.jpg)
Aboubakar របស់កាមេរូន កំពុងយារជើងទាត់បាល់ អំឡុងការប្រកួតទល់នឹងកាប់វែរ។ AFP
ក្រុងយុនដេ: ប្រធានក្រុមជម្រើសជាតិកាមេរូន Vincent Aboubakar បានស៊ុតបញ្ចូលទីគ្រាប់ទី៥ របស់ខ្លួន ក្នុងព្រឹត្តិការណ៍ Africa Cup of Nations (AFCON) ខណៈក្រុម ដែលមានសិទ្ធិរួចហើយរបស់គេ ត្រូវចូលរួមដោយក្រុមប៊ួគីណាហ្វាសូ ក្នុងការទៅបង្ហាញមុខនៅជុំបន្ទាប់ ទោះស្មើជាមួយកាប់វែរ កាលពីថ្ងៃចន្ទក៏ដោយ។
ខ្សែប្រយុទ្ធរបស់ក្លិបអាជីព នៅប្រទេសកាតារូបនេះ ដែលត្រូវមានវ័យ ៣០ ឆ្នាំ នាថ្ងៃសៅរ៍ បានទម្លុះសំណាញ់ទីឱ្យក្រុមម្ចាស់ផ្ទះកាមេរូន នាំមុខមុន នៅចុងវគ្គទី១ មុនពេលកីឡាករបម្រុង Garry Rodrigues ស៊ុតឱ្យក្រុមកាប់វែរ តាមស្មើវិញ នៅដើមវគ្គទី២ ដែលនោះជាលទ្ធផលផ្លូវការតែម្ដង សម្រាប់ហ្គេមនាក្រុងយុនដេនោះ។
កីឡាករ Cyrille Bayala ស៊ុតឱ្យក្រុមប៊ួគីណាហ្វាសូ នាំមុខ ហើយកីឡាករ Getaneh Kebede ទាត់បាល់ប៉េណាល់ទីបានសម្រេចជួយឱ្យក្រុមអេត្យូពីតាមស្មើវិញ ខណៈដែលលទ្ធផល ១-១ នេះ គ្រប់គ្រាន់ក្នុងការបញ្ជូនក្រុមអាហ្វ្រិកខាងលិច ឆ្លងទៅវគ្គចាញ់ធ្លាក់។
ក្រុមកាមេរូន បានឈរក្នុងតំណែងលេខ ១ ក្នុងពូល A ក្រោយបញ្ចប់ការប្រកួតនេះ ដោយមាន ៧ ពិន្ទុ ខណៈដែលក្រុមប៊ួគីណាហ្វាសូ អាចនៅពីលើក្រុមកាប់វែរ សម្រាប់ចំណាត់ថ្នាក់ទី២ ដោយសារប្រវត្តិប៉ះគ្នាល្អជាង បន្ទាប់ពីទាំង ២ ក្រុម បញ្ចប់ការប្រកួត ក្នុងវគ្គសន្សំពិន្ទុតាមពូល ដោយការមាន ៤ ពិន្ទុដូចគ្នា។ ក្រុមអេត្យូពី ធ្លាក់ចេញពីព្រឹត្តការណ៍នេះហើយ ដោយមានត្រឹមតែ ១ ពិន្ទុ។
ក្នុងខណៈពេលដែលក្រុមកាមេរូន និងប៊ួគីណាហ្វាសូ ធានាបានកៅអី ក្នុងវគ្គ ១៦ ក្រុមចុងក្រោយនោះ ក្រុមកាប់វែរឯណោះ ត្រូវរង់ចាំ ដើម្បីបានដឹងថា តើពួកគេអាចមានសិទ្ធិឆ្លងទៅវគ្គបន្ទាប់ ឬអត់ ក្នុងនាមជាក្រុម ១ ក្នុងចំណោមក្រុមលេខ ៣ ល្អបំផុតទាំង ៤ ពីពូលទាំង ៦។
ក្រុមកាមេរូន នឹងនៅតែមិនទាន់ធ្វើចេញពីក្រុងយុនដេនេះទេ ដោយត្រូវប្រកួតជាមួយក្រុមលេខ ៣ នៅថ្ងៃទី ២៤ ខែមករា ពោលគឺ ១ ថ្ងៃ បន្ទាប់ពីក្រុមប៊ួគីណាហ្វាសូ តទល់ជាមួយក្រុមលេខ ២ នៃពូល C នាទីក្រុងលីមបេ (Limbe) ហើយបើក្រុមកាប់វែរ រួចផុតពីការធ្លាក់នោះពួកគេ នឹងត្រូវលេងទល់ជាមួយក្រុមលេខ ១ នៃពូល B ឬ C នាទីក្រុងបាហ្វ៊ូសាម (Bafoussam) ឬយុនដេ នៅថ្ងៃទី ២៥ ខែមករា។
«យើងដណ្ដើមបានចំណាត់ថ្នាក់លេខ ១ ក្នុងពូល ដែលនោះគឺជាគោលដៅរបស់យើង តែយ៉ាងណាក្ដីយើងចង់ឈ្នះគ្រប់ការប្រកួត។ យើងនឹងបន្តលេងនៅទីនេះ ក្នុងកីឡដ្ឋាន Olembe។ គ្រូបង្វឹករបស់ក្រុមជម្រើសជាតិកាមេរូន លោក Toni Conceicao បានប្រាប់ឱ្យដឹង ក្រោយការប្រតបញ្ចប់។
លោក Conceicao បានបន្ថែមថា៖ «យើងមានឱកាសយ៉ាងច្រើន។ ក្រុមជម្រើសជាតិកាមេរូន មិនជាអស្ចារ្យនោះទេ តែលេងបានល្អ។ យើងអាចធ្វើឱ្យប្រសើរជាងនេះទៀត តែប្រសិនបើយើងពិនិត្យមើលជារួម យើងអស្ចារ្យជាងក្រុមគូបដិបក្ខរបស់យើង ក្នុងពូលនេះ»។
Aboubakar គឺជាកីឡាករកាមេរូនដំបូងគេ ដែលស៊ុតបញ្ចូលទីបាន ពីការប្រកួតទាំង ៣ ក្នុងវគ្គសន្សំពិន្ទុតាមពូលនេះ នៅ AFCON គិតចាប់តាំងពីអតីតកីឡាករឆ្នើម Samuel Eto''o សម្រេចបានសមិទ្ធផលបែបហ្នឹង ជាមួយនឹងគ្រាប់បាល់ចំនួន ៥ គ្រាប់ កាលនៅប្រទេសហ្គាណា ក្នុងឆ្នាំ ២០០៨។
តែអតីតកីឡាករដ៏ឆ្នើម Ndaye Mulamba ជាអ្នកកាន់កាប់កំណត់ត្រា ក្នុងនាមជាអ្នកស៊ុតបានច្រើនជាងគេ ដោយរកបាន ៩ គ្រាប់ ឱ្យក្រុមប្រទេសហ្សាអែរ (បច្ចុប្បន្នជាសា.កុងហ្គោ) ពេលការប្រកួតប្រជែងដណ្ដើមពានដ៏ធំរបស់ទ្វីបអាហ្វ្រិកនេះ រៀបចំនៅប្រទេសអេហ្ស៊ីប កាលពី ៤៨ ឆ្នាំកន្លងទៅ៕ AFP/VN
