ក្រុងមីឡាន: ខ្សែប្រយុទ្ធ Emmanuel Gyasi ដែលមានចិត្តមិនឆ្លេឆ្លា ដោយការស៊ុតបញ្ចូលទីរាបៗ នៅនាទីទី៩០+៦ បន្ទាប់ពីការវាយបករបស់ក្រុមខ្លួននោះ បានជួយឱ្យក្រុម Spezia ស្គាល់នូវរសជាតិនៃជ័យជម្នះជាលើកដំបូង សម្រាប់ការប្រកួត នៅក្របខ័ណ្ឌ Serie A ក្នុងទឹកដីរបស់ក្រុម AC Milan ជាមួយនឹងលទ្ធផល ២-១ កាលពីយប់ថ្ងៃចន្ទ។
ក្រុម Milan មិនអាចទាញយកផលពីការនាំមុខមុន ១-០ លើក្រុមភ្ញៀវ ក៏ដូចជាបានធ្វើឱ្យបាត់បង់យ៉ាងគួរសោកស្ដាយនូវឱកាស ក្នុងការបានទៅនៅពីលើក្រុមជិតខាង Inter ដោយឈរនៅទីកំពូលតារាងនៃក្របខ័ណ្ឌ Serie A ខណៈដែលក្រុមលេខ ៣ Napoli រំកិលមកកាន់តែកៀក ជាមួយនឹងគម្លាតក្នុងរង្វង់តែ ២ ពិន្ទុប៉ុណ្ណោះ ក្រោយឈ្នះក្រុមម្ចាស់ផ្ទះ Bologna ២-០។
Milan មានប្រៀបជាង តែបានធ្វើឱ្យឱកាសជាច្រើនកន្លងទៅដោយអសារឥតការ មុននឹងអាចស៊ុតបញ្ចូលទីបាននៅនាទីទី៤៥+១ ដោយខ្សែបម្រើប្រយុទ្ធ Rafael Leao ដែលកើតឡើង បន្ទាប់ពីខ្សែការពារ Theo Hernandez ស៊ុតបាល់ប៉េណាល់ទីអត់បានសម្រេច ដោយបាល់ចេញក្រៅ។
ក្រុមភ្ញៀវ Spezia បានវាយបកតាមស្មើវិញ ពេលដែលខ្សែប្រយុទ្ធ Kevin Agudelo រកឃើញកន្លែងចន្លោះដ៏ធំ ដែលខ្សែការពាររបស់ក្រុមម្ចាស់ផ្ទះភា្លត់ឱ្យកើតមាន រួចធាក់បាល់បញ្ចូលទីយ៉ាងស្រួលៗ បន្ទាប់ពីខ្សែបម្រើប្រយុទ្ធ Daniele Verde បញ្ជូនបាល់រាប់ៗចូលតំបន់គ្រោះថ្នាក់ក្បែរៗបង្គោលទី នៅនាទីទី៦៤។
នៅពេលហ្គេម កំពុងដំណើរការ ក្នុងនាទីទី៥ នៃម៉ោងបន្ថែមបង្គ្រប់ ខ្សែបម្រើ Junior Messias បានទម្លុះសំណាញ់ទីឱ្យក្រុម Milan នាំមុខជាថ្មី តែអាជ្ញាកណ្ដាលបានផ្លុំកញ្ចែពិន័យជាមុនរួចហើយ ដោយមិនអនុញ្ញាតឱ្យលេងបាល់ចំណេញឡើយ ដែលការសម្រេចនោះនាំឱ្យគ្រូបង្វឹករបស់ម្ចាស់ផ្ទះ លោក Stefano Pioli មិនពេញចិត្ត។
«យើងបាត់បង់ភាពស្រស់ស្រាយ ក្រោយរងនូវអយុត្តិធម៌។ ពិតជាគួរឱ្យខ្មាសអៀន។ វាជាការទទួលខុសត្រូវរបស់យើង តែវាត្រូវមានចំណែកពីអាជ្ញាកណ្ដាលដែរ។ វាចម្លែកនោះ គឺថា គាត់មិនផ្លុំកញ្ចែ សម្រាប់ការមានកំហុសពាក់កណ្ដាល ក្នុងអំឡុងហ្គេមទាំងមូល ហើយពេលនេះ គាត់ផ្លុំកញ្ចែ ពេលបាល់ នៅក្រោមជើងកីឡាកររបស់យើង»។ នេះជាប្រសាសន៍របស់លោក Pioli ដែលប្រាប់ទៅប្រព័ន្ធផ្សព្វផ្សាយ DAZN។
ក្រុម Milan បានធ្វើការគាបសង្កត់យ៉ាងខ្លាំងក្លា ហើយអ្នកចាំទី Ivan Provedel របស់ក្រុម Spezia បានធ្វើការរារាំងនូវការស៊ុតយ៉ាងល្អៗពីខ្សែប្រយុទ្ធ Zlatan Ibrahimovic ចំនួន ៣ លើក ដោយលើកទី១ ការស៊ុតក្នុងប្រអប់គ្រោះថ្នាក់ លើកទី២ ការស៊ុតហ្វ្រីឃិក ដោយការទាត់បាល់កោង និងលើកទី៣ ការតែតដ៏គួរឱ្យផើតពោះ។
ក្រុមភ្ញៀវ Spezia បានផលពីការវាយបកចុងក្រោយ ដោយខ្សែការបម្រើ Victor Kovalenko បញ្ជូនបាល់កាត់ចូលតំបន់គ្រោះថ្នាក់ តម្រង់ឆ្ពោះទៅកីឡាករ Gyasi ដែលជាមួយនឹងហ្គេមហៀបនឹងចប់ហើយនោះ បានទទួលបាល់ ហើយធ្វើការគ្រប់គ្រងយ៉ាងប្រយ័ត្នប្រយែង មុនពេលទាត់បាល់បញ្ចូលទីជាមួយនឹងចិត្តត្រជាក់មិនមានភាពអន្ទះសាសូម្បីបន្តិច។
«គ្រប់គ្នាអាចមាននូវយប់ដ៏សែនអាក្រក់។ យើងនឹងព្យាយាមធ្វើការតបតវិញ ដោយក្រុមទាំងមូល តែងតែដឹងច្បាស់នូវរបៀបដើម្បីធ្វើរឿងនេះ»។ នេះជាការបន្ថែមរបស់លោក Pioli ដែលក្រុម Milan ត្រូវប្រឈមជាមួយជាមួយខ្លាំង Juventus ក្នុងផ្ទះខ្លួនឯង នៅថ្ងៃអាទិត្យ៕ AFP/VN