ក្រុងមែលប៊ន: កីឡាការិនីវាយកូនបាល់ (តិន្នីស) លំដាប់កំពូល Ashleigh Barty បានបោះជំហានកាន់តែកៀក ទៅនឹងការប្រឈម នាពេលខាងមុខ ក្នុងជុំទី៤ ជាមួយកីឡាការិនី Naomi Osaka បន្ទាប់ពីបានបង្ហាញនូវទម្រង់លេងដ៏ល្អឥតខ្ចោះ ក្នុងជុំទី២ នៃព្រឹត្តិការណ៍ Australian Open របស់ប្រទេសអូស្ត្រាលី ពីថ្ងៃពុធ។
កីឡាការិនី Barty ដ៏គួរឱ្យចាប់-អារម្មណ៍ ដែលកំពុងដេញតាមនូវការឈ្នះជើងឯកជាលើកដំបូង នៅប្រទេសកំណើតរបស់ខ្លួន ក្នុងកម្រិត Grand Slam ស្ទើរតែគ្មានស្រក់ញើសសូម្បី ១ តំណក់ ខណៈដែលនាងបានយកឈ្នះលើកីឡាការិនីអ៊ីតាលី Lucia Bronzetti ក្នុងលទ្ធផល ៦-១ ទាំង ២ សិត ដោយប្រើពេលត្រឹមតែ ៥២ នាទីប៉ុណ្ណោះ ពីការប្រកួតនៅលើទីលាន Rod Laver Arena។
កីឡាការិនី Barty ដែលមានភាពនឹងនរកាន់តែខ្លាំងឡើង និងដែលបានឈ្នះពានឯកត្តជន និងប្រភេទគូ ក្នុងការប្រកួត កម្ដៅសាច់ដុំ នាទីក្រុង Adelaide មិនបានបាត់បង់ពិន្ទុនោះឡើយពីការវាយសឺវីសរបស់នាង ៤៨ ហ្គេមជាប់គ្នាពីការប្រកួត ៥ ដងក្នុងឆ្នាំនេះ។
«ខ្ញុំមានអារម្មណ៍ថា យើងមាននូវការរៀបចំយ៉ាងល្អមួយ នៅក្នុងទីក្រុង Adelaide នេះ។ យើងលេងបានល្អ ពោលគឺលេងក្នុងការប្រកួតដ៏ស្វិតស្វាញមួយ។ គ្រូបង្វឹករបស់ខ្ញុំ (លោក Craig Tyzzer) គឺកំពូលតែម្ដង»។ នេះជាសម្ដីរបស់កីឡាការិនី Barty ដែលជាម្ចាស់ជើងឯកពានលំដាប់ Grand Slam ២ សម័យកាល និងដែលត្រូវបានចាត់ទុកថា មានសិទ្ធិខ្ពស់ ក្នុងការឈ្នះពាន ក្នុងព្រឹត្តិការណ៍នាក្រុងមែលប៊ននេះ។
កីឡាការិនីវ័យ ២៥ ឆ្នាំ Barty បានបន្ថែមថា៖ «ខ្ញុំមានអារម្មណ៍ថា ក្រុមរបស់យើងទាំងមូលសហការគ្នាបានល្អខ្លាំងណាស់។ យើងកំពុងរីករាយនឹងការប្រកួតកីឡាវាយកូនបាល់របស់យើង និងអាចបង្កើតបាននូវរឿងរ៉ាវល្អៗមួយចំនួន»។
នៅជុំទី៣ នាថ្ងៃសុក្រ កីឡាការិនី Barty ត្រូវប្រឈមជាមួយកីឡាការិនីអ៊ីតាលី Camila Giorgi ដែលបានទម្លាក់ Tereza Martincova របស់សា.ឆែក ជាមួយនឹងលទ្ធផលជ័យជម្នះ ៦-២ និង ៧-៦។
កីឡាការិនី Paula Badosa ដែលមិនត្រូវបានគេមើលរំលង និងដែលទើបលើកពានកម្មវិធីកម្ដៅសាច់ដុំ នៅក្រុងស៊ីដនីក៏បានឡើងទៅជុំបន្តស្រួលៗដែរ ក្រោយឈ្នះកីឡាការិនីអ៊ីតាលី Martina Trevisan ២ សិតទល់នឹង ០ គឺ ៦-០ និង ៦-៣។ នេះជាការប្រកួតលើកទី៧ របស់នាង ក្នុងរយៈពេល ១០ ថ្ងៃ ប៉ុន្តែអត្តពលិកសញ្ជាតិអេស្ប៉ាញរូបនេះ បានប្រាប់ថា នាងអាចទប់ទល់បានយ៉ាងល្អ។
ជាមួយគ្នានេះដែរ កីឡាករ Rafael Nadal ក៏បានបង្កើនល្បឿនរបស់ខ្លួន ក្នុងការឆ្ពោះទៅរកការឈ្នះជើងឯកជាកំណត់ត្រាផ្នែកបុរសកម្រិត Grand Slam ជាលើកទី២១ តែត្រូវការពិន្ទុកាត់ក្ដី ៥ ដង ដើម្បីបានទម្លាក់គូប្រកួតដ៏រឹង រួចឡើងទៅជុំទី៣។
ដោយកីឡាករការពារតំណែងជើងឯក Novak Djokovic របស់ស៊ែប៊ី ត្រូវបាននិរទេសខ្លួន នៅមុនការប្រកួតដណ្ដើមពានលំដាប់ Grand Slam ប្រចាំឆ្នាំដំបូងគេនេះ ចាប់ផ្ដើមនោះ ការចាប់ឆ្នោតផ្នែកបុរស កាន់តែមានភាពទូលាយសម្រាប់កីឡាករចាស់វស្សាសញ្ជាតិអេស្ប៉ាញ Nadal។
ម្ចាស់ជើងឯកពានព្រឹត្តិការណ៍ធំៗ ២០ សម័យកាល Nadal ដែលទើបបានឈ្នះពានដំបូងរបស់ខ្លួនថ្មីៗនេះ ក្រោយអវត្តមាន ៥ ខែ ដោយរបួសប្រអប់ជើងនោះ មិនត្រូវបានគូបដិបក្ខ Yannick Hanfmann របស់អាល្លឺម៉ង់ ធ្វើទុកបុកម្នេញអ្វីឡើយ រហូតដល់ចុងក្រោយ បានយកឈ្នះក្នុងលទ្ធផល ៦-២ ៦-៣ និង ៦-៤៕ AFP/VN