ក្រុងឡុងដ៍: គ្រូបង្វឹក លោក Thomas Tuchel អំពាវនាវដល់អ្នកគាំទ្រឱ្យបង្ហាញនូវការគោរព បន្ទាប់ពីខ្សែការពារ Antonio Rudiger របស់ក្រុម Chelsea ត្រូវបានវាយប្រហារដោយកាំជ្រួចដៃ ដែលគប់ដោយអ្នកគាំទ្ររបស់ក្រុមមាន់ខ្នាយមាស Tottenham Hotspur (Spurs) ក្នុងអំឡុងការប្រកួត នៅឯកីឡដ្ឋាន Stamford Bridge កាលពីថ្ងៃអាទិត្យ។
កីឡាករ Rudiger ត្រូវបានគប់ដោយកាំជ្រួច ដែលហោះចេញពីកន្លែងអង្គុយរបស់ក្រុមភ្ញៀវ ក្នុងវគ្គទី២ នៃការប្រកួត ដែលក្រុមតោខៀវ បានយកឈ្នះក្រុមគូប្រជែងរួមក្រុងឡុងដ៍ ក្នុងលទ្ធផល ២-០។
លោក Tuchel បានចោទប្រកាន់អ្នកគាំទ្ររបស់ក្រុម Spurs ថា បានបង្កើតនូវរូបភាពប្រកាន់ពួជសាសន៍ចំពោះរូបគាត់ អំឡុងការប្រកួត រវាងក្លិបទាំង ២ ក្នុងឆ្នាំ ២០១៩ ហើយហេតុការណ៍ កាលពីថ្ងៃអាទិត្យ គឺជាបញ្ហាដែលពាក់ព័ន្ធនឹងអ្នកគាំទ្រដ៏អាក្រក់ចុងក្រោយ ដែលប៉ះពាល់ដល់ក្របខ័ណ្ឌ Premier League នៅចុងសប្ដាហ៍កន្លងមក។
នៅទឹកដីរបស់ក្រុម Everton កាលពីថ្ងៃសៅរ៍ អ្នកគាំទ្ររបស់ក្រុមម្ចាស់ផ្ទះបាននាំគ្នាចោល (គ្រវែង) ដបទឹកជាបន្តបន្ទាប់ រហូតត្រូវខ្សែការពារ ២ រូប របស់ក្រុម Aston Villa គឺ Matty Cash និង Lucas Digne បន្ទាប់ពីគ្រាប់បាល់របស់ខ្សែបម្រើប្រយុទ្ធ Emiliano Buendia ជួយឱ្យក្រុមភ្ញៀវមានជ័យជម្នះ ១-០។
គ្រូបង្វឹករបស់ក្រុមតោខៀវ លោក Tuchel បញ្ជាក់ថា អ្នកគាំទ្រត្រូវតែប្រព្រឹត្តឱ្យបានល្អ និងគោរព ចំពោះអាកប្បកិរិយារបស់ពួកគេជាមួយកីឡាករ និងអ្នកចាត់ការក្រុម ហើយនៅពេលត្រូវបានសួរថា តើហេតុការណ៍ថ្មីៗនេះ ធ្វើឱ្យគាត់មានការបារម្ភ ឬយ៉ាងណា លោកបានឆ្លើយថា៖ «ខ្ញុំមិនបារម្ភទេ តែអ្នកនិយាយត្រូវ ខ្ញុំបានផ្ញើសារទៅកាន់អ្នកគាំទ្ររបស់យើង ពោលគឺគាំទ្ររបស់យើង យើងចូលចិត្តឱ្យពួកគេនៅក្បែរៗទីលាន ព្រោះយើងស្រឡាញ់បរិយាកាសដ៏អ៊ឹកធឹក»។
«គ្រប់គ្នាត្រូវតែបង្ហាញនូវការគោរព។ តែដោយរួម ខ្ញុំមិនមានការបារម្ភនោះទេ។ ពេលនេះ ខ្ញុំរីករាយជាមួយនឹងបរិយាកាសនេះ។ ប្រសិនបើមានវិធីថ្មី ដែលពួកយើងត្រូវតែអនុវត្តជាមួយគ្នា ដើម្បីធ្វើឱ្យប្រាកដថា វាបញ្ឈប់ហេតុការណ៍បែបនេះ បានយ៉ាងលឿនបំផុតតាមដែលអាច ដើម្បីជាការពារបរិយាកាសដ៏ពិសេស និងទិដ្ឋភាព ដោយឡែកនៃប្រទេសអង់គ្លេស»។ នេះជាការបន្ថែមរបស់លោក Tuchel៕ AFP/VN