.jpg)
លោក Rashford (កណ្ដាល) ស៊ុតឱ្យ Man Utd នាំមុខ West Ham ១-០។ AFP
ក្រុងមេនឆេស្ទ័រ: គ្រាប់បាល់របស់ខ្សែប្រយុទ្ធ Marcus Rashford ពីការស៊ុតបាល់ ដែលស្ទើរតែជាការទាត់ ១ ជើងចុងក្រោយនៃការប្រកួតទៅហើយនោះ បានជួយរុញឱ្យក្រុមបិសាចក្រហម Manchester United ឡើងទៅឈរក្នុងចំណោមក្រុមទាំង ៤ នៅទីកំពូលតារាងនៃក្របខ័ណ្ឌ Premier League ដោយការយកប្រៀបលើក្រុម West Ham ជាមួយនឹងអ្វី ដែលលោក Ralf Rangnick បានពណ៌នាថា ជាជ័យជម្នះ ១-០ ដ៏មានតម្លៃបំផុត កាលពីថ្ងៃសៅរ៍។
ក្រុម Man United ហាក់ដូចជាសោះកក្រោះមែនទែន សម្រាប់ការលេងវាយលុកក្នុងរយៈពេល ៩៣ នាទី ពីការប្រកួត នៅកីឡដ្ឋាន Old Trafford នេះ តែបែរជាបានរកឃើញនូវការបំបែកភាពទាល់ច្រកនៅវិនាទីស្លាប់រស់ ដោយសារកីឡាករបម្រុងទាំង ៣ រូប របស់លោក Rangnick ដែលត្រូវបានដាក់លេងជុំគ្នា នៅពេលដែលកីឡាករ Anthony Martial និង Edinson Cavani សហការគ្នាបានយ៉ាងល្អ មុនពេលបញ្ជូនបាល់ទៅឱ្យកីឡាករ Rashford ធ្វើការស៊ុតបញ្ចូលទីស្រួលៗ។
«បរិយាកាស (ក្នុងបន្ទប់ផ្លាស់សម្លៀកបំពាក់) គឺពិតជាអស្ចារ្យណាស់។ ពិតជាត្រឹមត្រូវណាស់ ពួកក្មេងៗ (កីឡាករ) កំពុងនាំគ្នាធ្វើការអបអរ ដោយពួកគេដឹងច្បាស់ថា ជ័យជម្នះដ៏ធំនេះ ជាអ្វី។ នោះគឺជាការឈ្នះ ១ ក្នុងចំណោមការឈ្នះដ៏ធំបំផុត ដោយសារយើងអាចស៊ុតបញ្ចូលទី នៅពេលដែលក្រុមម្ខាងទៀត គ្មានឱកាសសូម្បីតែបន្តិច ក្នុងការវាយបកបាន»។ នេះជាប្រសាសន៍របស់លោក Rangnick។
ជ័យជម្នះនេះ ជួយរុញឱ្យក្រុម Man Utd មាន ១ ពិន្ទុ នៅពីលើក្រុមញញួរធំ West Ham និងឃើញថា ក្រុមបិសាចក្រហម ផ្លោះទៅនៅលើក្រុម Tottenham Hotspur និង Arsenal ខណៈដែលក្រុមទាំងអស់នេះ កំពុងប្រជែងដណ្តើមសិទ្ធិទៅលេង ក្របខ័ណ្ឌ Champions League នារដូវកាលក្រោយ។
លើសពីនេះទៀត ជោគជ័យនេះក៏ជាចង្វាក់ពេលវេលាដ៏ធំផងដែរសម្រាប់កីឡាករ Rashford ដែលត្រូវបានមើលឃើញថា ហាក់ដូចជាគ្មានទំនុកចិត្តទាល់តែសោះ ក្នុងប៉ុន្មានខែនេះ ដោយកីឡាករអន្តរជាតិអង់គ្លេសនៅមុននេះ អាចស៊ុតបញ្ចូលទីបានគ្រាប់ដំបូងរបស់ខ្លួន គិតតាំងខែតុលាមក ក្នុងជ័យជម្នះ ៣-១ លើក្រុមម្ចាស់ផ្ទះ Brentford កាលពីថ្ងៃពុធកន្លងមក។
ស្របពេលជាមួយគ្នាគ្រាប់បាល់នេះ បានកើតឡើងត្រូវពេលត្រូវវេលាសម្រាប់អ្វីដែលអាចជាវិនាទីដ៏សំខាន់ ចំពោះក្ដីសង្ឃឹមរបស់ក្រុម Man United ដែលមានការភ័យខ្លាច ក្នុងការបាត់មុខពីការប្រកួតប្រជែងដ៏មានលុយកាក់ និងកិត្តិយស គឺក្របខ័ណ្ឌ Champions League រដូវកាលក្រោយ។
កីឡាករ Rashford ជាថ្មីម្ដងទៀត ត្រូវដាក់ឱ្យអង្គុយនៅកៅអីកីឡាករបម្រុង ដោយលោក Rangnick ពេញចិត្តក្នុងការឱ្យកីឡាករវ័យ ១៩ ឆ្នាំ Anthony Elanga លេងជម្រើសដំបូង តែយ៉ាងណា រូបគេត្រូវបានដូរចូលដំបូងគេ ដោយអ្នកចាត់ការសញ្ជាតិអាល្លឺម៉ង់ មុនពេលកីឡាករបម្រុង ២ រូបចុងក្រោយ មកមានចំណែករួម ក្នុងគ្រាប់បាល់ជ័យជម្នះនេះ៕ AFP/VN
