.jpg)
លោក អ៊ូ រតនា (កណ្តាល) ថតរូបរួមគ្នាជាមួយក្រុមសិក្ខាកាម គ្រូបង្វឹក និងថ្នាក់ដឹកនាំ។ ណន
ភ្នំពេញៈ ប្រធានសហព័ន្ធកីឡាវ៉ូវីណាមកម្ពុជា លោក អ៊ូ រតនា បានលើកទឹកចិត្ត និងជំរុញឱ្យសិក្ខាកាមចំនួន ២៥ នាក់ ដែលទើបបានបញ្ចប់វគ្គបណ្តុះបណ្តាលចៅក្រម អាជ្ញាកណ្តាល កម្រិត «ក» កីឡាវ៉ូវីណាម ត្រូវគោរពឱ្យបាននូវសច្ចៈ និងយុត្តិធម៌ ពេលកាត់សេចក្តីនៅលើទីលាន ព្រោះភាពត្រឹមត្រូវនេះ នឹងធ្វើឱ្យកីឡាករ-កីឡាការិនី កាន់តែមានទឹកចិត្តប្រកួត និងខំប្រឹងជម្នះការលំបាក ដើម្បីឈានទៅរកការដណ្តើមបានមេដាយជូនជាតិ ក្នុងការប្រកួតនៅលើឆាកអន្តរជាតិ ជាពិសេសស៊ីហ្គេម។
លោក អ៊ូ រតនា បានថ្លែង នៅក្នុងពិធីបិទវគ្គ កាលពីថ្ងៃអាទិត្យថា៖ «ក្រៅពីសម្រួចបច្ចេកទេសរបស់កីឡាករ-កីឡាការិនី ឱ្យកាន់តែមានភាពមុតស្រួច ដើម្បីដណ្តើមយកមេដាយមកជូនជាតិនោះ ការបណ្តុះបណ្តាលចៅក្រម អាជ្ញាកណ្តាល ក៏ជារឿងសំខាន់ ព្រោះបើសិនជាចៅក្រម អាជ្ញាកណ្តាលរបស់យើង កាត់សេចក្តីប្រកបដោយយុត្តិធម៌ និងត្រឹមត្រូវ វានឹងក្លាយជាការលើកទឹកចិត្តមួយដ៏ខ្ពស់ សម្រាប់ឱ្យកីឡាករ-កីឡាការិនីរបស់យើង ចូលរួមដោយសប្បាយចិត្ត និងកាន់តែខំប្រឹងថែមទៀត»។
លោកបន្ថែមថា៖ «ជាចៅក្រម អាជ្ញាកណ្តាល ត្រូវអនុវត្តធ្វើម៉េចរក្សានូវតម្លៃរបស់យើង ដោយប្រកាន់នូវភាពសច្ចៈ និងយុត្តិធម៌ គឺពេលឡើងទៅជាចៅក្រម និងអាជ្ញាកណ្តាល បញ្ជានៅលើទីលាន ខ្ញុំសូមឱ្យមានភាពសច្ចៈ និងយុត្តិធម៌! សូមកុំមានការលម្អៀងចិត្ត កុំមានឱ្យសោះ។ មិនត្រូវគិតថា អ្នកនេះ ឬអ្នកនោះ មកពីក្លិបណានោះទេ គឺត្រូវកាត់សេចក្តីដោយយុត្តិធម៌ ដើម្បីផ្តល់នូវក្តីសង្ឃឹម និងភាពជឿជាក់ដល់បងប្អូនកីឡាករ-កីឡាការិនីរបស់យើង ហើយក៏ដើម្បីប្រកួតប្រជែងចូលរួមធ្វើជាចៅក្រម និងអាជ្ញាកណ្តាលអន្តរជាតិផងដែរ»។
