.jpg)
ក្រុងមែលប៊ន: កីឡាការិនីវាយកូនបាល់លំដាប់លេខ ៣ ពិភពលោក Garbine Muguruza បានទម្លាក់កំហុសដល់ការឆ្លងជំងឺកូវីដ ១៩ សម្រាប់ការធ្លាក់ចេញយ៉ាងឆាប់រហ័សពីការប្រកួតប្រជែង ក្នុងកម្មវិធី Australian Open កាលពីថ្ងៃព្រហស្បតិ៍ ដោយបង្ហាញថា ក្រុមទាំងមូលរបស់នាង បានបរាជ័យ ក្នុងការរៀបចំឱ្យបានរួចរាល់សម្រាប់ព្រឹត្តិការណ៍នេះ ដែលបានក្លាយជាឧបសគ្គដល់ការត្រៀមខ្លួនរបស់នាង។
កីឡាការិនីជើងឯករងឆ្នាំ ២០២០ នៅលើទីលាន Melbourne Park នេះ ត្រូវបានគេមើលឃើញដោយទូទៅថា ជាអ្នកមានសិទ្ធិប្រកួតប្រជែងដ៏ធំ សម្រាប់ការប្រកួតពាន Grand Slam ប្រចាំឆ្នាំដំបូងគេ បន្ទាប់ពីមាននូវរដូវកាលដ៏គួរឱ្យចាប់អារម្មណ៍មួយ ដែលនាងបានឈ្នះពាននៅទីក្រុងឈីកាហ្គោ និងឌូបៃ មុនពេលឡើងទៅលើកពាន ក្នុងកម្មវិធី WTA Finals 2021។
តែបន្ទាប់ពីទទួលបានជ័យ-ជម្នះ នៅជុំទី១ យ៉ាងស្រួលៗ នាងត្រូវបានធ្វើឱ្យស្រឡាំងកាំង ជាមួយនឹងការរងបរាជ័យ ក្នុងលទ្ធផល ៦-៣ និង ៦-៣ ក្រោមថ្វីដៃរបស់កីឡាការិនីជើងចាស់សញ្ជាតិបារាំង Alize Cornet នៅក្នុងជុំទី២។
កីឡាការិនី Muguruza របស់អេស្ប៉ាញ ដែលបានឈ្នះពានលំដាប់ Grand Slam ក្នុងកម្មវិធី French Open ក្នុងឆ្នាំ ២០១៦ និង Wimbledon ១ ឆ្នាំក្រោយមក មុនពេលមានទម្រង់លេងធ្លាក់ចុះ បាននិយាយថា ការត្រៀមលក្ខណៈរបស់នាង បានរងផលប៉ះពាល់យ៉ាងខ្លាំងដោយវីរុសកូរ៉ូណា។
ក្រោយពីបានធ្លាក់ចេញពីកម្មវិធីនេះ កីឡាការិនី Muguruza បានប្រាប់ឱ្យដឹងថា៖ «វាជាការចាប់ផ្តើមដ៏តានតឹងមួយ សម្រាប់ក្រុមរបស់ខ្ញុំផងដែរ។ ពួកគេសុទ្ធតែ បានឆ្លងជំងឺកូវីដ មុនពេលមកទីនេះ។ ពួកយើងបាននៅ ដោយបែកគ្នាចំនួន ១៥ ថ្ងៃ»។
«វាជារឿងពិបាកសម្រាប់ខ្ញុំ ក្នុងការត្រៀមខ្លួន មកកាន់ការប្រកួតដ៏ធំនៅប្រទេសអូស្ត្រាលីនេះ ហើយលេងឱ្យបានល្អនោះ។ វាមានបញ្ហាស្មុគស្មាញបន្តិចបន្តួច។ រីឯផ្នែកកាយសម្បទាវិញ ខ្ញុំក៏មានអារម្មណ៍ដែរថា ហាក់មិនរឹងមាំ ១០០ ភាគរយនោះឡើយ»។ កីឡាការិនីវ័យ ២៨ ឆ្នាំ បានឱ្យដឹងបន្ថែម។
កីឡាការិនី Muguruza បានប្រាប់ថា ដោយសារក្រុមគ្រូបង្ហាត់របស់នាង ត្រូវនៅផ្ដាច់ខ្លួនពីអ្នកដទៃ នាងត្រូវធ្វើការហាត់សមតែម្នាក់ឯង រយៈពេល ២ សប្ដាហ៍ ហើយបើទោះបីជាធម្មតា មិនមានការប៉ះពាល់់ដល់នាងក៏ដោយ ក៏វាមិនល្អដល់ការត្រៀមខ្លួនរបស់នាងសម្រាប់ការចាប់ផ្ដើមរដូវកាលដែរ៕ AFP/VN
