ក្រុងមែលប៊ន: កីឡាការិនីវាយកូនបាល់ (តិន្នីស) សញ្ជាតិអាមេរិក Jessica Pegula បានធ្វើឱ្យកីឡាការិនីដ៏មានឥទ្ធិពលលំដាប់ទី៥ Maria Sakkari ស្រឡាំងកាំង រួចធ្វើដំណើរឡើងទៅវគ្គ ៨ នាក់ចុងក្រោយ ជាលើកទី២ បន្តបន្ទាប់គ្នា ពីការប្រកួតប្រជែងដណ្ដើមពានដ៏ធំប្រចាំឆ្នាំ ក្នុងកម្មវិធី Australian Open របស់អូស្ត្រាលី កាលពីថ្ងៃអាទិត្យ។
កីឡាការិនី Pegula ដែលត្រូវបានចាត់ចំណាត់ថ្នាក់លេខ ២១ ក្នុងព្រឹត្តិការណ៍នេះ បានឆ្លងទៅវគ្គបន្ត តាមរយៈជ័យជម្នះ ២ សិតទល់នឹង ០ ដោយសិតដំបូងរាងលំបាកបន្តិច ទម្រាំអាចយកឈ្នះគូប្រកួតសញ្ជាតិក្រិកបាន ជាមួយនឹងលទ្ធផល ៧-៦ តែសិតទី២ រាងស្រួលបន្តិចសម្រាប់ការប្រកួតនៅទីលាន Margaret Court Arena ដោយឈ្នះ ក្នុងលទ្ធផល ៦-៣។
កីឡាការិនីវ័យ ២៧ ឆ្នាំ នឹងត្រូវប្រឈមជាមួយម្នាក់ រវាងកីឡាការិនី Ashleigh Barty ដែលមានចំណាត់ថ្នាក់លេខ ១ ពិភពលោក និងដែលត្រូវបានចាត់ទុកថា មានសិទ្ធិខ្ពស់ជាងគេ ក្នុងការឈ្នះពានលំដាប់ Grand Slam ក្នុងព្រិត្តិការណ៍នេះ និងកីឡាការិនី Amanda Anisimova ដែលជាអ្នកទម្លាក់កីឡាការិនីឆ្នើមសញ្ជាតិជប៉ុន Naomi Osaka ដើម្បីប្រជែងគ្នាយកកៅអីនៅវគ្គពាក់កណ្ដាលផ្ដាច់ព្រ័ត្រ។
«នោះពិតជាទម្រង់លេងដ៏ល្អបំផុតប្រចាំឆ្នាំរបស់ខ្ញុំ។ ខ្ញុំគិតថា ខ្ញុំវាយបាល់បកត្រឡប់ទៅគូប្រកួតវិញបានល្អណាស់ ខ្ញុំបានព្យាយាមដាក់សម្ពាធលើការវាយសឺវីសរបស់នាង (Sakkari) ហើយខ្ញុំទទួលអារម្មណ៍ថា ខ្ញុំធ្វើបាន។ ខ្ញុំព្យាយាមមានភាពអត់ធ្មត់ ហើយលេងឱ្យឆ្លាតបំផុត តាមដែលខ្ញុំអាច»។ នេះជាសម្ដីរបស់កីឡាការិនី Pegula។
កីឡាការិនីលេខ ៥០ ពិភពលោក Pegula ដែលឪពុកមហាសេដ្ឋីរបស់នាង គឺជាម្ចាស់ក្លិបបាល់ទាត់ (បាល់ទាត់បែបអាមេរិក) Buffalo Bills នៅក្របខ័ណ្ឌ National Football League (NFL) របស់សហរដ្ឋអាមេរិកនោះ ក៏បានឡើងទៅដល់វគ្គ ៨ នាក់ដែរ កាលពីឆ្នាំ ២០២១ កន្លងទៅ តែពេលនោះ នាងបានចាញ់មិត្តរួមជាតិអាមេរិក Jennifer Brady៕ AFP/VN