ចំពោះវគ្គបណ្តុះបណ្តាលចៅក្រម អាជ្ញាកណ្តាលកម្រិត «ក» ដែលបានចាប់ផ្តើមពី ១៩ និងបានបញ្ចប់កាលពីព្រឹកថ្ងៃទី ២៣ ខែ មករា ឆ្នាំ ២០២២ នេះ មានសិក្ខាកាម ២៥ នាក់ (ស្រី ៧ នាក់) មកពីរាជធានី-ខេត្តចំនួន ១០ បានចូលរួម ហើយតាមការវាយតម្លៃរបស់គ្រូឧទ្ទេសក្នុងវគ្គនេះ បានបង្ហាញថា សិក្ខាកាម ១៥ នាក់ បាននិទ្ទេសល្អ និង ១០ នាក់ បាននិទ្ទេសល្អបង្គួរ។ ជាមួយគ្នានេះ លោក អ៊ូ រតនា បានបង្ហើបថា ចៅក្រមអាជ្ញាកណ្តាល ២ រូប ក្នុងវគ្គនេះ នឹងត្រូវបានជ្រើសរើស ដើម្បីចូលរួមកាត់សេចក្តី ក្នុងស៊ីហ្គេម នៅវៀតណាមខាងមុខនេះ។
«ខ្ញុំបានសហការជាមួយសហព័ន្ធកីឡាវ៉ូវីណាមពិភពលោក គឺយើងនឹងបញ្ជូនចៅក្រម អាជ្ញាកណ្តាលរបស់យើង ២ រូប ទៅធ្វើជាចៅក្រមអាជ្ញាកណ្តាល ក្នុងការប្រកួតស៊ីហ្គេមលើកទី៣១ ក្នុងខែឧសភា ឆ្នាំ ២០២២ នេះ នៅវៀតណាម អ៊ីចឹងគ្រូបង្វឹក និងក្រុមជំនាញរបស់យើង នឹងធ្វើការពិនិត្យទៅលើការអនុវត្តជាក់ស្តែង របស់ក្រុមចៅក្រមអាជ្ញាកណ្តាលរបស់យើង ចាប់ពីពេលនេះទៅ ដើម្បីរកអ្នកឆ្នើម ២ នាក់ សម្រាប់យកទៅចូលរួមកាត់សេចក្តី ក្នុងស៊ីហ្គេមលើកនេះ ដើម្បីជាបទពិសោធ និងត្រៀមឆ្ពោះទៅធ្វើជាម្ចាស់ផ្ទះស៊ីហ្គេម ឆ្នាំ ២០២៣ នៅកម្ពុជា»។
លោក អ៊ូ រតនា បានបញ្ជាក់ថា៖ «នាខែមករា ឆ្នាំ ២០២៣ សហព័ន្ធវ៉ូវីណាមកម្ពុជានឹងទទួលធ្វើម្ចាស់ផ្ទះ ការប្រកួតអាស៊ីអាគ្នេយ៍មួយទៀត ដោយទទួលបានការអនុញ្ញាតពីសហព័ន្ធកីឡាវ៉ូវីណាមពិភពលោក ដើម្បីជាការត្រៀមមួយ មុនឈានទៅធ្វើម្ចាស់ផ្ទះស៊ីហ្គេម ឆ្នាំ ២០២៣ ហើយពេលធ្វើម្ចាស់ផ្ទះ យ៉ាងហោចណាស់ ក៏យើងប្រើប្រាស់ធនធានចៅក្រម អាជ្ញាកណ្តាលរបស់កម្ពុជាចំនួន ៥ រូប ជាមួយមន្ត្រីវ៉ូវីណាមអន្តរជាតិផងដែរ។ ដូច្នេះសូមឱ្យមន្ត្រីទាំងអស់ ត្រូវមានការប្តេជ្ញាចិត្តខ្ពស់ ដើម្បីសម្រចគោលដៅអភិវឌ្ឍន៍នេះ ទាំងអស់គ្នា»៕
