាអចិន្ត្រៃយ៍ នឹងត្រូវធ្វើឡើង ក្នុងពេលវេលាសមរម្យណាមួយ»។
អតីតខ្សែប្រយុទ្ធរបស់ក្រុម Everton លោក Rooney ដែលបច្ចុប្បន្ន កំពុងទទួលបានការចាប់អារម្មណ៍ ក្នុងនាមជាអ្នកចាត់ការរបស់ក្រុម Derby County នៅលីគលំដាប់ទី២ គឺជាបេក្ខភាពនាំមុខគេរបស់កន្លែងភ្នាល់ស្របច្បាប់ នៅអង់គ្លេស ក្នុងការបានមកជំនួសកន្លែងរបស់លោក Benitez។
អតីតមិត្តរួមក្រុម Everton របស់លោក Rooney គឺលោក Frank Lampard ដែលត្រូវបានដកតំណែងគ្រូបង្វឹកដោយក្រុមតោខៀវ Chelsea កាលពីឆ្នាំមុន ក៏ជាបុគ្គល ដែលបានការចាប់អារម្មណ៍សម្រាប់តួនាទីនេះផងដែរ៕ AFP/VN